I Samuẹl 28 - Edo Bible (E Baibol Ẹdo) Version 1996

¹ Ọ ghi kpee fua kherhe, ivbi e Filistin keghi si ivbiyokuo iran koko ne iran ya gu Izrẹl khọn, ẹre Akis na tama Devid wẹẹ, “I yayi ghẹ u rẹnrẹn wẹ te uwẹ vbe emwa ruẹn ra lele mwẹ yo igbinna?”

² E Devid keghi wanniẹn wẹẹ, “Wẹ rẹnrẹn wẹ ọguọmwadia ruẹ ọ re I khin, wẹ tobọ gha vbe miẹn emwi ne I gha ru.” Akis keghi kha wẹẹ, “Ọ wa maa, I gha ya ẹe ru ne I ya khẹ egbe mwẹ ẹdẹdẹmwẹdẹ.”

E Sọl Ya Miẹn Ọbo Ne Ọ Miẹn Ẹrinmwi

³ Vbe ẹghẹ na, e Samuẹl wu nẹ, ivbi Izrẹl ghi khiẹ ọre nẹ, iran na re ẹre ye Rama ne ẹvbo ẹre. E Sọl khulo iran ni fi iha kevbe iran ni miẹn ẹrinmwi hin otọ Izrẹl rre nẹ.

⁴ Ivbiyokuo e Filistin keghi si egbe koko, iran keghi bu agọ ye ẹvbo ne a tie ẹre Siunẹm; e Sọl keghi viọ ivbi Izrẹl, iran na ya bu agọ ye oke Gilboa.

⁵ E Sọl ghi miẹn ivbiyokuo e Filistin, ohan keghi mu ẹẹn.

⁶ Rhunmwuda ọnii, ọ keghi nọ e Nọyaẹnmwa emwi ne irẹn gha ru, sokpan, e Nọyaẹnmwa ma zẹdẹ rhie ewanniẹn ne ẹẹn, ọ re vbe imina nọ, ra uta, ra la obọ akhasẹ.

⁷ Ẹre Sọl ghi na khama emwa rẹn wẹẹ, “Wa gunmwẹ gualọ okhuo ne ọ miẹn ẹrinmwi, I gha yo ya gualọ otọ emwi vbe obọ ẹre.” Iran wanniẹn tama rẹn wẹẹ, “Ọkpa rre Ẹndọ.”

⁸ E Sọl keghi mu egbe ọmwa ọvbehe, ọ keghi viọ ukpọn ọvbehe ye egbe, ẹdẹ ghi mu nẹ, ọ keghi viọ eva vbe emwa rẹn ba egbe ne ọ ya miẹn okhuo nii. Rẹn keghi tama rẹn wẹẹ, “Nọ avbe ẹrinmwi mẹ ne u tama mwẹ emwi ne ọ ra sunu.” U ghi tie ẹhi ọmwa ne I ra ta eni ẹnrẹn ma ruẹn gun mwẹ.

⁹ Okhuo nii tama rẹn wẹẹ, “Vbe ẹmwata, wẹ rẹn emwi ne Sọl ne ọba ru wẹ ọ khulo iran ni fi iha kevbe iran ni miẹn ẹrinmwi hin otọ Izrẹl rre, vbe uwẹ ghi na khuẹn ifi na mẹ hẹ ne a miotọ na gbe mwẹ uan?”

¹⁰ E Sọl keghi vẹn ihẹn wẹẹ. “I ye eni e Nọyaẹnmwa nọ rrọọ vẹn ihẹn wẹ, a i ra rria ruẹ ikhi ye emwi ne u ra ru na.”

¹¹ Okhuo nii keghi nọ rẹn wẹẹ, “De ọmwa ne I gha tie gie uẹ?” Rẹn keghi wanniẹn wẹẹ, “E Samuẹl.”

¹² Okhuo nii ghi bẹghe Samuẹl, ọ keghi datu. Ọ na khama Sọl wẹẹ, “Vbọzẹ ne u na rẹrẹ mwẹ yi? Wẹ ọrọre Sọl ne ọba!”

