I Samuẹl 30 - Edo Bible (E Baibol Ẹdo) Version 1996

Okuo Ne A Gu Ivbi Amẹlẹk Khọn

¹ E Devid kevbe emwa rẹn keghi do sẹ Ziklag vbe iyeke ikpẹdẹ eva. Ivbi Amẹlẹk kegha khọn odẹ ekẹn ọghe Juda, iran na vbe do sẹ Ziklag. Iran keghi wa giẹn ẹvbo nii sẹ otọ.

² Iran keghi wa munọ ikhuo ni rrọọ hia oghunmwu. Iran ma gbe ọmwa rhọkpa, sokpan iran keghi viọ ehia kpao gha rrie.

³ E Devid kevbe emwa rẹn ghi rre, iran ghi do ghe, a giẹn ẹvbo nii sotọ, amwẹ iran, ivbi iran ne ikpia kevbe ivbi iran ne ikhuo iran wa hẹ ehia kpao.

⁴ E Devid kevbe emwa rẹn ke gbe eve ua, iran keghi viẹ viẹ viẹ a te do miẹn wẹ orhiọn ighi rre iran iwu hiehiere.

⁵ Amwẹ e Devid eveva, Ahinoam kevbe Abigẹl, iran viọ kpao.

⁶ Uwu ọlọghọmwa nọkhua ọre Devid ghi ye rhunmwuda ẹko ma maa rẹn hiehie rhunmwuda ivbi iran ne iran ma ghi miẹn, iran na gha yan ighẹ iran ra filo okuta gbe ẹe rua, sokpan, e Nọyaẹnmwa ne Osanobua ẹre keghi rhie igiẹudu ne ẹẹn.

⁷ E Devid keghi khama ohẹn Abiata ne ovbi Ahimẹlẹk wẹẹ, “Mu adaghọ ni rre.” Abiata keghi mu gie ẹe.

⁸ E Devid keghi nọ e Nọyaẹnmwa wẹẹ, “Nẹ I khu emwa ni do khọn na ra? Obọ mwẹ gha vba iran ra?” Ọ keghi wanniẹn wẹẹ, “Khu iran, u gha mu iran, u ghi miẹn avbe oghunmwu ni hia fan.”

⁹ Ẹre Devid kevbe arhin uri eha ni gue ẹe na deyan okhian, iran na do sẹ ovbi ẹzẹ e Bezọ. Eso vbe uwu iran keghi yakọ vbe evba.

¹⁰ E Devid keghi viọ uri eva ba egbe gha khian vbe uwu avbe emwa rẹn. Iran ne uri ọkpa ni dekẹe, egbe wọ iran sẹrriọ wẹ iran ma ghi sẹtin fian ovbi ẹzẹ nii rra, iran na ghi yakọ vbe evba nii.

¹¹ Emwa ni gu e Devid ghi miẹn ovbi Igipt ọkpa nokpia vbe uwu oha, iran na rhie ẹre bu e Devid, iran na mu amẹ nẹ deba evbare.

¹² Ọmọ ohọ ne a ka re deba ititi eva ọghe ọmọ erhan ọvbehe ne avbe kae hin rre. Ọ ghi rri evbare nẹ, orhiọn keghi la ẹre iwu. Ọ ma te re ọ ma da vbe ikpẹdẹ eha fẹẹrẹ.

¹³ E Devid keghi nọ rẹn wẹẹ, “Gha ọ re arowa a, vbe u a a kere?” Rẹn keghi wanniẹn wẹẹ, “Ovbi Igipt ọ re I khin, ọviẹn ovbi Amẹlẹk ọkpa, I ghi suẹn gha khuọnmwi nẹghẹdia ọ re arowa mwẹ na kpao sẹ mwẹ rae.

¹⁴ Ẹvbo Kẹrit ọ re ima na ya khọn kevbe odẹ ekẹn ọghe Juda kevbe otọe ẹwae Kelẹb, ma keghi giẹn e Ziklag sẹ otọ.”

¹⁵ E Devid keghi nọ rẹn wẹẹ, “U gha ya ma mwẹ ehe ne iran ni khọn okuo na ye ra?” Rẹn keghi wanniẹn wẹẹ, “I gha yọ adeghẹ u ya eni Osanobua yan ma mwẹ u i ra gbe mwẹ uan ra ne u dọlegbe rhie mwẹ ne arowa mwẹ.”

