Jerimaia 13 - Edo Bible (E Baibol Ẹdo) Version 1996

Utalawẹ Eto Ovbiohuẹ

¹ E Nọyaẹnmwa keghi tama mwẹ ne I ya dẹ utalawẹ eto ovbiohuẹ ne I yọ ẹe, sokpan, ọ keghi vbe wẹ ne I ghẹ viọ iran ye uwu amẹ.

² I keghi rhunmwuda ọnii dẹ ọe, I na yọ ẹe.

³ Ẹre Nọyaẹnmwa na vbe dọlegbe gunmwẹ guan wẹẹ,

⁴ “Gha rrie Ẹzẹ Yufretes ne u ya viọ utalawẹ nii lẹre ye uwu uvun okuta.”

⁵ I keghi rhunmwuda ọnii gha khian ya viọ iran lẹre ye ọkpẹn Yufretes.

⁶ Ọ ghi kpẹ kherhe, e Nọyaẹnmwa keghi tama mwẹ wẹ ne I gha rrie Yufretes ne I ya rhie utalawẹ nii.

⁷ Ẹre I na gha khian, I ghi sẹ ehe ne I rhie ẹre lẹre yi, I keghi miẹn sẹẹ, ọ wa rhia, ẹ i zẹdẹ ghi maa hiehiere.

⁸ Ẹre Nọyaẹnmwa na vbe dọlegbe gunmwẹ guan, ọ wẹẹ,

⁹ “Vbenian ọ re I ra fuẹn ọnrẹn ruan ighe itengbemu e Juda kevbe itengbemu nọkhua ọghe Jerusalẹm.

¹⁰ Avbe emwa dan na hee ne iran họn ẹmwẹ mẹ. Vbene iran ka wa zee vbe udu ne iran na vbe re ekhọe dan dee yi, ọ re iran ye ye. Iran gha gho, iran gha ga avbe ẹbọ ọvbehe. Rhunmwuda ọnii, erriọ iran ra do gha ye zẹe vbe utalawẹ na, te iran wa khian ne ẹ i ghi maa hiehiere.

¹¹ Zẹ vbene utalawẹ rhikhan mu ọmwa ẹkun, erriọ I te ho ne ivbi Izrẹl hia kevbe Juda, da mwẹ yi gbain. I keghi ru ọna, ne iran miẹn ehe na gha re emwa mwẹ, ne iran rhie urhomwẹ kevbe ọghọ gie eni mwẹ, sokpan, iran ma họn ẹmwẹ mẹ.”

Uru Ayọn

¹² E Nọyaẹnmwa Osanobua kevbe tama mwẹ wẹẹ, “Jerimaia tama ivbi Izrẹl ne iran ruẹn ayọn vuọn avbe uru ayọn hia. Iran gha zẹ wanniẹn wẹ iran rẹnrẹn wẹ te a gha ruẹn ayọn vuọn avbe uru ayọn hia.

¹³ U ghi khama iran ẹghẹ nii wẹ, mẹ ne Nọyaẹnmwa ra ye ayọn vuọn emwa otọe na hia a te do miẹn wẹ, te ayọn ghi gbe iran hia, avbe ọba ni re ivbi uniẹn e Devid, avbe ohẹn avbe akhasẹ kevbe ivbi e Jerusalẹm hia.

¹⁴ Iyekọnii, I ghi khuarha iran kugbe zẹ vbe uru, ke ibiẹka kevbe eniwanrẹn, itohan, ẹnina ra agiẹngiẹn ọmwa irrọ ne ọ gha da mwẹ obọ yi wẹ ne I ghẹ gbele iran an.”

E Jerimaia Gui Ye Ẹmwẹ Itengbemu

¹⁵ Ivbi Izrẹl, e Nọyaẹnmwa guan nẹ! Wa gha mu egbe rriotọ ne uwa gha danmwehọ ẹre.

