I Samuẹl 29 - Edo Bible (E Baibol Ẹdo) Version 1996

Avbe Filistin Hee E Devid

¹ Ivbi e Filistin keghi viọ ivbiyokuo iran gha die Afẹk, vbene ivbi Izrẹl na si agọ iran bu ye ovbi ẹzẹ ne ọ rre Iya Jezrẹl.

² Enigie ivbi e Filistin isẹn nii, keghi viọ ivbiyokuo iran nii re arhin iyisẹn yan arriaisẹn (1,100) ladian, e Devid kevbe emwa rẹn keghi gha lele iran odieke dee, deba Akis.

³ Ọkaokuo ivbi e Filistin keghi kha wẹẹ, “De emwi ne avbe ivbi Hibru na ru vbe emwana yi?” Akis keghi wanniẹn wẹẹ, “E Devid ọna khin, ọkaokuo e Sọl ne ọba Izrẹl nọ, ehe ne I ye ọ re ọ ye ke ẹghẹ ne ọkpẹre gha dee, kevbe ne ọ ya bu mwẹ gha dee, ọ ma he ru emwi ọkpa ne I gha gbe ikhan yi.”

⁴ Sokpan, ohu Akis keghi mu avbe ivbiyokuo e Filistin, iran tama rẹn wẹẹ, “Wẹ ne ọmwa nii werriegbe gha rrie ẹvbo ne u mu ne ẹẹn. Ghẹ gie ẹe lele ima yo okuo, rhunmwuda, ọ gha sẹ ẹghẹ igbinna, ọ sẹtin fiwerriẹ mu aro da ima. De emwi ne ọ maa sẹ ne ọ gha ya dẹ aro nọ maa vbe obọ arowa ẹre gberra ne ọ gbele emwa ima?

⁵ A rhe ta ẹe na, ẹre Devid na nọ, ne ikhuo Izrẹl ya gha so ihuan, iran na vbe gha ku kha wẹẹ, ‘E Sọl gbele inu arriaisẹn ne ọ khin, sokpan e Devid gbele inu arriaisẹn igbigbe ne ọ khin.’ ”

⁶ Akis keghi tie Devid, ọ na tama rẹn wẹẹ, “I ye Osanobua Izrẹl ne ọ rrọ vẹn ihẹn wẹ u guobọ mwẹ kevbe wẹ ọ gha wa yẹ mwẹ ne u lele mwẹ gha rrie okuo na. I ma he miẹn a baku ru vbe obọ ruẹ ke ẹdẹ ne u bu mwẹ rre gha dee, sokpan, enigie nekpa ma kue ye ẹmwẹ ruẹn.

⁷ Werriegbe gha rrie owa vbe ọfumwegbe, ghẹ ru emwikemwi ne ọ gha mu iran ohu.”

⁸ E Devid keghi wanniẹn wẹẹ, “Vbe I a ghi ru yi? A deghẹ vbene u khare u ma he miẹn abakuru vbe obọ mwẹ ke ẹghẹ ne I ya suẹn gha ga a gha dee, vbọzẹ ne I i khian na lele uẹ yo, arowa mwẹ, kevbe ọba mwẹ ne I ya gu avbe eghian ruẹn gbinna?”

⁹ Akis keghi wanniẹn wẹẹ, “I rẹnrẹn, I ka a ba usun emwa ni gie a mu ẹtin yan zẹ vbene odibo Osanobua ye. Sokpan avbe enigie nekpa kha ne wẹ iran i gie uẹ lele ima gha rrie okuo.

¹⁰ Rhunmwuda ọnii nian, e Devid, owiẹ ne akhuẹ, wa hia ni lẹ sẹ e Sọl rae bu mwẹ gha dee, wa ghi kpaegbe vbe owiẹ fioo ne uwa gha rrie vbe ẹdẹ a da wan.”

¹¹ Ẹre Devid kevbe emwa rẹn na kpao vbe owiẹ vbirrivbirri vbe ẹdẹ ne ọ lele ẹe, iran na dọlegbe gha rrie Filistin. Ivbi e Filistin kegha rrie Jezrẹl.