I Timoti 6 - Edo Bible (E Baibol Ẹdo) Version 1996

¹ Ọ kere ne avbe eviẹn ọmwa hia gha rẹn wẹ, arowa iran khẹke ne a ya ọghọ na, ne ọmwaikọmwa ghẹ zan eni Osanobua mwa kevbe emwi ne ima ma emwa ẹre.

² Eviẹn ọmwa ne arowa ẹre re ọmwa ne ọ yayi, wẹ ne iran ghẹ miẹn iran fo rhunmwuda ighẹ etẹn iran khin, sokpan te ọ kere ne iran gha ga iran sẹ ayọ, rhunmwuda emwa ne ọ rri ere iwinna ne iran winna keghi vbe re emwa ni yayi ne iran ho ẹmwẹ ọnrẹn. U ghi ye emwi na kpe orhu, u ghi vbe ya ẹe gha ma emwa emwi.

Iruẹmwi Ohoghe Kevbe Ẹfe Ẹmwata

³ Ọmwa ne ọ rhirhi ma emwa emwi ọvbehe, ne ọ ma gu ẹmwẹ ẹmwata ọghe Nọyaẹnmwa Jesu Kristi kevbe iruẹmwi iyayi mwa ro.

⁴ Uhiomwẹ ọre orhu ẹre aro, ọma rẹn emwi rhọkpa. Ẹmwẹ akuọkan ne a muan ye vbene a ta ẹe hẹ, ọre ọ rre ọre aro, ọna ọ si oya ọmwa da ọmwa rre kevbe ẹzọ, kevbe ihẹn ne a tie ne egbe, kevbe a i ghi gba ẹko egbe.

⁵ Igbeagbanmwẹ ne iran muhẹn ighẹ emwa ne ekhọe ẹre sohie nẹ, ẹmwata i ghi vbe rre iran unu. Iran ro ighẹ iyayi, emwi ne a ya gualọ igho ọre nọ.

⁶ Ẹmwata nọ wẹ iyayi sẹtin zẹ ẹfe ku ọmwa, a deghẹ ọ gie emwi ne ọ mwẹ sẹ ọre ọkẹn.

⁷ Ma ma rhie emwi rhọkpa rrie agbọn na, ma i vbe sẹtin rhie emwi rhọkpa kọe ladian.

⁸ Rhunmwuda ọnii, a deghẹ a miẹn evbare gha re, a na vbe miẹn ukpọn gha rhie rhuan, wa gie ẹko ọnii vuọn mwa.

⁹ Sokpan iran ni ho ne iran fe, edanmwẹ ọre iran de yi, ifi orriarria ukọnmwẹ ne ẹbe ye ni bun ghi mu iran, emwi na ọre ọ sua emwa fi uwu ọfuan kevbe ne ọ gbe ẹro.

¹⁰ Rhunmwuda aho ẹmwẹ igho ọre emwi dan ughughan ke zọ ladian. Ẹmwẹ ne a gha mwẹ ọnrẹn mu emwa eso sẹrriọ wẹ, te iran ghi fi iyeke gbe iyayi, iran keghi ya akhiẹ ni bun guọghọ ekhọe iran uan.

Ude Egbe Ọmwa

¹¹ Sokpan wẹ ne ọmwa Osanobua, gha lẹ ne avbe emwi na hia. Gha ziga gualọ ẹmwata, uyinmwẹ ne ọ khẹ ọghe Osanobua, iyayi, aho ẹmwẹ ọmwa, i ziengbe kevbe ufumwẹ.

¹² Ye ẹtin ruẹn hia rhulẹ vbe ulẹ iyayi na, ne u ya obọ ruẹ khọn mu ẹfe etẹbitẹ, rhunmwuda, arrọọ vberriọ ọre Osanobua tie ruẹ yi, vbe ẹghẹ ne u na tobọ ruẹ ye unu miẹn kue, vbe sirra osẹe ni bun.

¹³ Vbe odaro Osanobua ne ọ rhie arrọọ ne emwi hia, kevbe odaro Kristi Jesu, ọmwa ne ọ vbe miẹn iyayi ẹre kue gbangbaangban vbe odaro Pọntiọs Pailet, te I yi iyi nuẹn.

¹⁴ Gha ya iyi na ru emwi u ghi dae yi mwẹ vbe ne ẹ i mwẹ ozan, vbe ọ te sẹ Ẹdẹ ne Nọyaẹnmwa Kristi Jesu gha ye egbe ladian.

¹⁵ Osanobua gha ruẹe ne ọ ye egbe ladian, vbe ẹghẹ ne ọ kei yi, rẹn ne ọ re Nọkhaemwisẹ ọkpa kẹkan, ne a fiangbe. Ọba iran ne ọba kevbe Nọyan iran ne ni yan ẹvbo.

¹⁶ Rẹn ọkpa kẹkan ọre ne ẹ i wu ẹdẹ, ne ọ rre uwu uwanmwẹ ne ẹ i gie a ghe. Ọmwa ne ọmwa ọkpa ma he ye aro kan, kevbe ne ọmwaikọmwa i sẹtin miẹn ọre aro, ọghọe ọre uyi khin deba ẹtin etẹbitẹ. Isẹ.

¹⁷ Tama iran ni fe vbe emwi agbọn na wẹ, ne iran ghẹ tọn egbe mu, kevbe wẹ, ne iran ghẹ mu ẹtin yan egbe emwi ne ọ mu yo mu rre vbe ne ẹfe ye, sokpan ne iran mu ẹtin yan Osanobua, ọmwa ne ọ viọ emwi hia ne ima wọrhọwọrhọ ne a ya gha zọmọ.

¹⁸ Tama iran, ne iran gha ru emwi esi, ne iran gha re ni fe vbe emwi esi ne a ru, ne iran gha zẹ emwi obọ, ne iran vbe mu egbe ne iran gha ya ghae ne emwa ọvbehe.

¹⁹ Odẹ vbenian ọre iran gha na si koko ne egbe iran, emwi ewe ne ọ gha re ẹyotọ ne ọ deziẹn, ne iran ẹdẹ ne akhuẹ. Ẹghẹ nii, iran gha sẹtin khọn miẹn arrọọ ọghe ẹmwata.

²⁰ Timoti ye obọ da ẹe yi vbe ne a i na mwẹ ẹbe, ighẹ emwi ne a ka ye uẹ obọ. Ghẹ mwẹ obọ vbe ọta ne ẹ i mwẹ emwi ne ọ khọ ọghe Osanobua, kevbe imuaẹmwẹ ukọnmwẹ, egbe emwi ne emwa ukọnmwẹ tie ẹre “Irẹnmwi.”

²¹ Rhunmwuda emwa eso wẹ iran mwẹ ọnrẹn, emwi ne ọ ghi si ye iran egbe ọrọre wẹ, iran keghi bibi odẹ hin iyayi rre. Te ẹsọhẹ Osanobua gha gu uwa hia gha rrọọ.