¹⁶ Wa gha ya ọghọ ne Nọyaẹnmwa ne Osanobua uwa, ne ọ ghẹ ya gie ebi ro uwa, wa ghi ya rrua owẹ vbe avbe oke nekhua. Ne ọ ghẹ ya fi uwanmwẹ ne uwa rhie aro yi werriẹ khian ebiebi ne ọ so kankan ankan.

¹⁷ Adeghẹ uwa ma zẹ yọ, I gha ya viẹ vbe ẹkhokho rhunmwuda itengbemu uwa I gha viẹ eve orriara, ameve, mwẹ ghi gha rhọ kua, rhunmwuda, a munọ emwa oghunmwu viọ gha rrie.

¹⁸ E Nọyaẹnmwa keghi tama mwẹ wẹẹ, “Tama ọba ke ẹe kevbe iye ẹe wẹ ne iran tuorre vbe ẹkete gha die otọ rhunmwuda, ẹde iran ne mose mose dele hin iran uhunmwu rre nẹ.

¹⁹ Avbe okpẹvbo ni rre odẹ ekẹn e Juda, okuo ghae gae ẹre nẹ, ọmwa ne ọ gha miẹn ehe la sẹ eke ne iran ye irrọ. A viọ ivbi e Juda hia kpao gha rrie iwe nẹ.”

²⁰ E Jerusalẹm ghe! Ghe! Avbe eghian ruẹn wa ke odẹ okuọ dee! Emwa ne a viọ nuẹn viọ mwẹ vbo, avbe emwa ruẹn ne u ya ghagha.

²¹ A deghẹ avbe emwa ne u tie ẹre ọse ruẹ ghi khọn ruẹn, iran na gha khaemwisẹ yan ruẹn, vbe u a ra kha hẹ. U ghi do gha rre uwu obalọ, zẹ vbe okhuo ne emwi ubiẹmwẹ ru.

²² U gha nọ emwi ne ọ si ẹe ne emwi na hia na sunu vbe egbe ruẹ, emwi ne ọ si ẹe ne ukpọn na yanghan ye uwẹ ẹkun, kevbe ne emwa na ye ẹtin mu ẹẹn guẹ gha ru emwi, emwi ne ọ sii ẹe ọrọre wẹ orukhọ ruẹ mu ohan gbe.

²³ Ọmwa nekhui gha sẹtin fi ikpakpa egbe ẹre werriẹ ra, ra ne ogioha khiẹn ekẹnnẹkẹnnẹ ne ọ rre egbe ẹre kua. Adeghẹ iran gha sẹtin, ẹghẹ nii ọ re uwa ne ọ ma rẹn vbe a ru emwi ọvbehe hẹ gberra orukhọ, gha na vbe sẹtin ruẹ vbene a ru emwi ne ọ kere hẹ.

²⁴ Te Nọyaẹnmwa ra zagha uwa a zẹ vbe ebe ne ọ kakae ne ẹhoho ato hoho kua.

²⁵ Rẹn taa ẹe nẹ wẹ ọna ọ ra mian uwa. Ọna ọ re ọ wẹ rẹn ra ru uwa ẹre rhunmwuda, wa mianmian ẹẹn nẹ, wa na gha lele avbe ẹbọ ohoghe.

²⁶ E Nọyaẹnmwa tobọ ẹre ọ re ọ ra bannọ uwa a, ọ ghi gie agbọn miẹn emwi ekhue uwa.

²⁷ Ọ miẹn Vbe uwa ru emwi ne ẹ i ye ọre nẹ. Ọ miẹn ọẹn vbe uwa lele avbe ẹbọ iran ni ma yayi vbe avbe uhunmwu oke kevbe oha, zẹ vbe ọmwa ne ọ fifi lele amwẹ ọsiọre ra ẹsin ọwẹe ne ọ kpe lele ẹsin amwẹ. Ivbi e Jerusalẹm, wa wiri, de ẹghẹ ne uwa gha ya huan?