Jerimaia 11 - Edo Bible (E Baibol Ẹdo) Version 1996

Jerimaia Kevbe Nene Ile

¹ E Nọyaẹnmwa keghi tama mwẹ wẹẹ,

² “Danmwehọ avbe ẹmwẹ ne a ta ye nene ile. Ta ma ivbi e Juda kevbe ivbi e Jerusalẹm.

³ Wẹ mẹ ne Nọyaẹnmwa ne Osanobua Izrẹl tie ihẹn ne ọmwaikọmwa ne ọ ma ru zẹ vbene a ta ye ile na.

⁴ Ile ne I gu avbe erha iran odede taa nọ, vbe ẹghẹ ne I na viọ iran ke Igipt ladian, otọe nii ne ọ yevbe ogidi erhẹn ne iran. I tama iran wẹ ne iran gha họn ẹmwẹ mẹ, kevbe ne iran gha ru emwi hia ne I tama iran. I keghi tama iran wẹ, iran gha họọn ẹmwẹ mẹ, iran ghi gha re emwa mwẹ, mẹ ghi vbe gha re Osanobua iran.

⁵ “Ẹghẹ nii, I gha do mu ẹẹn sẹ ighe eyan ne I yan ma avbe erha iran odede wẹ, I gha mu otọe esi nii ne ọ maa emwiokọ, ne iran ye na ne iran.” Mẹ keghi kha wẹẹ, “I họẹn, Nọyaẹnmwa.”

⁶ Ẹre Nọyaẹnmwa na tama mwẹ wẹẹ, “Gha rrie avbe ore nọkhua ọghe Juda kevbe avbe idunmwu ni rre Jerusalẹm. Ya ta uhunmwu ne I giee vbe evba, ma emwa nii ne iran danmwehọ ẹmwẹ ne a ta ye nene ile, ne iran gha ya ẹe ru emwi.

⁷ Ẹghẹ ne I na viọ iran ke otọe Igipt ladian, te I mobọ wa kan rẹn ye iran ehọ wẹ ne iran gha họn ẹmwẹ mẹ, te I yevbe gha ta ẹe ma iran khian rhinrin do sẹ ẹdẹnẹrẹ na.

⁸ Sokpan, iran ma danmwehọ ra ne iran ya ẹẹ ru emwi. Sokpan, dọmwadẹ ọghọe keghi wa gha ze vbe udu khian, iran na gha ru emwi dan, vbene iran ka ru de ẹdẹ. I tama iran ne iran gha ya ile nii ru emwi, sokpan, iran hee. Rhunmwuda ọnii, I keghi rri iran oya hia ne a ya unu kan vbe uwu ẹre.”

⁹ Ẹre Nọyaẹnmwa na tama mwẹ wẹẹ, “Ivbi e Juda kevbe Jerusalẹm gha si uma ga mwẹ.

¹⁰ Iran wa dọlegbe gha rrie orukhọ avbe erha iran odede ni hee ne iran gha ru vbene I khare, iran gaa avbe ẹbọ ọvbehe. Izrẹl kevbe Juda, iran eveva ma ru vbene ile ne I gu avbe erha iran odede ta khare.

¹¹ Rhunmwuda ọnii nian, mẹ ne Nọyaẹnmwa, ọ re ọ tama iran yotọ na wẹ I ra do si ọfuan ye iran egbe, kevbe wẹ iran i sẹtin lẹ ọre fe. Iran gha tu bu mwẹ gha dee do nọ iyobọ, I i zẹdẹ zẹ ye iran ẹre.

¹² Ẹghẹ nii, ivbi e Juda kevbe Jerusalẹm ghi tulo bu avbe ẹbọ ne iran zọ ese ghe ne iran do yi iran obọ. Sokpan, avbe ẹbọ ni i ra sẹtin miẹn iran fan vbe ọfuan ni a rre.

