I Samuẹl 6 - Edo Bible (E Baibol Ẹdo) Version 1996

A Mu Ẹkpẹti Ile Werriegbe Rre

¹ Ẹkpẹti Ile ọghe Nọyaẹnmwa ghi ghe uki ihinrọn nẹ vbe Filistia,

² avbe ọkaolotu iran keghi tie avbe ohẹn kevbe ọbo edunna, iran keghi nọ iran wẹẹ, “Vbe ima gha ru Ẹkpẹti Ile ọghe Nọyaẹnmwa hẹ? A deghẹ ma mu ẹẹn werriegbe gha rrie ehe ne ọ ke rre, de emwi ne ima gha rhie lele ẹe gha khian?”

³ Iran keghi wanniẹn wẹẹ, “A deghẹ wa mu Ẹkpẹti Ile ọghe Osanobua Izrẹl werriegbe, te uwa gha viọ emwi izẹọhẹ lele ẹe ne uwa ya ha osa orukhọ uwa. A ghẹ gie Ẹkpẹti Ile nii werriegbe vbe ne a ma na viọ emwi izẹ ọhẹ lele ẹe, vbenian ọre a gha na mu uwa egbe rran, wa ghi do rẹn emwi ne ọ si ẹe ne ọ na gha mianmwẹ uwa ke ẹghẹ ni gha dee.”

⁴ Iran keghi nọ iran wẹẹ, “De emwi ne ima gha ya zẹ ọhẹ lele ẹe.” Iran keghi wanniẹn wẹẹ, “Amazẹ ọghe uruvba isẹn ne a ya igoru ma, kevbe ofẹn isẹn ọkpọkpa ghi gha re ọghe ọkpọkpa vbe uwu avbe enigie e Filistin.

⁵ Wa ghi mannọ amazẹ ọghe avbe uruvba kevbe ofẹn nii ya ẹvbo uwa rrie na, ne uwa vbe miẹn orukhọ uwa kue ma Osanobua Izrẹl. U ghaghe ọ ghi dobọ oya ne ọ ya rri uwa, kevbe ẹbọ uwa kevbe otọ uwa re yi.

⁶ Vbọzẹ ne uwa gha na ze vbe ẹkoko udu zẹ vbe ne ọba Igipt, kevbe emwa Igipt ye? Yerre vbene Osanobua zuọzuọ iran hẹ, iran te do gie ivbi Izrẹl kpa vbe Igipt rre.

⁷ Rhunmwuda onii nian, wa kun okotọ ọgbọn, wa munọ ẹmila eva ne a ma he ya gua ẹdẹ, gbalọ iran ginna okotọ nii, wa ghi khulo ivbi iran werriegbe gha rrie irhu.

⁸ Wa mu Ẹkpẹti Ile ọghe Nọyaẹnmwa nii ne uwa mu ẹẹn yan okotọ nii. Wa ghi viọ amazẹ ọghe igoru ne uwa mannọẹn nii, ne uwa ra ya ze ọhẹ gie ẹe ne uwa ya ha osa orukhọ uwa, ye ẹkpẹti mu ke Ẹkpẹti Ile nii, wa ghi sua okotọ nii ghe odẹ ne uwa ho ne ọ laghe, nu uwa gie ẹe tobọ ẹre gha khian.

⁹ Wa ghi gha ghe ẹre vbe ọ khian. Ọ gha laghe odẹ Bẹt Siemẹs, ọ rhie maa wẹ Osanobua ọghe ivbi Izrẹl ọ re ọ gie avbe emwi ni wegbe na rruan uwa, sokpan, a deghẹ ọ ma ru vberriọ, a ghi rẹn wẹ ẹ i re irẹn ọ re ọ gie emianmwẹ ni rre, vbene emwi defi nọ.”

¹⁰ Iran keghi ru vbene a tama iran, iran keghi mu ẹmila amwẹ eva, iran na gbalọ iran ginna okotọ nii, iran ke dee ivbi iran ye uwu ogba.

