Jems 1 - Edo Bible (E Baibol Ẹdo) Version 1996

¹ E Jems ne ọguọmwadia Osanobua, kevbe ọghe Nọyaẹnmwa Jesu Kristi; ọre ọ gbẹn ebe na rre. I tuẹ emwa Osanobua hia ni tagha gba uhunmwu otọ agbọn hia.

Iyayi Kevbe Ẹwaẹn

² Etẹn mwẹ, a deghẹ edanmwẹ ughughan ghi vba uwa, wa ghi gha ka egbe uwa ye ne uhunmwu ẹnrẹn maa.

³ Rhunmwuda, wa rẹnrẹn wẹ, iyayi uwa gha sẹtin ya egbe miẹn edanmwẹ vberriọ, emwi ne a la ẹe miẹn ọrọre ẹbo iziengbe.

⁴ Sokpan wa ghi gie a miẹn wẹ, te uwa wa mwẹ i ziengbe nii sẹ ota, vbe ne a i na de yọ, ne uwa miẹn ehe na gha re ne ọ fo na, vbe ne a i na miẹn ehe ne ọ kẹe yi.

⁵ Sokpan deghẹ a miẹn ne ẹ i mwẹ ẹwaẹn vbe uwu uwa, wẹ ne ọ na erhunmwu ghe Osanobua, ne ọ gha rhie ẹre nẹẹn, rhunmwuda, ọwọrhọwọrhọ ọre Osanobua viọ emwi ne emwa hia.

⁶ Sokpan, u gha na erhunmwu, u ghi yayi vbe ne a i na ba iro eva hiehiere, rhunmwuda, ọmwa ne ọ ba iro eva, te ọ yevbe ihu okun ne ẹhoho mu yo mu rre.

⁷ We ọmwa vberriọ ghẹ ro ighẹ, Nọyaẹnmwa gha rhie emwi rhọkpa nẹẹn.

⁸ Rhunmwuda, ọmwa ẹkẹ vbe iwẹnwẹn nọ, emwi ne ọ ru hia, ọkpa ne ọ mu ẹre ugbamugba ne ọ vbe mu aro yi, ẹ i rrọọ.

Ogue Kevbe Ẹfe

⁹ Ọtẹn ne ọ re ovbiogue, a deghẹ Nọyaẹnmwa ghi vbe tọn ẹn mu, wẹ ne ọ gha ghọghọ.

¹⁰ Erriọ vbe nọ ne ọtẹn ne ọ fe, a deghẹ Nọyaẹnmwa ghi vbe si ẹe kẹ otọ. Rhunmwuda, ọmwa ẹfe gha fafaa zẹ vbene obobo ne ọ rre uwu oha.

¹¹ Ovẹn ghi yan rre ke ẹe kevbe owowo ẹre ne ọ giẹn emwi ruan, ọ ghi giẹn ovbi erhan nii uan, obobo ẹre ghi kha kha kua, ose ẹre ghi la ọ rhiae rrie. Erriọ vbe nọ ọmwa ne ọ fe gha vbe la ọrhiae rrie, vbe uwu ehe ne ọna ru emwamwa iwinna rẹn.

Ne A Rhuan Ghe Kevbe Ne A Danmwẹ Ghe

¹² Afiangbe nọ ne ọmwa ne ọ ziẹn egbe vbe a gha danmwẹ ọẹn ghe, rhunmwuda a deghẹ ọ ma rrie edanmwẹ, ọ gha miẹn arrọọ rhie zẹ vbe ne Osanobua ve iran ni ho ẹmwẹ ọnrẹn re.

¹³ A deghẹ a ya egbe edanmwẹ vberriọ rhuan ọmwa ghe, wẹ ne ọ ghẹ gha kha wẹ, “Obọ Osanobua edanmwẹ na ke rre.” Rhunmwuda a i sẹtin ye ọkhọ danmwẹ Osanobua ghe, rẹn tobọ ẹre i vbe danmwẹ ọmwa rhọkpa ghe.

