I Samuẹl 5 - Edo Bible (E Baibol Ẹdo) Version 1996

Ẹkpẹti Ile Vbe Ẹvbo Avbe Filistin

¹ Ivbi e Filistin ghi khọn mu Ẹkpẹti Ile ọghe Osanobua nii, iran keghi mu ẹẹn ke Ebẹnẹza gha rrie ẹvbo Asdọd.

² Iran keghi mu ẹẹn gha rrie aro ẹbọ iran ne a tie ẹre Dagọn, iran na muẹn diake amazẹ ọre.

³ Vbe owiẹ vbirrivbirri vbe ikpẹdẹ ne ọ lele ẹe, ivbi Asdọd ghi do ghe amazẹ e Dagọn de mu aro rhu otọ vbe odaro Ẹkpẹti Ile ọghe Osanobua. Iran keghi tọn ẹẹn mu, iran na mu ẹẹn ye ihe ẹre.

⁴ Vbe owiẹ vbirrivbirri vbe ẹdẹ ne ọ vbe lele ẹe, iran ghi do ghe amazẹ nii vbe dọlegbe de vbe odaro Ẹkpẹti Ile ọghe e Nọyaẹnmwa. Uhunmwu ẹnrẹn kevbe obọ ẹre eva khuọnnọ kua, ehia kegha rre onurho, ikinnegbe ẹre ọkpa ọ re ọ ghi kẹe.

⁵ (Ọna ọ si ẹe ne a na miẹn wẹ do sẹ ẹdẹnẹrẹ na, avbe ohẹn Dagọn ke ẹe kevbe emwa hia ni gho ẹre vbe Asdọd, te iran zẹ owẹ rra evba, iran i ya owẹ rrilo ẹe.)

⁶ E Nọyaẹnmwa keghi rri emwa Asdọd oya ẹsẹse, ọ na runran iran.

⁷ Iran ghi miẹn emwi ne ọ sunu, iran keghi kha wẹẹ, “Osanobua ọghe Izrẹl ọ re ọ rri ma oya na ke ima kevbe Dagọn ne ẹbọ mwa. Ma i ghi kue ne Ẹkpẹti Ile na ye gha rre emwa na ọvbehe.”

⁸ Rhunmwuda ọnii, iran keghi gie ne a ya tie enigie isẹn ọghe emwa Filistin, iran keghi nọ iran wẹẹ, “Vbe a gha ru Ẹkpẹti Ile ọghe Osanobua ivbi Izrẹl hẹ yi?” Iran wanniẹn tama iran wẹẹ, “Wa mu ẹẹn gha rrie Gat.” Iran keghi gele mu ẹẹn gha rrie Gat ne ọ vbe re ẹvbo e Filistin.

⁹ Sokpan, ọ ghi sẹ evba e Nọyaẹnmwa keghi rri ẹvbo ni oya ọ keghi fian otighi fi iran egbe. Osanobua keghi ya uruvba ne ọ munọ emwa rri iran oya, ọ keghi munọ emwa hia ke ibiẹka kevbe eniwanrẹn.

¹⁰ Iran na ghi vbe mu ẹkpẹti ni gha rrie Ẹkrọn, ne ọ vbe re ẹvbo e Filistin, ugbẹn vbe ọ ghi se evba, emwa nii hia keghi wa gha goo wẹẹ, “Iran mu Ẹkpẹti Ile ọghe Osanobua ivbi Izrẹl gha di edinran, ne ọ gbele ima hia a.”

¹¹ Iran keghi vbe rhunmwuda onii dọlegbe tie enigie isẹn nii, iran tama iran wẹẹ, “Wa mu Ẹkpẹti Ile ọghe Izrẹl werriegbe gha rrie ihe ẹre ne ọ ghẹ do gbele ima gbele ima emọ.” Ẹvbo hia kegha hu yo hu rre rhunmwuda Osanobua rri iran oya ẹsẹse.

¹² Iran ni ma wulo vbọ, uruvba keghi munọ iran. Iran kegha datie ẹbọ iran ne ọ do yi iran obọ.