I Timoti 4 - Edo Bible (E Baibol Ẹdo) Version 1996

Emamwaemwi Ohoghe

¹ Te Orhiọn wa ta ẹe gbe ẹe ẹre ẹho rua wẹ, ọ gha sẹ ẹdẹ okiekie, emwa ni bun gha mu iyayi fua, iran ghi gha ru ne orhiọn ohoghe khare kevbe iruẹmwi esu.

² Obọ avbe ọhọn ohoghe ni mu emwa rẹrẹ, ọre iruẹmwi na ke rre, emwa ne ekhọe ẹre gbin vbe ne a miẹn wẹ te a mu ematọn ye erhẹn ya tọn ẹn.

³ Emwa na ọre ọ ta ẹe khian wẹ, ọ ma kei ne a gha rhie okhuo, ọ ma kei ne a gha rri evbare eso. Sokpan te Osanobua yi avbe evbare na ne avbe emwa ni yayi, ni vbe rẹn ẹmwata nẹ, ne iran gha rri ọẹ vbe iran a ghi na erhunmwu ekpọnmwẹ yọ nẹ.

⁴ Emwi ne Osanobua yi hia ọre ọ maa, ọkpa ne avbe rhie fua ẹ i rrọọ, sokpan, erhunmwu ekpọnmwẹ ọre ọ kere ne a ya gha miẹn iran.

⁵ Rhunmwuda, ẹmwẹ Osanobua kevbe erhunmwu, ya ẹe khian ne Osanobua rhan obọ miẹn nẹ.

Ọguọmwadia Ẹmwata Ọghe Kristi Jesu

⁶ U ghi ma avbe etẹn emwi na, u ghi gha re ọguọmwadia ne ọ maa ọghe Kristi Jesu, vbene u na ya ẹmwẹ iyayi na, kevbe iruẹmwi ẹmwata ne uka lele khian, koko egbe uẹ, vbe ekpa ọghe orhiọn.

⁷ Sokpan, u ghi gha lẹ ne umaranmwẹ ne ẹmwata Osanobua i ye nii, emwi ne ọ ma kei ne a gha ta. Tobọ gha ma egbe uẹ emwi ye uyinmwẹ vbe ọghe Osanobua.

⁸ Egbe ne a ya sa ekhae, vbe maa, sokpan odẹ hia ọre isekhae ọghe orhiọn na maa, rhunmwuda, a rẹnrẹn ighẹ a gha la ẹe miẹn arrọọ, vbe ẹghẹ na kevbe ẹghẹ ne ọ dee.

⁹ Ẹmwẹ ẹmwata ọna khin, ne ọ kere ne a wa rhan obọ miẹn kevbe ne a yayi.

¹⁰ Ọna si ẹe ne ima na domian, kevbe ne a na kakabọ winna, rhunmwuda, ọghe Osanobua ne ọ rrọọ ọre idanmwehọ mwa ye, ọmwa ne ọre Ọmiọnmwafan emwa hia, kpataki iran ni yayi.

¹¹ Gha yi avbe emwi na iyi, ne u vbe gha ma emwa ẹre.

¹² Ghẹ gie ọmwarhọkpa ye aro tila ruẹ a rhunmwuda ighẹ ọvbokhan u khin, sokpan gha re igiemwi ne eni yayi hia, vbe ẹmwẹ ne u guan, uyinmwẹ ruẹn, aho ẹmwẹ ọmwa ruẹn, iyayi kevbe a i mwẹ iruẹn.

¹³ Kakabọ rhie ẹghẹ ne u mu egbe ye ẹmwẹ Ebe ne a tie ma emwa vbe I te rre, ke ẹe kevbe orhu ne a kpe, kevbe emwi ne a ma emwa ẹre.

¹⁴ Ghẹ ya emwi orhiọn ne a ya wuẹ rhọ eghẹrẹ, ne a rhie nuẹn ẹghẹ ne a vbe akhasẹ na guan kevbe ne avbe ediọn na viọ obọ yan ruẹn uhunmwu.

¹⁵ Gha ya avbe emwi na rue emwi, ne u vbe zẹ egbe ruẹ obọ ne iran, ne alaghodaro ruẹ miẹn ehe na gha re ne aro emwa hia sẹẹ.

¹⁶ Gha rhuan egbe ne u vbe gha ya emwi ne u ma emwa ẹre ẹro. Gha ru avbe emwi na khian, rhunmwuda, u gha ru vberriọ, u gha miẹn egbe ruẹ kevbe iran ni danmwehọ ruẹ fan.