¹⁴ Emwi dan ne ọmwa ho ghẹ ghi bi ẹre uhunmwu fua nẹ, i ghẹ ifi ẹre ghi mu ẹn nẹ, ẹghẹ ni, ọ ghi de fi uwu edanmwẹ.

¹⁵ Emwi dan ne ọ ho ghẹ ghi hanmwa nẹ, ọ ghi biẹ orukhọ, orukhọ ghẹ ghi wan nẹ, ọ ghi biẹ uwu.

¹⁶ Wa ghẹ gia rẹrẹ uwa re etẹn mwẹ ni ghan.

¹⁷ Emwi ne ọ gbae, ne ọ maa, ne a ya we ọmwa hia, ke ẹrinmwi rre nọ. Obọ Osanobua ne Ayi ne ọ yi uwanmwẹ ẹrinmwi, ọ re ọ ke rre. Rẹn i fi werriẹ, ra ne ọ vbe la ekpa a fiwerriẹ si ebiebi.

¹⁸ Ekhọe obọ ẹre ọre ọ ya la ekpa ẹmwẹ ẹmwata yi ima, ne ima miẹn ehe na gha rre ukpo ne okaro vbe uwu ẹbu avbe emwi ne ọ yi hia.

Ne A Họn Kevbe Ne A Ru Ẹe

¹⁹ Wa ghi ye ọna rre o, wa ne etẹn mwẹ ni ghan, Dọmwadẹ ọghọe, vbe uwu uwa, wa ghi gha re ne ọ rherhe danmwehọ ẹmwẹ, sokpan ne ẹ i rherhe guan, kevbe ne ẹ i rherhe mu ohu.

²⁰ Rhunmwuda, izohu ọmwa ne agbọn i mwẹ ehe ne ọ na gie emwamwa nọ maa ọghe Osanobua mwẹ uhunmwu.

²¹ Rhunmwuda ọnii nian, wa zobọ vbe avbe uyinmwẹ iruẹn, ne ọ maghan ọmwa kevbe uyinmwẹ dan hia, wa zẹ egbe obọ ne Osanobua, ne uwa vbe rhan obọ miẹn ẹmwẹ ne ọ kọ ye uwa ekhọe, ne ọ gha sẹtin miẹn uwa fan.

²² Wa ghẹ do egbe uwa ọzuọ vbe ekpa ne uwa gha na gha ya ehọ viọ ẹmwẹ ọnrẹn kẹkan. Sokpan wa ya ẹe gha ru emwi.

²³ Rhunmwuda, ọmwa ne ọ danmwehọ ẹmwẹ ọnrẹn kẹkan, vbe ne a i na ya ẹe ru emwi, te ọ ye vbe ọmwa ne ọ mu ughegbe ya ghe, ọ keghi bẹghe egbe ẹre vbe uwu ẹre.

²⁴ Ọ fi aro mu ẹn nẹ, ọ keghi kpao, vbe ọwarọkpa nii, ọ keghi mianmian vbene irẹn khọe.

²⁵ Sokpan, ọmwa ne ọ gbe aro ke otọ ghe uhi ne ọ gbae ne ọ ya ọmwa khian nọyan egbe ẹre, ne ọ rhie ẹre ye ekhọe vbe ẹghẹ hia, ighẹ ẹ i re ne ọ gha danmwehọ nẹ, ọ mianmianẹn, sokpan ne ọ ya ẹe ru emwi, Osanobua gha fiangbe ọmwa vberriọ vbe emwikemwi ne ọ rhirhi gha ru.

²⁶ Deghẹ ọmwaikọmwa ro ighẹ ọmwa ne ọ mwẹ iyayi rẹn khin, a deghẹ ẹ i rhie aranmwẹ kọ ẹho guan, iyayi ẹre i mwẹ esa.

²⁷ Emwi ne Osanobua ne Erha tie ẹre iyayi ẹmwata ne ọ gbae ọre ọna khin, ne a gha koko avbe emọ ne ẹ i mwẹ erha kevbe ikhuo ni de ẹgbẹ vbe uwu usẹ ne iran ye, kevbe ọmwa bi egbe, ne agbọn na ghẹ mu ẹn rhia.