I Samuẹl 31 - Edo Bible (E Baibol Ẹdo) Version 1996

Uwu E Sọl Ke Avbe Ivbi Ẹre

¹ Avbe ivbi e Filistin kegha gu ivbi Izrẹl khọn vbe oke Gilboa. Iran keghi gbele ni bun vbe ivbi Izrẹl vbe evba, ni dekẹe keghi lẹ kua ya sẹ egbe ivbi e Sọl.

² Ivbi e Filistin keghi khu e Sọl mu, iran gbele ivbi ẹre ighẹ Jonatan, Abinadab kevbe Malkisua.

³ Okuo nii keghi lọmwa lẹga e Sọl, avbe ifẹnmwẹ eghian kevbe salọ ẹe, obọ na vba ẹre ẹsẹse.

⁴ Rhunmwuda ọnii, rẹn keghi tama igbama ne ọ hẹ emwi igbinna mwẹ ọnrẹn wẹẹ, “Yuo umozo ruẹ ladian ne u gbe mwẹ uan ne avbe Filistin ni ma rẹn Osanobua na ghẹ ya ya mwẹ gbogiẹ, iran ke gbe mwẹ uan.” Sokpan ohan ma gie igbama nii ru emwi vberriọ. Ẹre Sọl ghi na rhie umozo ọghe irẹn, ọ na tobọ ẹre ziẹn egbe yọ.

⁵ Igbama ni keghi miẹn wẹ e Sọl wu, rhunmwuda ọnii rẹn keghi vbe ziẹn egbe ẹre ye umozo irẹn, ọ na wu lele Sọl.

⁶ Ẹre Sọl, ivbi ẹre eheha kevbe igbama nii, na wulo ẹdẹ nẹdẹrriọ.

⁷ Ivbi Izrẹl ni rre obọ nọkpa ọghe Iya Jezrẹl kevbe odẹ ahọ Ẹzẹ Jọdan ghi miẹn wẹ ivbiyokuo Izrẹl lẹkua kevbe, wẹ a gbele Sọl kevbe avbe ivbi ẹre, iran keghi sẹ ẹvbo iran rae, iran na lẹkua. Avbe ivbi e Filistin keghi rre iran na do yin avbe ẹvbo nii.

⁸ A ghi tie ẹre nodẹ ne a gbinnaẹn, ivbi e Filistin kegha khian ya bannọ avbe orinmwi ukpọn viọ. Iran keghi miẹn ikun e Sọl kevbe ivbi ẹre eheha vbe oke Gilboa.

⁹ Iran keghi fian e Sọl uhunmwu, iran na viọ emwi igbinna rẹn, iran na ya ẹe gie emwa eso uhunmwu gha rrie Filistia ne iran ya ya ẹe na iyẹn oghọghọ ma avbe ẹbọ iran kevbe emwa iran.

¹⁰ Iran keghi viọ emwi igbinna ye aro Astat ne ẹbọ ne okhuo, iran na sẹ ikun ẹnrẹn ginna ekẹn ẹvbo Bẹt-Sian.

¹¹ Ivbi ẹvbo e Jabẹs ne Giliad ghi họn vbene ivbi e Filistin ru e Sọl hẹ,

¹² iran ni din sẹ vbọ keghi kpaegbe, iran na ye asọn ni hia khian gha rrie Bẹt-Sian. Iran keghi munọ ikun e Sọl kevbe ọghe ivbi ẹre hin egbekẹn rre, iran keghi viọ iran gha die Jabẹs, iran na do giẹn iran uan vbe evba.

¹³ Iran keghi viọ ugboloko ni rrọọ, iran keghi re ẹre ye ẹzi erhan e tamarisk vbe ẹvbo nii, iran na khiẹ la ikpẹdẹ ihinrọn.