Jems 3 - Edo Bible (E Baibol Ẹdo) Version 1996

Aranmwẹ

¹ Etẹn mwẹ, ọ ma kei ne ima hia wa gha re emamwaemwi, rhunmwuda, wa rẹnrẹn ighẹ, ma ne emamwaemwi ọre a ra ya obọ ne ọ tọn mu sẹẹ emwa ọvbehe vbe a gha bu ohiẹn.

² Ẹghẹ hia ma hia ya ba emwi ku ru. Ọmwa ne ẹ i ba ẹmwẹ ku ta, ọmwa ne ọ gbae nọ, ọ ghi vbe sẹtin gha ye egbe hia khian ẹse.

³ Te ima rro ekagha ye ẹsin unu, ne iran miẹn ehe na gha ru vbene ima ho, ẹghẹ nii, ma ghi sẹtin gha sua iran la ehe ne ima ho.

⁴ Wa vbe ghe okọ ne khua, ghe vbene ọ digba sẹ nii, kevbe ne ẹhoho ne ọ bi ẹe khian a yan wo vbe egbe sẹ, emwi ne a ya dia okọ ye odẹ ne kherhe nii, ọre a ya dia ẹre, ọ ghi vbe gha rrie ehe ne oziguẹ ho ne ọ gha rrie.

⁵ Erriọ ọre ẹmwẹ aranmwẹ ye, vbene ọ kanmwa sẹ nii, ọ ghi gha rhuọ orhuọ ni kọnkọn. U ghi ghe vbene ẹgbo kpọlọ hẹ ne ovbi ogiọnmwẹ erhẹn sẹtin mu erhẹn yi.

⁶ Te aranmwẹ ye vbe erhẹn, agbọn ne ọ kulo nọ, ọ keghi rre ehe ne ọ khẹ kẹe vbe uwu egbe mwa, ọ keghi vbe gha wawa emwi dan gba egbe mwa hia, ọ ghi rhie erhẹn ne ọ ke ẹrinmwi erhẹn tobọ ẹre sẹ irẹn obọ, ya rhu erhẹn ye ehe ne ima ra ya egbe la hia, vbe ẹdẹ agbọn mwa.

⁷ Ọmwa sẹtin rrii avbe emwi nekpa ne Osanobua yi hia fẹẹrẹ, ọ ka vbe rrii ehia nẹ avbe aramwẹ, ahianmwẹ, aranmwẹ ni họ ekẹn, kevbe avbe ehẹn.

⁸ Sokpan a ma he miẹn ọmwa ne ọ he sẹtin rrii aranmwẹ ẹdẹ. Emwi dan nọ, ẹ i gia da yi, obi uwu dan hia ọre ọ rrọọ.

⁹ Rọẹn ni ọre a ya kpọnmwẹ Nọyaẹnmwa kevbe Erha mwa. rọẹn ọre a vbe ya rhovbiẹ emwa ne agbọn ne iho mwa, emwa ne a yi zẹ vbe ama Osanobua.

¹⁰ Ẹmwẹ ekpọnmwẹ kevbe ẹbọ ne a tie ghi gha tue ke unu ọkpa ni ladian. Etẹn mwẹ, ọ ma kei ne ọna gha sunu.

¹¹ Ẹzẹ ne ọ lẹ amẹ ne ọ rhiẹnrhiẹn kevbe ne ọ rriara ke uhunmwu ẹzẹ ọkpa ni rre i rrọọ.

¹² Etẹn mwẹ, erhan ohọ i sẹtin mọ ọmọ oliv, vberriọ azara i sẹtin mọ ọmọ ohọ, erriọ zẹẹ, ẹzẹ umwẹ i sẹtin lẹ amẹ ne ẹ i fian ladian.

Ẹwaẹn Ne Ọ Ke Odukhunmwu Rre

¹³ Orhiọnkpa rrọọ vbe uwu uwa ne ọ waan ne ọ vbe rẹn otọ ẹmwẹ ra? Wẹ ne uyinmwẹ ọnrẹn ne ọ maa rhie ẹre maa vbe ekpa iwinna esi ne ọ ya imuegbe rri otọ kevbe ẹwaẹn winna.

¹⁴ Sokpan, deghẹ te uwa mwẹ oya ọmwa da ọmwa vbe ekhọe uwa, ighẹ ẹko khọ uwa, emwi vbe da uwa, ọ ma ghi kei ne uwa gha hio, ne uwa vbe gha ba ẹmwata ohoghe.

¹⁵ Ẹ i re ẹrinmwi egbe ẹwaẹn vberriọ ke rre, ọ ghe agbọn na nọ, ẹ i re emwi orhiọn, ọghe esu nọ.

¹⁶ Rhunmwuda, eheikehe ne oya ọmwa da ọmwa ke emwi da mwẹ ye, evba ọre a na miẹn olighi kevbe emwi dan hia.

¹⁷ Sokpan ẹwaẹn ne ọ ke odukhunmwu rre, keghi re vbe okaro, ne ọ huanrẹn, ọ keghi vbe re ne ọ fu ọmwa egbe rre, ne rọkhọ kevbe ọghe ọse, ọ vuọn ne itohan, ọ keghi vbe viọ emwiorhọ iwinna esi ladian, ẹ i mwẹ ẹko ne ọkhọ ọmwa ra ẹkẹ vbe iwẹnwẹn.

¹⁸ Emwi ẹmwata ọrọre emwiorhọ ne a rhọ, vbe emwiokọ ne iran ni mu igbinna, ye ọfumwegbe kọ.