¹³ Ọba keghi tama rẹn wẹẹ, “Ghe gie ohan mu ẹẹn. De emwi ne u hẹghe yi?” Okhuo nii keghi wanniẹn, “I miẹn vbe ẹrinmwi ọkpa ke uwu otọ ladian dee.”

¹⁴ Rẹn keghi nọ wẹẹ, “De emwi ne ọ khọe?” Okhuo ni keghi kha wẹẹ, “Ediọnmwa ọkpa nọ, ọ ladian dee, ọ mu agbada kinnọ egbe.” Ẹre Sọl na rẹn wẹ e Samuẹl nọ, rẹn keghi ghughẹrre ya ọghọ ne ẹn.

¹⁵ E Samuẹl keghi tama e Sọl wẹẹ, “Vbọzẹ ne u na kpokpo mwẹ yi? Demwi ne u tie mwẹ werriegbe rre ba?” E Sọl keghi wanniẹn wẹẹ, “Uwu ọlọghọmwa nọkhua ọ re I ye na! Avbe Filistin gun mwẹ gbinna, Osanobua vbe fi iyeke gbe mwẹ. Ọ ma ghi rhie ewanniẹn mẹ ọvbehe deghẹ la obọ avbe akhasẹ rre nọ ra imina, ọnii ọ sii ẹe ne I na tie ruẹ, ne u tama mwẹ emwi ne I gha ru.”

¹⁶ E Samuẹl keghi wanniẹn wẹẹ, “Vbe u a na gha tie mwẹ hẹ ugbẹn vbe a miẹn wẹ e Nọyaẹnmwa fi iyeke gbe uẹ nẹ, ighẹ ọ vbe khian oghian an?

¹⁷ Emwi ne Nọyaẹnmwa wẹ ne I tama ruẹn ẹghẹ nii ọ re ọ ru uẹ re na, e Nọyaẹnmwa miẹn ruẹn arriọba ni nẹ, ọ na mu ne Devid.

¹⁸ Wẹ ru vbene Nọyaẹnmwa khare, u ma wa fuẹn ivbi Amẹlẹk fo ke ẹe kevbe emwi ne iran mwẹ, ọ ni ọ sii ẹe ne Nọyaẹnmwa na ru uẹ emwi na.

¹⁹ Ọ gha rhie uwẹ kevbe ivbi Izrẹl yan avbe Filistin obọ ẹdẹnakhuẹ. wẹ kevbe avbe ivbi uẹ gha deba mwẹ, e Nọyaẹnmwa gha vbe viọ ivbiyokuo Izrẹl yan avbe Filistin obọ.”

²⁰ Vbe ọwarọkpa nii, e Sọl keghi de gbe otọ, ọ na lovbiẹ lele otọ lọlọọlọ, rhunmwuda, afianma ẹmwẹ ne Samuẹl ta ẹe fian ẹẹn. Orhiọn i vbe rre ọre iwu rhunmwuda, ọ ma rri evbare vbe avan nii kevbe asọn nii hia.

²¹ Okhuo nii keghi bu ẹre gha khian, ọ keghi miẹn wẹ ọ runraẹn, rẹn keghi rhunmwuda ọnii tama rẹn wẹẹ, “Dọmọ ọ, te I mẹ rhie uhunmwu mwẹ atataobọ vbe I gha ru emwi ne u tama mwẹ ne I ru.

²² Lahọ, ru emwi ne I nọ rẹn. Ghe evbare ne u re. Rri ọe ne orhiọn su ẹ ya khian.”

²³ E Sọl keghi he ọ na wẹ rẹn i rri emwi rhọkpa, sokpan, emwa rẹn keghi vbe rherhe ọe ne ọ rri evbare. Vbe okiekie, ọ keghi khuẹnniẹn yọ, ọ keghi kpao vbe otọ, ọ na tota ye ukpo.

²⁴ Okhuo nii na zẹgiẹgiẹ gbe ovbi ẹmila ne ọ ghaa bẹẹ, ọ keghi viọ irhuarhua, ọ keghi gbe ẹmila nii, ọ na le ebrẹd ne a ma rhie eyist yi.

²⁵ Ọ na mu evbare nii ye Sọl otọ ke ẹe kevbe emwa rẹn, iran na re. Iran keghi kpao vbe asọn ọkpa nii.