Jems 4 - Edo Bible (E Baibol Ẹdo) Version 1996

Ọse Ne A Gu Agbọn Ru

¹ De ehe ne ẹzọ kevbe igbinna la la uwu ẹbu uwa yi? Orriarria uwa, ye orhiẹnrhiẹn ne ọ gu egbe uwa gbinna ẹghẹ hia, ọ re ọ ke rre.

² Wa ho emwi eso, sokpan obọ uwa ma sẹ ọe, rhunmwuda ọnii, wa ghi mu egbe ne uwa gha ya de izigha, wa ghi ye aro ye emwi eso, sokpan ẹ i sẹ uwa obọ, rhunmwuda ọnii wa ghi suẹn gha gui kevbe gha gbinna. Emwi ne uwa gualọ ma sẹ uwa obọ rhunmwuda, wa ma nọ rẹn vbe obọ Osanobua.

³ Wa gha nọ, ẹ i vbe sẹ uwa obọ rhunmwuda, emwi ne ọ ya uwa nọ rẹn, ẹ i ma, emwi ne uwa gha ya gha zẹ ọkpowẹ, ọre uwa họ rẹn.

⁴ Wa ne ẹ i mwẹ iyayi, wa ma rẹn wẹ, ne a gha re ọse agbọn na, ighẹ te a ya ẹe khian oghian Osanobua?

⁵ Ghẹ gha ro ighẹ, ẹ i mwẹ otọ emwi ne a ya ẹe kha ighẹ ne ebe ne kha wẹẹ, “Orhiọn ne Osanobua rhie ye uwu ima, orriarria ọbanabe ọre ọ vuọn rẹn.”

⁶ Sokpan, uhin ighẹ ẹsọhẹ ne Osanobua rhie ne ọmwa, ọre ọ wo vbe egbe sẹ. Rhunmwuda ebe khare wẹ, “Te Osanobua mu aro ne ọkhọ da iran ni tọn egbe mu, sokpan ọ ghi gha rhie ẹsọhẹ ne iran ni mu egbe rriotọ.”

⁷ Rhunmwuda ọnii khekherriọ, wa gha zẹ egbe uwa obọ ne Osanobua. Wa mu aro igbinna da Esu, ọ gha lẹ hin ehe ne uwa ye rre.

⁸ Wa sikẹ Osanobua, rẹn gha vbe sikẹ uwa. Wa kpe obọ uwa a, wa ne emwa orukhọ. Wa kpe ekhọe uwa huan, wa ne emwa ẹkẹ vbe iwẹnwẹn.

⁹ Wa gha khiẹ, wa gha go, wa gha viẹ, wa ya ogiẹ uwa khian eve, wa vbe ye ọyẹnmwẹ uwa khian akhiẹ.

¹⁰ Wa mu egbe uwa rriotọ vbe odaro Osanobua, rẹn gha vbe tọn uwa mu.

Vbe Ekpa Ne A Ghẹ Gha Bu Ohiẹn Ọtẹn Ne Okpia

¹¹ Wa ghẹ gha zan egbe etẹn mwẹ, ọmwaikọmwa ne ọ zan ọtiọnrẹn ra ne ọ bu ohiẹn ọnrẹn, ọ zan nene Uhi, ọ keghi vbe gha hu ohiẹn ọnrẹn. A deghẹ wẹ bu ohiẹn nene Uhi, ẹghẹ nii, wẹ i ghi re ne ọ bu vbene nene Uhi kha re, sokpan ne ọ bu ohiẹn ọnrẹn.

¹² Osanobua ọrọre ne ọ yi uhi kevbe ne ọ bu ohiẹn. Rẹn ọkpa kẹkan ọre ọ sẹtin miẹn emwi fan kevbe ne ọ vbe sẹtin fuẹn ọnrẹn uan. Vbe uwa a tie egbe ruẹ re yi ne u na bu ohiẹn ihua a?

Vbe Ekpa Wẹ Ne A Ghẹ Gha Rhuọ

¹³ Wa danmwehọ mwẹ nian, wa ni kha wẹ. “Ẹrẹna, ra akhuẹ, ma gha yo ẹvbo eso, ma ghi ya gbe ukpo ọkpa vbe odọ, ma ghi do ẹki ne a gha na miẹn igho ọrhẹnrhẹn.”

¹⁴ Wa ma he rẹn vbene ẹdẹ agbọn uwa gha ye hẹ akhuẹ. Rhunmwuda, te uwu ye vbe ighogho amẹ ne ragha ragha, ne ọ rhie egbe ma vbe ẹghẹ kherhe, a ghi ho ẹre bẹkun.

¹⁵ Rhunmwuda ọnii, emwi ne ọ kere ne uwa gha ta ọre ọ na khin, “A deghẹ Osanobua ho, ma gha rre agbọn, ma ghi ru ọna, a ghi ru ọnii.”

¹⁶ Wanwanna nian, wa wa tọn egbe mu, wa keghi vbe rhuọ, egbe orhuọ vberriọ rhọkpa, ne ọ diae i rrọọ.

¹⁷ Rhunmwuda ọnii nian, ọmwa ne ọ rẹn emwi ne ọ kere ne irẹn ru ne ọ ma ru ẹe, ọ rri abe orukhọ.