¹³ Vbene avbe okpẹvbo ne ivbi e Juda mwẹ bun sẹ, ọ re ẹbọ ne iran mwẹ vbe bun sẹ, iran ni rre Jerusalẹm, vbene idunmwu ne iran mwẹ bun sẹ, ọ re avbe Ogiukpo ne iran na zọ ese ghe ẹbọ osọnnọ nii ighe Baal vbe bun sẹ.

¹⁴ E Jerusalẹm i ghi na erhunmwu ghe mwẹ ra ne iran vbe rinmwian mwẹ ne emwa nii ọvbehe. Iran gha rre uwu ibaro, iran na tu bu mwẹ rre do nọ iyobọ, I i zẹ ye iran ẹre.”

¹⁵ E Nọyaẹnmwa keghi kha wẹẹ, “Emwa ne I ho ẹmwẹ ọnrẹn wa ru emwi dan. De emwi ne ọ ghi ya khẹke iran yi ne iran gha rre uwu Ọgua Osa mwẹ? Te iran ro ra ighe iran gha sẹtin dobọ ọkhọ ne ọ rruan, ọmwa yi vbekpa ne iran na gha ve emwi kevbe ne iran gha na ye aranmwẹ zọ ese?

¹⁶ Vbe ẹghẹ ọkpa, I keghi tie iran erhan ohọ ne ọ vuọn ne ọ vuọn ne ebe kpọtọ kpọtọ kevbe ọmọ ne mose mose, sokpan I gha davan vbe avan nukhunmwu ne I ya mu erhẹn ye ebe ẹre, I ghi vbe guọghọ ẹre abọ kua.

¹⁷ “Mẹ ne Nọyaẹnmwa ne Oghodua ọ re ọ kọ Izrẹl kevbe Juda, sokpan, banbanna nian te I ghi ya ọkhọ yan ma iran, iran ọ re ọ ye obọ iran si ọna ye egbe iran egbe, rhunmwuda, iran ba emwi ku ru, iran ye ohu mu mwẹ, vbekpa ne iran na gha zọ ese ghe Baal.”

A Khuan Khẹ E Jerimaia

¹⁸ E Nọyaẹnmwa keghi tama mwẹ vbe ne avbe eghian mwẹ khuan khẹ mwẹ hẹ.

¹⁹ Mẹ keghi yevbe oteghe ohuan ne ẹ i vbe begbe hiehiere, ne a mu ladian ne a ya gbe ẹe rua, mẹ ma vbe rẹn wẹ mẹ ọ re iran zẹ iro ọkhọ da. Iran kegha kha wẹẹ, “Wa gia kalọ erhan na kua, vbe egbe he rran rẹn na, wa gia gbe ẹe rua ne ọmwa rhọkpa ghẹ ghi ye ẹre rre ọvbehe.”

²⁰ Ọ re I na na erhunmwu wẹẹ, “E Nọyaẹnmwa ne Oghodua, ọbuohiẹn ne ẹ i bu eku ọ re uwẹ khin, wẹ ọ re ọ danmwẹ iro ekhọe emwa kevbe vbene emwi ye iran hẹ, ghe I mu ẹmwẹ enegbe mwẹ ye uwẹ obọ, rhunmwuda ọnii, gie aro mwẹ sẹ ọe vbe u gha rria iran na ikhi.”

²¹ Ivbi Anatọt te ho ne a gbe mwẹ, uan. Iran keghi tama mwẹ wẹ iran gha gbe mwẹ uan deghẹ I ye gha wewe uhunmwu ne Nọyaẹnmwa gie khian.

²² Rhunmwuda ọnii, e Nọyaẹnmwa ne Oghodua ke kha wẹẹ, “I gha rri iran oya! A gha gbele avbe igbama iran vbe okuo; ohanmwẹ gha gbele ivbi iran an.

²³ A gha gbele avbe igbama iran vbe okuo; ohanmwẹ gha gbele ivbi iran an. I rhie ẹghẹ yọ nẹ ne I gha gie ọkhọ ya rruan ivbi Anatọt, ọ gha sẹ ẹghẹ nii, okpa ne ọ ra miẹn uhunmwu vbọ i rrọọ.”