¹⁶ Ọ keghi wa ma e Devid ehe ne iran ye. Iran ni khọn ke wa tagha gba ehe hia, iran gha re iran gha da ne iran ya do ugie emwi ọrhẹnrhẹn ne iran miẹn hẹ vbe Filistia kevbe Juda.

¹⁷ Ẹdẹ ne ọ lele ẹe, e Devid keghi dekun iran vbe ẹdẹ da wan, ọ keghi gbinna rhinrin ya sẹ ota. Ọkpa ne ọ miẹn uhunmwu i rre uwu iran gberra igbama uri eva ni hin ekẹtẹkẹtẹ, iran na lẹkua.

¹⁸ E Devid keghi viọ emwa hia kevbe emwi hia ne ivbi Amẹlẹk te hẹ deba amwẹ irẹn eveva.

¹⁹ Emwi ọkpa ne ọ wiri i rrọọ. E Devid keghi viọ ivbi avbe emwa rẹn ne ikpia kevbe ne ikhuo werriegbe, deba emwi hia ne ivbi Amẹlẹk te hẹ.

²⁰ Ọ keghi vbe viọ avbe ohuan kevbe ẹmila werriegbe, emwa rẹn keghi viọ avbe emwirri ni ke odaro, iran keghi kha wẹẹ, “Emwi e Devid e na khin!”

²¹ Ẹre Devid na werriegbe bu arhin uri ne egbewọmwẹ ma gie iran sẹtin lele ẹe, iran na yakọ vbe obọ nọkpa ọghe ovbi ẹzẹ e Bezọ. Iran keghi khian bu e Devid kevbe emwa rẹn sẹ odẹ, e Devid keghi bu iran gha khian, ọ na tuẹ iran ẹsẹse.

²² Sokpan emwa oya ne ẹwobi eso ni lele Devid yo keghi kha wẹẹ, “Iran ma lele ima yo, rhunmwuda ọnii ma i ghae ne iran vbe emwi ne obọ ima vbare, iran sẹtin viọ amwẹ iran kevbe ivbi iran ne iran gha rrie.”

²³ Sokpan, e Devid keghi wanniẹn wẹẹ, “Etẹn mwẹ, wa ru emwi ne Nọyaẹnmwa hẹ ni ma vberriọ! Rẹn ọ re ọ degue ima, ọ na gie ima khọnmiotọ vbe uhunmwu avbe iran ni khọn okuo viọ ọmwa emwi nii.

²⁴ Ọmwa ne ọ ra ya obọ ye ne uwa tae nii, ẹ i rrọ! Te agbọn hia ra gba gha emwi: emwa ni tota ke evbare vbe owa keghi vbe ghae vbe emwi zẹ vbe emwa ni gha rrie okuo.”

²⁵ E Devid keghi mu emwi na yotọ zẹ vbe iyi, erriọ ọ re a ye ru ẹe vbe Izrẹl ke ẹghẹ ni gha dee.

²⁶ E Devid ghi dọlegbe sẹ Ziklag, ọ keghi viọ eso vbe emwi ne obọ ẹre vbare gie avbe esiọre, iran ne avbe ọkaolotu e Juda, ọ wẹẹ, “Wa ghe emwi ne I ya ha oko gie uwa vbe uwu avbe emwi ne ima gbe avbe eghian Nọyaẹnmwa miẹn iran re.”

²⁷ Ọ keghi viọ gie iran ni rre Bẹtẹl, kevbe iran ni rre Rama vbe odẹ ekẹn Juda, kevbe emwa ni rre ẹvbo Jati.

²⁸ Aroa, Sifmọt, Ẹstemoa

²⁹ kevbe Rakal, kevbe gie ẹwae Jeramil, avbe ivbi Ken,

³⁰ kevbe gie emwa ni rre adesẹ ore ẹvbo e Họma, Borasian, Atak

³¹ kevbe Hibrọn. Ọ keghi gha ẹre gba ehe hia ne irẹn kevbe emwa rẹn ka zozo la hia.