I Timoti 3 - Edo Bible (E Baibol Ẹdo) Version 1996

Avbe Olotu Esọsi

¹ Uhunmwu ẹmwẹ ọre ẹmwẹ na khin: A deghẹ ọmwa ho ne ọ gha re ọkaolotu esọsi, iwinna esiesi ọre ọ ho.

² Ọ kere ne Ọkaolotu esọsi gha re ọmwa ne ẹ i mwẹ abaku ru, ọ ghi gha mwẹ okhuo ọkpa kẹkan, ọ ghi gha re ọmwa ne aro hianrẹn, kevbe ne ọ rẹn enegbe, kevbe ne ọ ru emwi uhẹn uhẹn, ọ ghi gha miẹn avbe erhunmwuyẹn yi vbe owa ẹre, ọ ghi sẹtin gha ma emwa emwi.

³ Ọ ma kei ne ọ gha re ọdayọn ra ne ọ fian ọkpannike, sokpan, ọ ghi gha re ọmẹhẹ kevbe ne ẹ i ho ẹmwẹ, ọ ma ke ne ọ gha ho ẹmwẹ igho.

⁴ Ọ ghi sẹtin gha gbe aro ghe owa ẹre ẹse, ọ ghi ye avbe ivbi ẹre gha ya ọghọ họn ẹmwẹ nẹẹn.

⁵ Rhunmwuda, a deghẹ ọmwa ma sẹtin gbe aro ghe owa ẹre, vbe ọ ra na sẹtin gbe aro ghe esọsi Osanobua hẹẹ?

⁶ Ọ ma kei ne ọ gha re ọmwa ne ọ da yayi, ne a ghẹ miẹn ighẹ te ọ ghi tọn egbe mu, a ghi ya bu abe gbe ẹe zẹ vbene ọghe Esu gha ye.

⁷ Ọ kere ne ọ gha re ọmwa ne emwa hia nii yo esọsi ya ọghọ na, ne a ghẹ ya fa ẹre ua ne ọ ya de ye ifi Esu.

Iran Ni Ru Iyobọ Vbe Uwu Esọsi

⁸ Iran ni ru iyobọ vbe esọsi, ọ kere ne iran vbe gha mwẹ uyinmwẹ esi kevbe ne ọre ọ ghe ẹmwata, ọ ma kei ne iran gha da ayọn gbe, ra ne iran gha zuan.

⁹ Iran ghi ya ekhọe ne ọ ma bu ohiẹn gbe egbe ẹre da ẹmwata ne a rhie ke uwu iyayi ladian yi.

¹⁰ A ghi ka danmwẹ iran ghe nẹ, a deghẹ iran ma rri edanmwẹ, iran ghi gha winna.

¹¹ Amwẹ iran ghi vbe gha re emwa ni mwẹ uyinmwẹ esi, i ghẹ ẹ i re ne ọ na iyẹn ẹrrẹ, iran ghi gha re ne aro hianrẹn, kevbe ne ọ mudia ye odẹ ẹmwata vbe emwi hia.

¹² Ọmwa ne ọ ru iyobọ vbe uwu esọsi, okhuo ọkpa ọre ọ kere ne ọ gha mwẹ, ọ ghi gha gbe aro ghe egbe kevbe ivbi ẹre ẹse.

¹³ Iran ni winnaẹn ẹse, ukpo esiesi iran rhie egbe iran yi, iran sẹtin gha da kha vbe ẹmwẹ ne ọ dekan iyayi, ne ọ re ọghomwa vbe uwu a ye egbe ba Kristi Jesu.

Oro Nọkhua

¹⁴ Vbene I wa gbẹn ebe gie uwa na, I mwẹ ọnrẹn vbe ekhọe ighẹ I gha rherhe do miẹn uwa aro.

¹⁵ Sokpan deghẹ I ma ghi rherhe rre, ebe na gha gie uwa rẹn vbene ọ kere ne ima gha mu egbe yi hẹ vbe uwu igiowa Osanobua, ne ọre esọsi ọghe Osanobua ne ọ rrọọ, orre kevbe okpo ọghe ẹmwata.

¹⁶ Ọmwa ne ọ gha sẹtin muan rẹn ẹ i rrọọ ighẹ ẹmwẹ oro nọkhua ọghe iyayi mwa: Rẹn rhie egbe ma zẹ vbe ọmwa kẹkan, a miẹn ọẹn vbe ọghe Orhiọn wẹ ọmwata nọ, avbe odibo Osa vbe miẹn ọẹn. A kpe orhu ẹre vbe avbe uhunmwu ẹvbo, a ya ẹe yi vbe otọ agbọn hia, a keghi tọn ẹn mu gha rrie ẹrinmwi.