Jerimaia 10 - Edo Bible (E Baibol Ẹdo) Version 1996

Ẹbọ Ne A Gho Kevbe Ugamwẹ Ẹmwata

¹ Ivbi Izrẹl, wa danmwehọ uhunmwu ne Nọyaẹnmwa gie gie uwa.

² Ọ wẹẹ, “Wa ghẹ yegbe ta avbe uhunmwu ẹvbo ọvbehe. Wa ghẹ gie ama ne ọ lughaẹn ne ọ rhie egbe ma vbe iso ya ohan mu uwa, ọ gha khọn rẹn ne afianma gha fian avbe emwa ọvbehe.

³ Emwi ne ọmwa maa ọ re iran na gho. A tọn erhan gbotọ vbe oha, owinna ghi ye emwi iwinna rẹn kaa iran.

⁴ A ghi do ya esiliva kevbe igoru tee iran, a ghi ya ise kaan rẹn ginna otọ ne a ya daeyi ne ọ ghẹ de.

⁵ Te avbe amazẹ vberriọ yevbe emuẹn muẹn ne a mu ye ugbo ogi, iran i sẹtin guan, te a dada iran khian, rhunmwuda, iran i sẹtin khian, wa ghẹ, gie ohan iran mu uwa, iran i mwẹ emwi okpa ne iran gha ru uwa ẹre iran i vbe sẹtin ru emwi okpa ne uwa.”

⁶ Nọyaẹnmwa, a i miẹn ọmwa ne ọ ye vbe ruẹ; wẹ kpọlọ ẹsẹse, eni ruẹn kpọlọ, ọ vbe mwẹ ẹtin.

⁷ De ọmwa ne ẹ i ra ya ọghọ ne uẹn, ọba avbe uhunmwu ẹvbo, hia? U sẹe ne a yọghọ na ọmwa ne ọ ye vbe ruẹ i rrọọ, vbe uwu avbe umẹwaẹn uhunmwu ẹvbo hia, ra vbe uwu avbe ọba iran.

⁸ Akpa vbe abobo ọ re iran hia khin. De ẹwaẹn ne iran ra miẹn ruẹ vbe ukhurhẹ?

⁹ Esiliva ni ke Spen rre a ya rhu amazẹ iran. Kevbe igoru ni ke Ufaz rre, iwinna ne avbe iran ni gue ona ye obọ ru a ya ukpọn ododo kevbe umẹ guee iran egbe, avbe iran ni do ukpọn ni guẹe ọ re ọ do ẹe.

¹⁰ Sokpan wẹ ne Nọyaẹnmwa ọrọre Osanobua vbe ẹmwata, wẹ ọrọre Osanobua ne ọ rrọọ, ọba etẹbitẹ. Ohu gha mu uwẹ, agbọn hia ghi mu rueghe, egbe avbe uhunmwu ẹvbo i sẹtin rrọ ohu ruẹ.

¹¹ (Ọ kere ne uwa tama iran wẹ avbe ẹbọ ni i re ni yii otọ vbe ukhunmwu, a gha guọghọ iran an. Iran i ghi khian gha rrọ vbe ehe rhọkpa vbe agbọn na.)

Ihuan Urhomwẹ

¹² Ẹtin ẹnrẹn ọ re Nọyaẹnmwa ya yii otọe ẹwaẹn ẹnrẹn ọ re ọ ya yii agbọn, ọ kevbe niẹn iso ne ọ vbẹ.

¹³ Amẹ ne ọ rre odukhunmwu iso ghi davan vbe irẹn a wẹ ne ọ ru vberriọ, ọ ghi ke ehe ne agbọn sẹe viọ okuku rre. Ọ ru ẹe ne ayan gha yan vbe amẹ rhọ ọ ghi giee ẹhoho ladian ke ehe ne ọ viọ ẹre lẹre yi gha dee.

¹⁴ Emwa nagbọn gha miẹn ọna, iran ghi khian ni ọ zurọ ni i mwẹ ẹwaẹn, iran ni mannọ amazẹ ma rẹn emwi ne iran ru, rhunmwuda, ẹbọ nii, iran i mwẹ arrọọ, ohoghe vbe nọ.

¹⁵ Iran i mwẹ esa ne iran ye, te ọ kere ne a gha zan iran, a gha fuẹn iran an, vbe Nọyaẹnmwa a ghi fi iran emwi.

¹⁶ Osanobua Jekọb i ye vbe iran, rẹn ọrọre ọmwa ne ọ yii emwi hia, ọ keghi hannọọ Izrẹl zẹẹ ne iran gha re emwa obọ ẹre. E Nọyaẹnmwa ne Oghodua ọ re a tie ẹre.

Iwe Ne Iran Gha Yo

¹⁷ Ivbi e Jerusalẹm, okuo ghae ga uwa nẹ! Wa rhọ emwi uwa si koko.

¹⁸ Nọyaẹnmwa ra filo uwa kua hin otọe na rre, ọ khian rẹnkhẹn uwa a rhinrin a te do miẹn wẹ ọkpa ma ghi kẹe vbe uwu uwa. E Nọyaẹnmwa tae nẹ.

¹⁹ Ivbi e Jerusalẹm keghi datu wẹẹ, “A kuan mwa, obọ da mwa ẹsẹse! Ẹwẹn ima i ra rrie! Ma te gha ro ighe emwi ne egbe mwa gha rrọ ọ re ọna khin.

²⁰ Owa ukpọn mwa rhiae, irri ne ọ da ẹe yi giagiae. Ivbi mwa hia kpao. Emwa ne ọ ghaghi mu owa ukpọn mwa kpaegbe i ghi rrọọ, ọmwa i ghi rrọ ne ọ gha tan ukpọn onurho ẹre.”

²¹ Mẹ keghi wanniẹn wẹẹ, “Akpa ọ re avbe ọkaolotu mwa khin; iran ma wẹ ne Nọyaẹnmwa ma iran odẹ, ọ na ọ sii ẹe ne ọ ma na dunna ne iran, te a ghi zagha emwa ima hia kua.

²² Wa danmwehọ! Iran giee uhunmwu rre. Ẹvbo ọkpa vbe odẹ okuọ wa hu yo hu rre, ivbiyokuo ẹre gha ya avbe okpẹvbo e Juda khian ato, ehe ne avbe akuaghagha ghi dia.”

²³ Nọyaẹnmwa, mẹ rẹnrẹn wẹ, orhunmwu ọkpa ne ọ mwẹ asẹ yan vbene ọ hi hẹ i rrọọ; orhunmwu ọkpa ne ọ khaemwisẹ yan ẹdagbọn rẹn i rrọọ.

²⁴ Dia emwa ruẹn ye odẹ Nọyaẹnmwa, sokpan, ghẹ gie obọ da mwa gbe, ra ne u rri ima oya vbe ohu a gha mu ẹẹn, ne a ghẹ miẹn wẹ ọghe ima fo ye evba.

²⁵ Mu ohu ruẹ aro da, avbe uhunmwu ẹvbo ni ma ga a, kevbe avbe emwa ni he uwẹ yotọ. Iran gbele avbe emwa ruẹn uan iran fuẹn ima an fẹẹrẹ, iran keghi ye ẹvbo ima khian itowa.