I Samuẹl 9 - Edo Bible (E Baibol Ẹdo) Version 1996

E Sọl Kevbe Samuẹl Miẹn Egbe

¹ Okpia ọkpa kegha rre ẹwae ọghe Bẹnjamin, a keghi tie ẹre Kis, ovbi Abiẹl, eyẹ e Zẹrọ, ẹgbẹe Bakorat vbe uniẹn Afia. E Kis kegha re ọmwa ne ọmwa igho, ọ keghi vbe hin usi.

² Ọ kegha mwẹ ọmọ okpia ọkpa ne a tie ẹre Sọl, ọ kegha re ẹghele ne ọ mose ẹsẹse. Ọ ye ibata ọkpa tan sẹẹ, ọ kevbe mose sẹ emwa hia ni rre Izrẹl.

³ Ẹsin e Kis eso keghi wii, rẹn na rhunmwuda onii tama e Sọl wẹẹ, “Rhie ọguọmwadia ọkpa ba egbe ne u ya gualọ avbe ẹsin mwẹ.”

⁴ Iran keghi la Ifreim ne ẹvbo oke fo, kevbe ako otọ Sialisia, sokpan iran ma miẹn iran. Iran na vbe ya sẹ otọ Sialim, sokpan, avbe ẹsin i vbe rre evba. Iran na vbe ye otọ Bẹnjamin, sokpan, iran ma ye miẹn iran.

⁵ Iran ghi sẹ otọ Zuf, e Sọl keghi tama ọguọmwadia ẹre wẹẹ, “Gie ima gha rrie owa, ne a ghẹ miẹn wẹ ẹ i re igbinna ẹsin erha mwẹ ghi ye, ọ ghi do gha hawa yo hawa rre ba ẹmwẹ ima.”

⁶ Ọkpọmwa nii keghi wanniẹn wẹẹ, “Mudia nẹ o! Okpia nọwanrẹn ọkpa rre ẹvbo na, te emwa hia wa ya ọghọ ne ẹẹn, rhunmwuda, ẹmwẹ ne ọ rhirhi ta, te ọ gha sunu. Gie ima bu ẹre, u gha ghe, ọ gha sẹtin tama ima ehe ne ima gha na miẹn ẹsin na.”

⁷ E Sọl kegha kha wẹẹ, “Ma gha bu ẹre gha khian, de emwi ne ima gha rhie ne ẹẹn? Evbare ma ghi kẹe vbe ẹkpo ima. Ma i mwẹ emwi ọkpa kẹkan ne a ra rhie ne ẹẹn ra ọ rrọọ?”

⁸ Ọguọmwadia nii keghi kha wẹẹ, “I mwẹ ikọbọ ne i gha rhie ne ẹẹn, ọ ghi vbe tama ima ehe ne ima gha na miẹn iran.”

^9-11 E Sọl keghi wanniẹn wẹẹ, “Iro esi u zẹẹ! Gie a gha khian.” Ẹre iran na gha rrie ẹvbo ne ọmwa ne ọ huanrẹn nii ye. Iran ghi mu oke hin rrie ẹvbo nii, iran keghi miẹn ibiẹka ikhuo ni tuorre dee, iran ra do sa amẹ. Iran keghi nọ avbe ibiẹka ikhuo nii wẹẹ, “Ọbiro rre owa ra?” (Ẹkpo nẹdẹ, ọmwa gha te ra nọọn Osanobua emwi, ọ ghi kha wẹẹ, “Wa gia gha rrie ọghe ọbiro.” Rhunmwuda ẹghẹ nii, ọbiro ọre a tie avbe akhasẹ).

^12-13 Iran keghi wanniẹn wẹẹ, “Ẹn, ọ rre owa. Ghe, ọ wa khian vbe odaro uwa nian. Wa tua owẹ ye okhian, te ọ da ke ehe rre na rhunmwuda, emwa gha zọ ese ẹrẹna vbe aka ne ọ rre uhunmwu oke. U gha wa da la ore ẹvbo, u gha miẹn ọẹn vbe ọ te hin ukhunmwu ya rri evbare. Avbe emwa i ra suẹn evbare gha re ọ te sẹ evba, rhunmwuda te irẹn gha ka na erhunmwu emwi izọese nẹ, emwa nii ke suẹn evbare gha re. Wa gha rrie evba nii nian, wa gha miẹn ọẹn vba vbe ọwarọkpa.”

¹⁴ Ẹre Sọl kevbe ọkpọmwa rẹn na rhunmwuda onii gha rrie ore ẹvbo, vbene iran wa khian nii, iran keghi bẹghe Samuẹl, ọ khian bu iran ke odaro dee, ọ rrie ehe ne emwa na gaa.