¹¹ Iran keghi mu Ẹkpẹti Ile nii ye uwu okotọ ke ẹe kevbe ẹkpẹti ne iran viọ amazẹ igoru ọghe uruvba kevbe ofẹn nii yi.

¹² Avbe ẹmila nii keghi suẹn okhian ghe odẹ Bẹt Siemẹs, iran na wa gha rrie evba taara vbene iran ma na vbe zẹdẹ lahin urodẹ rre hiehiere. Iran kegha tu vbene iran wa ya khian nii. Enigie Filistin isẹn nii keghi lele iran sẹ uwu Bẹt Siemẹs.

¹³ Ivbi e Bẹt Siemẹs kegha fian ọka vbe uwu iya. Udomwurri, iran ghi tọn aro mu ya ghe Ẹkpẹti Ile, iran keghi kakabọ ghọghọ.

¹⁴ Okotọ nii kegha die ugbo ọghe Jọsua ne ọ rre Bẹt Siemẹs, ọ na mudia vba vbe ọkpẹn okuta nọkhua ọkpa. Emwa nii keghi sọ erhan ọghe okotọ nii, iran na gbele avbe ẹmila nii, iran keghi giẹn ọnrẹn ruan zẹ vbe emwi izọ ese ghe e Nọyaẹnmwa.

¹⁵ Avbe e Livai keghi tọn Ẹkpẹti Ile nii mu ke ẹe kevbe ẹkpẹti ne iran viọ amazẹ igoru yi nii, iran keghi viọ iran yan okuta nii. Ẹre emwa e Bẹt Siemẹs na viọ emwi izẹọhẹ ne a giẹn uan rre, deba emwi izọ ese ọvbehe gie Nọyaẹnmwa.

¹⁶ Enigie e Filistin isẹn nii kegha ghe iran vbe iran ru ẹe. Iran keghi werriegbe gha rrie Ẹkrọn vbe ẹdẹ nẹdẹrriọ zẹẹ.

¹⁷ Ivbi e Filistin keghi viọ uruvba igoru gie Nọyaẹnmwa zẹ vbe emwi izọese ye orukhọ iran, ọkpọkpa vbọ kegha re ọghe Asdọd, e Gaza, Askẹlọn, e Gat kevbe Ẹkrọn.

¹⁸ Iran viọ avbe ofẹn igoru gha khian, ọkpọkpa vbọ kegha re ọghe ọkpọkpa vbe ẹvbo ne iran khaemwisẹ yan ighẹ enigie e Filistia nii, avbe ẹvbo ne a gbe ekẹn gaa, kevbe avbe igue ne a ma gbe ekẹn gaa. Okuta nọkhua ne ọ rre ugbo e Jọsua ne ovbi Bẹt Siemẹs ne iran mu Ẹkpẹti Ile e Nọyaẹnmwa yan, te ọ yerre evba banbanna zẹ vbe iyama ọghe emwi ne ọ sunu.

¹⁹ E Nọyaẹnmwa keghi gbele ivbi Bẹt Siemẹs eso rhunmwuda iran kegha ghe uwu Ẹkpẹti Ile nii, ọ keghi gbele arhin ekigbe sẹ iyenẹ vbe uwu iran. Emwa nii keghi khiẹ, rhunmwuda ne eso na wulo vbe uwu iran.

Ẹkpẹti Ile Vbe kirriat Jearim

²⁰ Rhunmwuda ọnii, ivbi e Bẹt Siemẹs keghi kha wẹẹ, “De emwa ne ọ gha sẹtin mudia vbe odaro e Nọyaẹnmwa, Osanobua nọhuanrẹn na? De ehe ne ima gha mu ẹẹn gha rrie, ne a miẹn ehe na mu ẹẹn hin ehe ne ima ye rre?”

²¹ Iran keghi gie emwa gha rrie kirriat Jearim ya khama iran wẹẹ, “Avbe e Filistin mu Ẹkpẹti Ile werriegbe rre, wa gha de do mu ẹẹn.”