I Timoti 5 - Edo Bible (E Baibol Ẹdo) Version 1996

Emwi Ne A Gha Ru, Ne Emwa Niyayi

¹ Ghẹ gu ọmwa ne ọwan sẹ ruẹ gui, sokpan heko gu ẹe guan vbene a miẹn wẹ erha a nọ. Gha ya obọ mu iran ne u wan sẹẹ, zẹ vbe etuẹn ne ikpia,

² avbe ikhuo ni wan sẹ ruẹ, zẹ vbe iye, ikhuo ne u wan sẹ, vbe etẹn ne ikhuo, gha gu iran yi uyinmwẹ ne ọ ma gbe iruẹn.

³ Gha ya oghẹ ne avbe ikhuo ni de ẹgbẹ ni re ẹgbẹ ne ẹgbẹ.

⁴ Sokpan, a deghẹ ẹgbẹ mwẹ emọ iwu ra eyẹ, gie iran ka ruẹ ne iran gha yin uyinmwẹ emwa ni yayi ghe emwa iran nẹ, odẹ vberriọ ọre iran gha ya san evbibiẹ iran ke evbibiẹ iran ẹse, rhunmwuda, ọnii ọrọre emwi ne ọ yẹ Osanobua.

⁵ Okhuo ne ọ re ẹgbẹ ne ẹgbẹ, ne ẹ i mwẹ ọmwa ne ọ gbe aro ghe ẹre, aro Osanobua ọkpa ọre ọ ghi ghe, ọ ghi gha na erhunmwu, ọ ghi gha nọ iyobọ vbe obọ ẹre asọn kevbe avan.

⁶ Sokpan, okhuo ẹgbẹ ne ọ rhie egbe ẹre ye ne ọ gha zẹ ọwọbu, ọ wu nẹ, egbe ne ọ he rhe ya rre agbọn.

⁷ U ghi rhie iyi na ma iran, ne ọmwaikọmwa ghẹ miẹn ehe na zan iran.

⁸ Sokpan, a deghẹ ọmwaikọmwa ma gbe aro ghe emwa rẹn, kpataki iran ni re etẹn ọnrẹn, ọ fi iyeke gbe nene iyayi nẹ, ọ wa rhia sẹ ne ọ ma yayi.

⁹ Ghẹ gbẹn eni ẹgbẹ ba ọghe avbe ẹgbẹ, sokpan amawẹ ọ sẹ ọmọ ukpo iyeha nẹ. Yevbe sẹ ọnii, a ghi miẹn wẹ owa ọdọ ọkpa kẹkan ọre ọ he yo.

¹⁰ A ghi vbe gha so eni ẹnrẹn ẹse ye uyinmwẹ ne ọ maa, okhuo nọ koko ivbi ẹre ẹse, ne ọ miẹn avbe orhunmwuyẹn yi vbe owa ẹre, ne ọ vbe kpe emwa Osanobua owẹ, ne ọ vbe ye iran ni rre uwu ọlọghọmwa obọ, ne ọ vbe rhie egbe ye ne ọ gha winna iwinna ni maa hia.

¹¹ Sokpan ghẹ gbẹnnẹ eni avbe ẹgbẹ ni re ibiẹka ba ne usun, rhunmwuda ẹmwẹ ọdọ na rọnmwẹ gha la iran uhunmwu nẹ, iran ghi fi iyeke gbe Kristi.

¹² Ẹghẹ nii, iran ghi do rri abe ọghe ne iran ma na mu eyan ne iran ka gu ẹe yan sẹ.

¹³ Iran ghi vbe gha mu ẹghẹ rhia, vbe ne iran na ke owa ọkpa la ọvbehe, ne ọ ghi wa rhia sẹ vbọ ọrọre wẹ, iran ghi gha re ne ọ na iyẹn ẹrrẹe, arraile, iran ghi gha mu ukpẹ ye ẹmwẹ ne ọ ma khẹ ke iran.

¹⁴ Rhunmwuda ọnii, emwi ne I ho ọrọre wẹ ne avbe ẹgbẹ ni re ibiẹka gha rọnmwẹ ọdọ, ne iran biẹlẹ, ne iran gbe aro ghe owa iran, ne a ghẹ rhie otọ ne iran ne eghian mwa ya gha zan mwa.

¹⁵ Rhunmwuda, avbe ẹgbẹ eso fi egbe werriẹ nẹ, iran lele Setan.

¹⁶ Sokpan, adeghẹ okhuo iyayi mwẹ ẹgbẹ eso vbe uwu avbe etẹn ọnrẹn, wẹ ne ọ gha gbe aro ghe iran, ne ọ ghẹ vbe ya ye esọsi egbe, ne ọ miẹn ehe na miotọ ya gha gbe aro ghe avbe ẹgbẹ ni re rẹn ọkpa vbe ẹhi ẹre.

¹⁷ Avbe ediọn ni winna iwinna esi, zẹ vbe ọkaolotu, ọ kere ne a gha ka iran ye emwa ne ọ ke re ne ọ miẹn igho ukhukhu eva, kpataki iran ni winnaẹn ẹsẹse vbe orhu ne a kpe kevbe emwi ne a ma emwa ẹre.

¹⁸ Rhunmwuda, ebe khare wẹ, “Ghẹ rro ekagha ye ẹmila nọ wiẹn ọka unu,” kevbe wẹ, “Igho ne ọmwa ne ọ winna miẹn, khẹ kẹe.”

¹⁹ Ghẹ zẹ yọ vbe emwa ra do gu ediọn gui ma ruẹn, sokpan a ma wẹ, ọ sẹ arhin eva ra eha ne ọ do gui nene ẹzọ.

²⁰ Gu ọmwa ne ọ ru khọ gui vbe sirra emwa hia ne emwa nekpa miẹn ehe na gha mwẹ imuohan.

²¹ Vbe sirra Osanobua kevbe Kristi Jesu, kevbe avbe odibo Osa ni huranrẹn, I ya imuegberriotọ tama ruẹn, ne u gha ye avbe ẹmwẹ na ru emwi vbe ne a i na zẹ ọmwa ẹkpe, ra ne a gha ghe ọmwaikọmwa ikpanro vbe uwu emwi ne u ru hia.

²² Ghẹ tua viọ obọ yan ọmwaikọmwa uhunmwu, ye iwinna Nọyaẹnmwa, ghẹ mwẹ obọ vbe orukhọ ẹrrẹe, da egbe ruẹ yi vbe ne a i na mwẹ iruẹn.

²³ Ẹ i re amẹ ọkpa ọre u gha gha wọn, sokpan vbe gha da ayọn kherhe, ne ọ miẹn ehe ne gha dọlọ ruẹ ẹko yi, rhunmwuda ne u na huehue vbe ẹghẹ hia.

²⁴ Orukhọ emwa eso i lọghọ urẹnmwẹ, orukhọ iran ghi vbe fian ke aro ne iran, gha rrie owa ibuohiẹn, sokpan, okiekie ọre a ya miẹn orukhọ emwa ọvbehe eso.

²⁵ Erriọ vbe nọ zẹ, uyinmwẹ esi, te ọ wa de we aro ua, uhin avbe ne a i rherhe rẹn ni rrọọ, iran i vbe gia rhie lẹre.