I Samuẹl 27 - Edo Bible (E Baibol Ẹdo) Version 1996

E Devid Vbe Uwu Ẹbu Ivbi E Filistin

¹ E Devid keghi tama egbe ẹre wẹẹ, “E Sọl gha gbe mwẹ uan ẹdẹ ọkpa. Emwi ne ọ ke mẹ sẹ ne I gha ru ọrọre ne I lẹ fua gha rrie Filistia. Ẹghẹ nii, e Sọl ghi hẹwẹ vbe ne ọ na te gualọ mwẹ khian vbe otọe Izrẹl, ẹghẹ nii, I ghi do miẹn uhunmwu.”

² Ẹre Devid ke ẹe kevbe emwa rẹn ni re arhin uri eha (600) na wa kpao gha bu Akis ne ovbi e Moak ne ọba Gat.

³ E Devid kevbe emwa rẹn keghi gbe ẹkun sẹ otọ vbe Gat iran kevbe ẹgbẹe iran. Amwẹ e Devid eva ighẹ Abinoam ne Jezrẹl kevbe Abigẹl ne amwẹ Nabal, ne ọ ke Kamẹl rre.

⁴ E Sọl ghi họn wẹ Devid lẹ gha rrie Gat, ọ na kẹtin vbe ne ọ na te gualọ ẹe.

⁵ E Devid keghi tama Akis wẹẹ, “A deghẹ ọse mwẹ u khin, rhie ovbi ẹvbo kherhe ọkpa mẹ ni I yin ẹnrẹn, ọ ma kei fo ne I deba ruẹ gha rre igiogbẹ ẹvbo ruẹ.”

⁶ Ẹre Akis na mu Ziklag ne ẹẹn. Ọna ọ re ọ sii ẹe ne a na miẹn wẹ avbe ọba Juda ọ re ọ yan Ziklag ke ẹghẹ nii gha dee.

⁷ E Devid keghi gbe uki enẹ irrọvbugie vbe Filistia.

⁸ E Devid kevbe emwa rẹn ghi mu igbinna gie emwa Gẹsiọ, Gizi kevbe Amalẹk ni ka rre otọe nii de yi ke nẹkpo i mwẹẹ arria gha dee. Ọ ghi fu emwi ni rre otọ iran ya sẹ Siọ kevbe rhinrin ya sẹ Igipt,

⁹ ọ ghi gbele ikpia kevbe ikhuo ni rrọọ hia, ọ ghi viọ avbe ohuan ẹmila, ekẹtẹkẹtẹ, ogologo, uhin ya sẹ egbe ukpọn. Ọ ghi vbe werriegbe gha rrie Akis.

¹⁰ Ọ ni ghi nọ rẹn wẹẹ, “De odẹ ne u na ya hẹ rhu emwa ẹghẹ na yi?” E Devid ghi tama rẹn wẹ odẹ ekẹn ọghe otọe Juda nọ, ra otọe ivbi Jeramel ra otọe ne emwa Ken ye.

¹¹ E Devid ghi gbele emwa hia ke ikpia kevbe ikhuo, ne a ghẹ miẹn ọmwa ne ọ gha yo ya kha vbe Gat emwi ne irẹn vbe emwa rẹn ru. Erriọ Devid wa gha ru ẹe vbe ẹghẹ ne ọ ya ẹe vbe Filistia hia.

¹² Akis keghi mu ẹtin yan Devid, ọ wẹẹ, “Ivbi Izrẹl ne emwa rẹn khu iwu ẹre sẹrriọ wẹ mẹ ọ re ọ ra gha ga ẹdẹdẹmwẹdẹ.”