I Samuẹl 7 - Edo Bible (E Baibol Ẹdo) Version 1996

¹ Ẹre emwa kirriat Jearim na ya mu Ẹkpẹti Ile, iran na ya mu ẹẹn ye owa Abinadab ne ọ rre uhunmwu oke. Iran keghi ya Eliaza ne ovbi ẹre yo ulamwẹ ne ọ gha gbe aro ghe ẹre.

E Samuẹl Khaemwisẹ Yan Izrẹl

² Ẹkpẹti Ile ọghe Nọyaẹnmwa kpee vbe kirriat Jearim ẹsẹse, ọ sẹ odẹ ukpo ugie. Vbe uwu ẹghẹ na hia, ivbi Izrẹl kegha tu tie e Nọyaẹnmwa, wẹ ne ọ yi iran obọ.

³ E Samuẹl keghi tama ivbi Izrẹl wẹẹ, “A deghẹ te uwa ghi ra ya ekhọe uwa hia dọlegbe bu e Nọyaẹnmwa gha dee nian, wa ghi viọ avbe ẹbọ ẹrrẹe kevbe amazẹ ọghe Astat ne ẹbọ ne ọkhua, ni gue kua. Wa ye egbe uwa hia fi ohan ne Nọyaẹnmwa, ne uwa vbe gha ga irẹn ọkpa, rẹn ghi do miẹn uwa fan hin obọ ẹtin emwa Filistin rre.”

⁴ Rhunmwuda ọnii, ivbi Izrẹl keghi viọ avbe amazẹ e Baal ni gue iran kua deba ọghe Astat, iran na gha ga e Nọyaẹnmwa ọkpa kẹkan.

⁵ Ẹre Samuẹl na tie ivbi Izrẹl hia ne iran do miẹn egbe vbe Mizpa, ọ keghi tama iran wẹẹ, “I gha na erhunmwu ghe e Nọyaẹnmwa ne uwa vbe evba.”

⁶ Iran keghi rhunmwuda ọnii ya miẹn egbe vbe Mizpa. Iran keghi sa amẹ, iran na sa ẹe kua zẹ vbe emwi imuohan ne Nọyaẹnmwa. Iran keghi wa ya ẹdẹrriọ hia gha rre aguẹ. Iran kegha kha wẹẹ, “Ma ru orukhọ ghe e Nọyaẹnmwa nẹ.” (E Samuẹl kegha rre Mizpa, ọ na gha khaemwisẹ yan ivbi Izrẹl.)

⁷ Avbe ivbi e Filistin ghi họn ighẹ ivbi Izrẹl si egbe koko ye Mizpa, enigie isẹn nii rre ẹvbo emwa Filistin keghi viọ emwa iran ladian ne iran ya gu iran khọn. Ivbi Izrẹl ghi họn, afianma kegha fian iran, iran keghi tama e Samuẹl wẹẹ,

⁸ “Gha na erhunmwu ghe e Nọyaẹnmwa Osanobua mwa ne ọ miẹn ima fan vbe obọ ivbi e Filistia.”

⁹ E Samuẹl keghi gbe oteghe ohuan ọkpa, ọ keghi wa giẹn ikun ẹnrẹn uan zẹ vbe emwi izọese ghe e Nọyaẹnmwa. Ọ keghi na erhunmwu ghe e Nọyaẹnmwa, ne ọ yi ivbi Izrẹl obọ, e Nọyaẹnmwa keghi họn erhunmwu ẹnrẹn.

¹⁰ Ẹghẹ ne Samuẹl na wa gha zọ ese nii, ivbi e Filistin keghi rhulẹ ghe odaro ne iran gu iran gbinna sokpan, vbe ẹghẹ nii zẹẹ, e Nọyaẹnmwa keghi gie avan nukhunmwu van ke ẹrinmwi rre yan iran. Ezurọ keghi la iran hia egbe iran na lẹkua.

¹¹ Ivbi Izrẹl keghi ke Mizpa vẹ ladian, iran na zẹ ivbi Filistin khu ya sẹ vbe a ghi bu Betka, iran na gha gbele iran lele odẹ khian.

¹² Ẹre Samuẹl na mu okuta ọkpa, ọ keghi mu ẹẹn ye ẹkpo Mizpa kevbe Siẹn, ọ wẹẹ, “Te Nọyaẹnmwa wa yi ima obọ ke ẹghẹ ni gha dee.” Ọ na rhunmwuda onii gha tie ẹre “Okuta Iyobọ.”

¹³ Erriọ iran na khọn e Filistin muotọ, e Nọyaẹnmwa ma ghi rhie ẹghẹ ne iran ya dọlegbe mu okuo la otọe Izrẹl vbe ẹghẹ ne Samuẹl ya ẹe vbe agbọn.

¹⁴ Avbe ẹvbo ne Filistin te mu nọ hia, kevbe Ẹkrọn ya sẹ Gat, a keghi kie ehia werriegbe ne ivbi Izrẹl. Izrẹl keghi dọlegbe miẹn otọe ẹre hia werriegbe. Ọfumwegbe kegha rre ẹkpo ivbi Izrẹl kevbe emwa Kenan.

¹⁵ E Samuẹl ọ re ọ gha khaemwisẹ yan Izrẹl vbe ẹghẹ ne ọ ya ẹe vbe agbọn hia.

¹⁶ Ukpukpo ọ re irẹn ya gha lae ga ke Bẹtẹl gha rrie Gilgal kevbe Mizpa. Ọ ghi gha bu ohiẹn lele ehe na hia khian.

¹⁷ Iyeke onii ọ ghi vbe gha rrie Rama ne ẹvbo ẹre, ọ ghi vbe ya bu ohiẹn vba. Ọ keghi bọ aka ọkpa ne Nọyaẹnmwa vbe Rama.