Jems 2 - Edo Bible (E Baibol Ẹdo) Version 1996

Ne A Ghẹ Mu Amakan

¹ Etẹn mwẹ, vbe ẹdẹ agbọn uwa zẹ vbe emwa ni ya Nọyaẹnmwa Jesu Kristi yi, ọmwa ne ọre Nọyan uyi, wa ghẹ gha ya okpan ughughan mwa ne emwa, rhunmwuda vbene iran ye vbe ikinnegbe.

² Gie a kha wẹ okpia ne ọ fee ọkpa, ne ọ rhie oroka igoru ye obọ la uwu iko uwa, ighẹ okpia ovbiogue ne ọ silo osọnmwẹ ukpọn ye egbe na vbe rre,

³ a deghẹ wa ya ọghọ ne okpia ne ọ mu egbe ẹse nii sẹ, wa na vbe tama rẹn wẹẹ, “Tota ye aga ne ọ maa sẹẹ na.” Wa na tama ovbiogue nii wẹ, “Mudia ra tota ye otọ vbe ọkpẹn aga mwẹ vbe emwa na.”

⁴ Ẹghẹ nii, ẹ i re te uwa ghi zẹ egbe ẹkpe, wa keghi vbe lele iro dan gha bu ohiẹn.

⁵ Wa danmwehọ etẹn mwẹ ni ghan. Avbe ivbiogue ni rre agbọn na, ọre Osanobua zẹe wẹ, iran mwẹ iyayi ẹsẹse kevbe wẹ, iran ọ ra yan arriọba ne irẹn ve iran ni ho ẹmwẹ ọnrẹn re.

⁶ Sokpan, wa i ya ọghọ ne ivbiogue! De emwa ni zẹ uwa owẹ yi, ni vbe silo uwa gie enibuohiẹn? Ẹ i re iran ni fee nọ.

⁷ Iran ọrọre emwa ni ya ukpẹ sakan eni esiesi nii, ne a rhie ne uwa.

⁸ Deghẹ wa mu uhi Arriọba nii sẹ, zẹ vbene ọ rre uwu ebe wẹ, “Hoẹmwẹ ogieva ruẹ zẹ vbe egbe ruẹ,” emwi esi wa ru.

⁹ Sokpan a deghẹ vbene ọmwa ye hẹẹ vbe ore egbe, ọre uwa ya ghe obọ ne uwa gha ya muẹn, wa ru orukhọ nẹ, nene Uhi ghi vbe bu abe gbe uwa zẹ vbe ne ọ rra uhi.

¹⁰ Rhunmwuda, ọmwa ne ọ rra ọkpa vbe uwu nene uhi, ọ rraa ehia fẹẹrẹ nẹ.

¹¹ Rhunmwuda ọmwa ne ọ khare wẹ, “Ghẹ ghẹ,” ọre ọ vbe kha wẹ, “Ghẹ gbe ọmwa ran.” Gia kha wẹ, u ma ghẹ u rra uhi nẹ a deghẹ u gbe ọmwa ran.

¹² Wa gha guan, ne uwa vbe gha ru emwi zẹ vbe emwa ne a gha lele uhi ne ọ ya emwa khian eniyanegbe iran bu ohiẹn ọnrẹn.

¹³ Rhunmwuda, ọmwa ne ọ ma mwẹ itohan, Osanobua i ra tohan rẹn vbe ọ a gha bu ohiẹn, sokpan itohan ọre ọ khọnmiotọ ibuohiẹn.

Iyayi Kevbe Iwinna

¹⁴ Etẹn mwẹ, de esa ne ọ khin vbe orhiọnkpa a kha wẹ, “Mẹ mwẹ iyayi,” i ghẹ uyinmwẹ ọnrẹn ma rhie maa vberriọ? Iyayi nii gha sẹtin miẹn rẹn fan ra?

¹⁵ Gia kha ighẹ etẹn ne ikpia ra etẹn ne ikhuo eso rrọọ ne ẹ i miẹn re, ẹ i miẹn rhie rhuan.

¹⁶ De esa ne ọ khin vbe uwẹ a tama iran wẹ, “Osanobua ne ọ fiangbe uwa. Wa ghẹ bannọ egbe ye oni, wa rri evbare ẹse.” Vbene uwẹ ma na rhie emwi ne a ya gaga egbe vbe agbọn ne iran?

¹⁷ Erriọ ọre iyayi ye, a deghẹ rẹn ọkpa wa nọ ighẹ iwinna i rrọọ, orinmwi nọ.

¹⁸ Sokpan orhiọnkpa sẹtin kha wẹ, “Wẹ mwẹ iyayi, mẹ mwẹ iwinna.” Ewanniẹn mwẹ ọrọre wẹ, “Tama mwẹ vbene u gha sẹtin gha mwẹ iyayi hẹẹ vbene iwinna ina rrọọ, mẹ gha ya iwinna rhie iyayi mwẹ ma ruẹn.”

¹⁹ Wẹ yayi wẹ, Osanobua ọkpa kẹkan ọre ọ rrọọ, ọ wa maa. Avbe orhiọn dan vbe yayi, te iran ye guọ zẹzẹzẹ ba ẹmwẹ ohan.

²⁰ Akpa! Te u ho ne a rhie maa ruẹn wẹ, iyayi, vbe ne iwinna ina rrọọ i ghẹ ẹ i mwẹ esa.

²¹ Vbe a ya ye Ebraham ne erha mwa odede khian ne ọ mudia ẹse vbe odaro Osanobua hẹ yi? Rhunmwuda emwi ne ọ ru nọ, ne ọ na ya Aizik ne ovbi ẹre zọ ese vbe uhunmwu aka.

²² A deghẹ u miẹn ọẹn? Iyayi ẹre, kevbe iwinna rẹn keghi ku obọ gbe, iwinna rẹn ọre a ya ya iyayi ẹre khian ne ọ gbae.

²³ Ebe nii keghi do sẹ ne ọ khare wẹ “Ebraham ya Osanobua yi, rhunmwuda iyayi ẹre, Osanobua keghi rhan obọ miẹn rẹn zẹ vbe ọmwata.” Osanobua keghi vbe tie ẹre “Ebraham ne ọse mwẹ.”

²⁴ Rhunmwuda ọnii, u gha miẹn nian wẹ, emwi ne ọmwa ru, ọre a ya kae ye ne ọ mudia ẹse vbe odaro Osanobua, ighẹ ẹ i re rhunmwuda iyayi ọkpa.

²⁵ Erriọ ọghe Rehab ne ebabotu vbe gha ye. Emwi ne ọ ru ọre a ya ka ẹe ye ne ọ mudia ẹse vbe odaro Osanobua, ne ọ na miẹn iran yi ighẹ emwa ne avbe Ju giẹre uhunmwu, ne ọ na ma iran odẹ ọvbehe la gha rrie.

²⁶ Rhunmwuda, zẹ vbene egbe ne orhiọn i ye, re orinmwi, erriọ zẹẹ, iyayi ne ẹ i mwẹ iwinna, orinmwi nọ.