Jerimaia 1 - Edo Bible (E Baibol Ẹdo) Version 1996

¹ Emwi ne ọ rre ebe na ọrọre avbe ẹmwẹ ne ọ tae ighẹ Jerimaia ne ovbi e Hilkaia, ne ọ re okpa vbe uwu avbe ohẹn ni rre Anatọt vbe otọe Bẹnjamin.

² E Nọyaẹnmwa keghi gu e Jerimaia guan vbe ọ rre ukpo iwera ne ọ rriọba ighe Josaia ne ovbi Amọn ne ọ rriọba vbe Juda.

³ Ọ keghi vbe dọlegbe guan vbe ẹghẹ ne Josaia ne ovbi e Jehoiakim na vbe rriọba. Vbe iyeke ọnii, e Nọyaẹnmwa keghi vbe dọlegbe gu ẹe guan vbe ẹghẹ nibun rhinrin ya sẹ ukpo ne ogiowọrọ ne ọ yae vbe ẹkete ighẹ Zedekaia ne ovbi e Josaia. Vbe uki nogisẹn, ọghe ukpo ne a viọ ivbi e Jerusalẹm gha rrie iwe.

Utiemwẹ E Jerimaia

⁴ E Nọyaẹnmwa keghi tama mwẹ,

⁵ “I zẹẹ uwẹ nẹ, I keghi rhie arrọọ nuẹn, vbe a te do biẹ ọ, I hannọ uwẹ rhie ladian nẹ ne u gha re akhasẹ avbe uhunmwu ẹvbo.”

⁶ Mẹ keghi wanniẹn wẹẹ, “E Nọyaẹnmwa ne Udazi, I i guara guan, ọvbokhan I khin.”

⁷ Sokpan e Nọyaẹnmwa tama mwẹ wẹẹ, “Ghẹ kha i ghẹ ọvbokhan u khin, sokpan, bu iran ne I giẹ ọ bu gha khian, ne u vbe talọ emwi hia ne I wẹ ne u tama iran ma iran.

⁸ Ghẹ gie ohan iran mu ẹẹn rhunmwuda, I gha mudia ke uẹ ne I degue ruẹ. Mẹ ne Nọyaẹnmwa ọ re ọ tae.”

⁹ Ẹre Nọyaẹnmwa na niẹn obọ ladian ọ keghi ya ẹe kaan mwẹ akhuarhamwunu, ọ na tama mwẹ wẹẹ, “Danmwehọ, ẹmwẹ ne u ra ta ọ re I tama ruẹn na.

¹⁰ Vbe ẹdẹnẹrẹ na, I rhie asẹ ne uẹn yan uhunmwu avbe uhunmwu ẹvbo kevbe avbe otọe arriọba, ne u ya gha silo emwi vbọ kevbe ne u ya gha siẹn emwi sotọ, ne u ya gha rẹnkhẹn emwi uan kevbe ne u ya gha dunmwu emwi uan, ne u ya gha bọ kevbe ne u ya gha kọ.”

Umian Eva

¹¹ E Nọyaẹnmwa keghi nọọn mwẹ wẹẹ, “E Jerimaia, de emwi ne u dẹghe?” I keghi wanniẹn wẹẹ, “Abọ erhan almọnd.”

¹² E Nọyaẹnmwa keghi wanniẹn wẹẹ, “Ẹmwata nọ, te imẹ ghi ghe ughe na ne I miẹn wẹ ẹmwẹ mwẹ sẹe.”

¹³ Ẹre Nọyaẹnmwa na vbe dọlegbe gunmwẹ guan, ọ nọọn mwẹ wẹẹ, “De emwi ọvbehe ne u ghi vbe bẹghe?” I keghi wanniẹn wẹẹ, “I bẹghe vbe akhe ọkpa tin vbe erhẹn vbe odẹ okuọ, ọ kẹe ekherhe ne ọ rhurhẹ mu unu da edinran.”

¹⁴ Rẹn keghi kha ma mwẹ wẹẹ, “Ọfuan gha ke odẹ okuọ rre do de tọn iran hia ni rre otọe na.

¹⁵ Rhunmwuda te imẹ ghi tie avbe uhunmwu ẹvbo hia ni rre odẹ okuọ wẹ ne iran gha dee. Avbe ọba iran ghi mu ẹkete iran gbọọ ye onurho e Jerusalẹm, kevbe lẹga ekẹn ne a gbe lẹga ẹre, kevbe yan avbe ẹvbo ni dekẹe vbe Juda.

¹⁶ I gha rri avbe emwa mwẹ oya rhunmwuda iran ru orukhọ ne, iran he mwẹ yotọ. Iran zọ ese ghe avbe ẹbọ ọvbehe, iran mannọ avbe amazẹ, iran keghi gha gho iran.

¹⁷ Mu egbe, Jerimaia, ya talọ avbe ẹmwẹ hia ne I we ne u tama iran, ma iran. Ghẹ gie ohan iran mu ẹẹn nian, ne a ghẹ miẹn wẹ te I ghi gie ohan iran mu ẹẹn sayọ vbe u gha sẹ ehe ne iran ye ne.

^18-19 Danmwehọ, Jerimaia, emwa hia ni rre otọe na gha mu aro dan da ruẹ, avbe ọba, e Juda, avbe ekhaẹmwẹ avbe ohẹn, kevbe avbe emwa nii. Sokpan, vbe ẹdẹnẹrẹ na, mẹ rhie ẹtin nuẹn nian ne u ya khẹ iran, te u ra ye vbe ẹvbo ne a gbe odin gaa, orre ematọn, ekẹn oze. Obọ iran i sẹtin ke ukhunmwu ne uẹn, rhunmwuda, I gha rrọọ yaba ruẹ, ne I degue ruẹ, mẹ ne Nọyaẹnmwa ọ re ọ taa ẹe.”