I Samuẹl 3 - Edo Bible (E Baibol Ẹdo) Version 1996

E Nọyaẹnmwa Rhie Egbe Maa E Samuẹl

¹ Ẹghẹ ne ọmọ nii ighẹ Samuẹl na gha ga e Nọyaẹnmwa vbe ototọ Elai. E Nọyaẹnmwa i mobọ gie uhunmwu rre, umian ne ọ rhie ne ọmwa gha miẹn, ma vbe gha kpọ.

² Ọ ghi sẹ asọn ọkpa, Elai ne aro ẹre sa oze nẹ vbe ẹghẹ na kegha vbiẹ vbe ughugha ẹre:

³ E Samuẹl keghi vbe gha vbiẹ vbe uwu Ogiukpo, ehe ne Ẹkpẹti Ile ọghe Osanobua ye. Ukpa ne ọ rre evba ke ye gha baa.

⁴ E Nọyaẹnmwa keghi tie Samuẹl, rẹn keghi khuẹnniẹn wẹẹ: “Ghe mwẹ evbavba!”

⁵ Ẹ i re te u tie mwẹ, “Sokpan Elai wanniẹn wẹẹ, I ma tie ruẹ ovbi mwẹ, gha khian ya lovbiẹ.” Ẹre Samuẹl na ya dọlegbe lovbiẹ.

^6-7 E Nọyaẹnmwa keghi vbe dọlegbe tie Samuẹl, ọmọ nii kevbe kpaegbe, ọ keghi bu Elai gha khian ya tama rẹn wẹ “Ẹ i re te u tie mwẹ, ghe mwẹ.” Sokpan Elai wanniẹn wẹẹ, “I ma tie ruẹ, ovbi mwẹ gha khian ya lovbiẹ.” (E Samuẹl ma he rẹn e Nọyaẹnmwa rhunmwuda e Nọyaẹnmwa ma he ka guẹe guan ẹdẹ.)

⁸ E Nọyaẹnmwa keghi dọlegbe tie Samuẹl ukpogieha, rẹn guakpao, ọ bu Elai, ọ tama tẹn wẹẹ, “Ẹ i re te u tie mwẹ, ghe mwẹ.” Ẹghẹ nii ọ re Elai na do rẹn wẹ, e Nọyaẹnmwa ọ re ọ tie ọmọ na.

⁹ Rẹn keghi rhunmwuda ọnii tama rẹn wẹẹ, “Ya dọlegbe lovbiẹ, ọ gha ye dọlegbe tie ruẹ, u ghi kha wẹẹ, ‘Gha guan e Nọyaẹnmwa, ọguọmwadia ruẹ danmwehọ.’ ” Ẹre Samuẹl na werriegbe ya lovbiẹ.

¹⁰ E Nọyaẹnmwa kegha dee, ọ keghi mudia vbe evba, ọ keghi dọlegbe tie zẹ vbene ọ ka tie yi, “Samuẹl! Samuẹl!” E Samuẹl keghi wanniẹn wẹẹ, “Gha guan; ọguọmwadia ruẹ danmwẹ ehọ.”

¹¹ E Nọyaẹnmwa keghi tama rẹn wẹẹ, “I khian ru emwa Izrẹl emwi ne ọ mu ohan sẹ vberriọ wẹ ọmwaikọmwa ne ọ rhirhi họn ẹn, ikponi ghi sa ku ọ re.

¹² Vbe ẹdẹ ne ẹdẹrriọ, I gha ru emwi ne I yan rẹn ighẹ I gha ru ẹgbẹe Elai re, ke omuhẹn ya sẹ ufomwẹ ọnrẹn.

¹³ I tama rẹn ne wẹẹ, I gha rri uniẹn ọnrẹn oya ẹdẹdẹmwẹdẹ, rhunmwuda, ivbi ẹre fi unu gun mwẹ. Elai rẹnrẹn ighẹ iran ru emwi na, sokpan ọ ma kie iran ukpo ọre.

¹⁴ Rhunmwuda ọnii, I keghi tua unu mu ẹẹn tama ẹgbẹe Elai wẹẹ, izọese ra izẹọhẹ ọkpa ne ọ gha sẹtin khian emwi ne ọ ra ke orukhọ dan na ikian hin rre, ẹ i rrọọ.”

¹⁵ E Samuẹl keghi lovbiẹ ye ukpo ẹre rhinrin ya sẹ owiẹ, ọ keghi kpaegbe ọ na ya kie urho ọgua Osa. Ohan ma gie ẹe ta umian nii ma Elai.

¹⁶ Elai keghi tie ẹre wẹẹ, “Samuẹl ne ovbi mwẹ,” Rẹn keghi wanniẹn wẹẹ, “Ghe mwẹ enọwanrẹn.”

¹⁷ Elai keghi nọ rẹn wẹẹ, “De emwi ne Nọyaẹnmwa tama ruẹn? Ghe rhie emwi rhọkpa lẹre mẹ. Osanobua gha ya obọ ne ọtọn mu ẹẹn a deghẹ u ma ta emwi ne ọ ta ẹe ma mwẹ.”

¹⁸ Ẹre Samuẹl na talọ emwi hia ma rẹn, ọ ma vbe ke ya vbọ hiehie. Elai keghi wanniẹn wẹẹ, “Rẹn ọrọre Nọyaẹnmwa, emwikemwi ne ọ kei sẹ vbe aro ẹre ọ re ọ ra ru.”

¹⁹ E Samuẹl keghi do wan, e Nọyaẹnmwa kegha rrọọ yaba ẹre, ọ na gie ẹmwẹ hia ne Samuẹl ta ẹe gha sẹ.

²⁰ Ẹre ivbi Izrẹl hia, ehe ne ọ sẹe, ehe ne ọ rhanmwẹ, na rẹn wẹ akhasẹ e Nọyaẹnmwa ọ re Samuẹl wa khin.

²¹ E Nọyaẹnmwa keghi wa gha rhie egbe maa vbe Silo, ehe ne ọ na rhie egbe ma Samuẹl, ọ na vbe guẹe guan, Izrẹl hia ghi wa gha rhie ẹmwẹ ọnrẹn.