I Samuẹl 8 - Edo Bible (E Baibol Ẹdo) Version 1996

Emwa Nii Nọ Rẹn Wẹẹ Ne A Ma Ọba Ne Iran

¹ E Samuẹl ghi khian ọmaẹn nẹ, ọ keghi ye ivbi ẹre ru enibuohiẹn vbe Izrẹl.

² A kegha tie ovbi ẹre ne ọdiọn Joẹl, a keghi tie nekherhe Abija; iran kegha re enibuohiẹn vbe Biẹsiẹba.

³ Sokpan, iran ma lele ukpowẹ erha iran. Igho ne a khuan ọkpa ọ re aro iran wa gha ye. Rhunmwuda ọnii, iran kegha rri igho odieke, iran na gha khiẹn ohiẹn bu.

⁴ Avbe ọkaolotu Izrẹl hia keghi si koko, iran na bu e Samuẹl gha rrie Rama,

⁵ iran tama rẹn wẹẹ, “Ghe, u khian ọmaẹn nẹ, avbe ivbi uẹ i vbe lele ukpowẹ ruẹ. Rhunmwuda ọnii, zẹ ọba ọkpa yọ ne ọ gha khaemwisẹ yan ima ne ima vbe gha mwẹ ọba vbene avbe ẹvbo ọvbehe vbe mwẹ ọnrẹn.”

⁶ Ẹko e Samuẹl ma rhiẹnrhiẹn ye ne iran na nọ ọba na, ọ keghi rhunmwuda ọnii na erhunmwu ghe Nọyaẹnmwa.

⁷ E Nọyaẹnmwa keghi tama rẹn wẹẹ, “Danmwehọ ẹmwẹ ne iran rhirhi tama ruẹn, ẹ i re uwẹ ọ re iran he, mẹ ọ re iran he zẹ vbe ọba iran.

⁸ Ke ẹghẹ ne I ya viọ iran ke otọe Igipt ladian gha dee, ọ re iran ke he mwẹ ye otọ, iran na gha ga avbe ẹbọ ọvbehe; banbanna nian, emwi ne iran ru mwẹ re ke ẹghẹ nii gha dee ọ re iran vbe ru uwẹ re na.

⁹ Rhunmwuda ọnii nian, khuẹnniẹn ye iran re sokpan u ghi ya obọ sekhae ne iran, u ghi rhan otọ ẹre ma iran vbene avbe ọba iran gha ru iran hẹẹ.”

¹⁰ E Samuẹl keghi talọ ẹmwẹ ne Nọyaẹnmwa tama rẹn hia ma avbe emwa ni do gha nọ irẹn ọba nii.

¹¹ E Samuẹl keghi kha wẹẹ, “Vbene ọba uwa khian ru uwa ọ re ena khin; ọ gha ya ivbi uwa hia khian ivbiyokuo. Eso vbọ gha winna vbe ikẹkẹ okhuae ọghe okuo ẹre, eso vbe uwu iran ni ọ ra gha gbinna ne ẹẹn, eso vbọ ghi vbe gha rhulẹ vbe odaro ikẹkẹ okuo ẹre.

¹² Ọ gha ya eso vbọ ru ivbiyokuo ni gbearoghe ivbiyokuo arriaisẹn, eso ghi vbe gha re ni gbearoghe ekigbe siyeha. Ivbi uwa gha rhọ emwiokọ ẹre, iran ghi gha dunmwu emwi gbinna rẹn kevbe ọghe ikẹkẹ okuo ẹre.

¹³ Ivbi uwa ni ikhuo ghi gha le ori ne ọ winhin ne ẹẹn, eso ghi gha re ni le evbare kevbe ni le e brẹd.

¹⁴ Ọ gha ya otọ uwa ni maa sẹ ru ogba azara ẹre kevbe ugbo ohọ, ọ ghi viọ ne emwa ni rre asẹ vbe ototọ ẹre.

¹⁵ Ọ gha viọ a ghae ye ihigbe emwiokọ uwa, ọ gha viọ ne iran ni guẹe ziro vbe ẹguae kevbe emwa ni rre asẹ ọvbehe vbe ototọ ẹre.

¹⁶ “Ọ gha viọ eguọmwadia uwa, kevbe ẹmila uwa ni maa sẹ kevbe ekẹtẹkẹtẹ, ehia ghi gha winna ne ẹẹn.

¹⁷ Ọ gha viọ a ghae ye ihe igbe ọghe ohuan uwa, wa ghi do khian eviẹn ọnrẹn.

¹⁸ Ẹghẹ nii gha sẹ, wa ghi gha gui ẹzọ orriara ọghe ọna imaan vbe ekpa avbe ọba uwa, ne uwa tobọ uwa zẹe, sokpan e Nọyaẹnmwa i ra zẹ ye ẹzọ ne uwa gui.”

¹⁹ Emwa nii ma kue zẹ ye Samuẹl re. Iran keghi wanniẹn wẹẹ, “Ẹn o!” Ma gualọ ọba.

²⁰ Ne ima miẹn ehe na do gha yevbe avbe ẹvbo ọvbehe ne ima gha mwẹ ọba ne ọ gbearoghe ima, ne ọ gha viọ ima yo okuo, ne ọ gha khọn okuo ne ima.

²¹ E Samuẹl keghi danmwehọ ẹmwẹ hia ne iran ta ẹe, ọ na ya na ehia ma e Nọyaẹnmwa.

²² E Nọyaẹnmwa keghi wanniẹn wẹẹ, “Ru ẹe vbene iran ho, ne u rhie ọba ne iran.” Ẹre Samuẹl na tama ivbi Izrẹl ne iran gha rrie owa.