I Timoti 2 - Edo Bible (E Baibol Ẹdo) Version 1996

Ugamwẹ Vbe Esọsi

¹ Ke odaro ehia, I tua unu mu ẹn ta ẹe wẹ, ne a gha rinmwian, ne a gha na erhunmwu, ne a gha vbu vbe obọ ẹre, kevbe ne a gha rhie ekpọnmwẹ ne Osanobua ne emwa hia.

² Ne avbe ọba kevbe emwa hia ni rre ọdakha, ne ima miẹn ehe na gha lo ẹdẹ mwa vbe ne khuẹrhẹ kevbe ọfumwegbe, vbe uwu a rẹn Osanobua kevbe uyinmwẹ ne ọ gbae.

³ Ọna maa, ọwa vbe yẹ Osanobua ne Ọmiọnmwafan mwa.

⁴ Ọmwa ne ọ ho ne emwa hia fe, ne iran vbe do rẹn ẹmwata nii.

⁵ Rhunmwuda Osanobua ọkpa ọre ọ rrọọ, ọmwa ọkpa ọre ọ vbe rrọọ, ne ọ dọlọ Osanobua kevbe emwa ne agbọn kugbe, ọnii ọre ọmwa na ighẹ Kristi Jesu.

⁶ Ọmwa ne ọ ye egbe ẹre dẹ emwa ne agbọn hia werriegbe, ọnii ọre ama ne aro ya dae ẹe, vbe ọwa sẹ ẹghẹ ọre zẹẹ, wẹ Osanobua ho ne emwa hia miẹn imiẹnfan.

⁷ Ọna ọre ọ vbe zẹ ne a na gie mwẹ zẹ vbe ukọ kevbe ọmamwaemwi avbe iran ne ẹ i re Ju, ne I ya gha kpe orhu iyayi kevbe ẹmwata. Ẹ i re ohoghe I ta, ẹmwata I ta.

⁸ I ho ne ikpia hia gha na erhunmwu vbe ehe hia, emwa ni ye egbe yan Osanobua, emwa ni gha sẹtin viọ obọ iran da odukhunmwu vbe ne a i na mu ohu kevbe ne a i na muan ẹmwẹ.

⁹ I vbe ho ne ikhuo gha ru emwi ye oreghe, kevbe ne iran gha waan vbe ekpa ukpọn ne iran rhuan, kevbe ne iran gha mu egbe ẹse, ẹ i re eto ọghe wa do ghe ne a mẹ, ra igoru ne a ya te egbe, ra ikpẹrọmwọ ra ukpọn aghanghan.

¹⁰ Sokpan, ọ ghe uyinmwẹ ne ọ maa zẹ vbe ne ọkere ne ikhuo ni khare ighẹ emwa iyayi ọre iran khin.

¹¹ Ọ kere ne ikhuo gha ya a hunwan kevbe a mu egbe rri otọ ruẹ emwi.

¹² I ma kue ne ikhuo gha ma emwa emwi ra ne iran gha kha yan ikpia. Te ọ khẹke ne iran gha hunwan.

¹³ Rhunmwuda, Adam ọre a ka gha yi, vbe iyeke ọnii, Ivi.

¹⁴ Sevba, ẹ i vbe re Adam ọre a mu rẹrẹ, sokpan okhuo ne ọ rrọọ ọre a mu rẹrẹ, ọ na vbe rra iyi Osanobua.

¹⁵ Sokpan, a gha miẹn okhuo fan vbe ekpa ne ọ gha na gha mwẹ emọ, a deghẹ ọ ziengbe vbe iyayi kevbe aho ẹmwẹ ọmwa, kevbe uhuanmwẹ deba a ru emwi ye oreghe.