Jerimaia 12 - Edo Bible (E Baibol Ẹdo) Version 1996

E Jerimaia Nọ E Nọyaẹnmwa Ọta

¹ Nọyaẹnmwa, I gha wẹ ne ima gba gui ẹzọ mwẹ, wẹ ọ re ọ khian rri ase. Sokpan, I gha ye nọ ruẹn ọta ne ọ dekan ohiẹn ẹmwata. Vbọzẹ ne agbọn na maa emwa dan sẹrriọ yi?

² U gbọ iran, iran keghi zẹlẹ inian iran wan rẹn, iran keghi mọ. Ẹghẹ hia iran ya so eni ruẹn ne ọ maa sevba, iran i mobọ zẹ ye uwẹ re.

³ Sokpan wẹ rẹn mwẹ Nọyaẹnmwa; wẹ miẹn emwi ne I ru, kevbe vbene I ho ẹmwẹ ruẹn hẹ. Silo avbe emwa dan na gha khian zẹ vbe avbe ohuan ne a ra gbele ua. Gha baba iran ọ te sẹ ẹghẹ ne a gha ya gbele iran an.

⁴ Inu ẹghẹ ọ re otọe mwa ra ye hiahia a hia la? Ne irunmwu ni rre oha hia ra na luẹluẹ? Aranmwẹ kevbe ahianmwẹ gha wulo, rhunmwuda ekhọe dan ọghe emwa ima, iran ni kha wẹẹ, “Osanobua i dẹghe emwi ne ima ru.”

⁵ E Nọyaẹnmwa keghi kha wẹẹ, “E Jerimaia, a deghẹ egbe emwa nagbọn ne a rhulẹ lele wọ ruẹ, vbe u a ra ya sẹtin rhulẹ lele ẹsin hẹẹ? A deghẹ u ma sẹtin mudia vbe ore ẹvbo, vbe u a gha na sẹtin mudia vbe ọkpẹn Jọdan hẹ.

⁶ Uhin ighe avbe etuẹn nikpia, emwa ẹgbẹe ruẹ rhie ruẹ ma, iran rhie obọ ba okhọn ne a gu uẹ khọn. Ghẹ mu ẹtin yan iran, ọ gha khọn iran ne iran gha ta ẹmwẹ ose.”

Akhiẹ E Nọyaẹnmwa Ye Ẹmwẹ Emwa Irẹn

⁷ E Nọyaẹnmwa khare wẹẹ, “I hee Izrẹl yotọ nẹ. I sẹẹ uhunmwu ẹvbo mwẹ ne I hannọ zẹ rae nẹ I viọ emwa ne I ho ẹmwẹ ọnrẹn ye obọ ẹtin eghian iran nẹ.

⁸ Emwa mwẹ ne I hannọ zẹ mu aro igbinna da mwẹ nẹ, iran gha vannọ okan yan mwẹ zẹ vbe oduma vbe uwu oha, rhunmwuda ọnii, ohu iran mu mwẹ.

⁹ Te emwa mwẹ ne I hannọ zẹ ye vbe ahianmwẹ ne avbe ahua khu khian ke igienenẹ rre. Tie avbe aranmwẹ oha rre, ne iran do deba iran vbe ihe evbare ọbọbọtizọ nii!

¹⁰ Avbe enikhaemwisẹ ni re orhunmwuyẹn, dunmwu ogba azara mwẹ uan nẹ; iran ye owẹ guọghọ ugbo mwẹ ginna otọ iran ye owẹ ye otọe esiesi mwẹ khian ato.

¹¹ Iran ya ẹe khian otọe ne ọ gbe ẹvbi ọ wa dihoi rua ye odaro mwẹ, otọe ni hia wa khian ato, a ma vbe miẹn ọmwa ne ọ zẹ yọ.

¹² Emwa wa fian uhunmwu oke ato ni rra do fu emwi hẹ, I gie okuo ne ọ ya fuẹn otọe nii hia a, ọmwa ne ọ ra gha rre ọfumwegbe i rrọ.

¹³ Avbe emwa mwẹ kọ ọka, sokpan iran keghi ya rhọ irunmwu; iran kakabọ winna, sokpan, iran ma miẹn emwirhọkpa vbọ. Rhunmwuda ohu mwẹ ne ọ wegbe, emwiokọ iran ma maa.”

Eyan Ne Nọyaẹnmwa Yan Ma Avbe Ẹdogbo Izrẹl

¹⁴ E Nọyaẹnmwa khare wẹẹ, “I mwẹ ẹmwẹ ne I gha tama avbe ẹdogbo Izrẹl, emwa ni rhia rua a ighẹ otọ ne I mu ne ivbi Izrẹl, ne emwa mwẹ. I gha viọ emwa nii hin ẹvbo iran rre zẹ vbene a vbokho ovbi erhan, I ghi vbe miẹn e Juda fan vbe obọ iran.

¹⁵ Sokpan, I gha viọ iran kpao nẹ, I gha tohan iran, I gha viọ dọmwadẹ uhunmwu ẹvbo dọlegbe gha die otọ ẹre kevbe ẹvbo ẹre.

¹⁶ Adeghẹ iran ghi ye ekhọe iran hia rhan obọ miẹn iyayi avbe emwa mwẹ, iran na vbe gha ya ẹe vẹn ihẹn wẹẹ, ‘Zẹ vbene Nọyaẹnmwa na rrọọ’ zẹ vbene iran vbe ma emwa mwẹ ẹre ne iran gha ye eni e Baal vẹn ihẹn, ẹghẹ nii iran ghi do gha re efẹn okpa vbe uwu avbe emwa mwẹ, agbọn gha maa iran.

¹⁷ Sokpan, a deghẹ uhunmwu ẹvbo okpa rrọọ ne ọ ma họn ẹmwẹ, mẹ gha wa vbọe fua fẹẹrẹ, I ghi fuẹn ọnrẹn ruan. Mẹ ne Nọyaẹnmwa ọ re ọ tae.”