¹⁵ Vbe a tie ẹre akhuẹ e Sọl khian rre, e Nọyaẹnmwa keghi tama Samuẹl wẹẹ,

¹⁶ “Vbe odẹ ẹghẹ na akhuẹ, I gha gie okpia ọkpa ke uniẹn e Bẹnjamin bu ruẹ rre, u ghi nọnọ ori ye ọre uhunmwu zẹ vbe ne ọkhaemwisẹ yan avbe emwa mwẹ, rẹn ọ ra sinmwi iran hin obọ emwa Filistin rre. I miẹn usẹ ne emwa mwẹ sẹ, I vbe họn eve ne iran viẹ ye ẹmwẹ iyobọ.”

¹⁷ Ugbẹn vbe Samuẹl ghi bẹghe Sọl. e Nọyaẹnmwa keghi tama rẹn wẹẹ, “Ọmwa ne I kha ọna khin. Rẹn ọ re ọ ra gha khaemwisẹ yan emwa mwẹ.”

¹⁸ Ẹre Sọl na khian bu e Samuẹl gha rrie ọkpẹn onurho, ọ keghi nọ rẹn wẹẹ, “Tama mwẹ, de ehe ne ọbiro ye?”

¹⁹ E Samuẹl keghi wanniẹn wẹẹ, “Mẹ ọrọre nene ọbiro. Ke odaro mẹ ne u khianmwu vbe ehe ne a na gaa. Wa eveva gha deba mwẹ rri evbare ẹrẹna. Owiẹ ne akhuẹ, I gha rhie ewanniẹn ye ọta ne u nọ rẹn hia nẹ, I ghi zẹ uwa urrie.

²⁰ Zẹ vbe ọghe avbe ekẹtẹkẹtẹ ne ọ wiri nẹghẹdia, wa ghẹ ghi kpokpo egbe ba ẹmwẹ iran rhunmwuda, a miẹn iran nẹ. Sokpan, de ọmwa ne emwa Izrẹl wa rhie aro ye odẹ gha khẹ yi! Ẹ i re uwẹ nọ, kevbe ẹgbẹe erhaa?”

²¹ E Sọl keghi wanniẹn wẹẹ, “Ovbi ẹwae Bẹnjamin ọ re I khin, ẹwae ne ọ kanmwa sẹ vbe Izrẹl. Ẹgbẹe erha mwẹ ọ re ọ vbe re ne ọ kanmwa sẹ vbe ẹwae nii, ẹgbẹe mwẹ ọ re ọ vbe re ne ọ ma hin usi vbe ẹwae nii. Vbọzẹ ne u ghi na ta ẹmwẹ vberriọ ma mwẹ?”

²² Ẹre Samuẹl na viọ e Sọl ke ẹe kevbe ọguọmwadia ẹre la ọgua nọkhua nii, ọ keghi wẹ ne iran tota ye ihe ọdiọn vbe eteburu ne emwa ne a tiere na tota, iran kegha re omwa arhin ọgban.

²³ E Samuẹl keghi tama ọmwa ne ọ le evbare wẹẹ, “Rhie emiowo ne I fian mu ne uẹn mu hin rre ye efẹn ọkpa nii rre.”

²⁴ Ẹre ọmwa ne ọ le evbare nii na mu owẹ aranmwẹ nii kevbe efun esiesi ne ọ lele ẹe, ọ na mu ye Sọl otọ. E Samuẹl keghi kha wẹẹ, “Ghe emiowo ne a fian khẹ ruẹ. Riọe, rhunmwuda, te a rhie ẹre ye otọ khẹ ruẹ ne u deba avbe emwa na ne I tiere rri evbare ẹghẹ na.” Ẹre Sọl na gu e Samuẹl rri evbare ẹdẹrriọ.

²⁵ Iran ghi ke ehe ne iran na ya gaa na sẹ ore ẹvbo, iran keghi wa ukpo ne Sọl vbe egedege,

²⁶ rẹn keghi vbiẹ evba. Ẹdẹ ghi gbe, e Samuẹl keghi tie Sọl vbe egedege wẹẹ, “Kpaegbe ne I do zẹ uwa urrie.” E Sọl keghi kpaegbe, rẹn vbe Samuẹl kegha khian la adesẹ ore.

E Samuẹl Nọnọ Ori Yan E Sọl Zẹ vbe Ne Ọ Khaemwisẹ

²⁷ Iran ghi sẹ ọkpẹn ehe ne ẹvbo sẹẹ, e Samuẹl keghi tama e Sọl wẹẹ, “Tama ọguọmwadia ruẹ ne ọ khian ke odaro ne ima.” Ọguọmwadia nii keghi kpao, e Samuẹl keghi ye gha guan khian wẹẹ, “Mudia khẹ mwẹ vbe ẹghẹ kherhe ne I tama ruẹn vbene Osanobua kha hẹ.”