I Samuẹl 26 - Edo Bible (E Baibol Ẹdo) Version 1996

E Devid Vbe Dọlegbe Zẹ E Sọl Obọ

¹ Emwa eso keghi ke Zif gha dee do tama e Sọl vbe Gibea wẹ e Devid lẹre ye Oke Hakila vbe okhiẹ ẹgbo Juda.

² Ẹre Sọl na wa zẹgiẹgiẹ viọ arriaisẹn eha vbe avbe ivbiyokuo ni guẹ igbinna sẹ vbe Izrẹl ne ọ ya gualọ e Devid vbe ẹgbo e Zif.

³ Ọ keghi si agọ bu vbe ọkpẹn odẹ Oke Hakila. E Devid he wa ye rre uwu oha nii, ọ ghi họn wẹ e Sọl rre do gualọ irẹn.

⁴ Ọ keghi gie ọrhẹ gha khian, iran keghi miẹn wẹ ẹmwata nọ wẹ e Sọl gele rre evba.

⁵ Rẹn keghi wa zẹgiẹgiẹ gha khian ne ọ wa ta ẹe rhuan ẹse ighẹ ehe ne Sọl kevbe Abna ne ovbi e Nẹẹ, ne ọkaokuo ẹ Sọl, vbiẹre. E Sọl vbiẹ uwu agọ, emwa rẹn keghi bu agọ lẹga ẹre.

⁶ Ẹre Devid na nọ Ahimẹlẹk ne ovbi ẹvbo Hiti kevbe Abisiai ne ọtẹn Joab wẹẹ (iye iran ọre a tie ẹre Zẹruia), “Gha ọ gha lele mwẹ gha rrie agọ e Sọl vbe uwu uwa yi?” Abisiai keghi wanniẹn wẹẹ, “I gha yo.”

⁷ Asọn nii, e Devid kevbe Abisiai keghi la uwu agọ e Sọl, iran ghi do ghe e Sọl gha vbiẹ vbe adesẹ agọ, a so asoro ẹre ye otọ vbe ọkpẹn uhunmwu ẹnrẹn. Abna kevbe avbe ivbiyokuo hia lẹga ẹre, iran vbiẹ ua.

⁸ Abisiai keghi tama Devid wẹẹ, “Osanobua rhie eghian ruẹn ye uẹ obọ ẹrẹna, banbanna nian, gun mwẹ ye asoro ọghe ọe hae ginna otọ, uhukpa kẹkan, II i ra vbe fi ẹre re ukpogieva!”

⁹ Sokpan, e Devid keghi wanniẹn wẹẹ, “Ghẹ ru ẹre emwi rhọkpa, ẹ i mwẹ e Nọyaẹnmwa ma rria ọmwaikọmwa ne ọ ru ọba ne irẹn zẹe emwi ikhi.”

¹⁰ E Devid keghi rhiete ẹe wẹẹ, “I ya Nọyaẹnmwa ne ọ rrọọ vẹn ihẹn wẹ, e Nọyaẹnmwa tobọ ẹre ọ re ọ ra gbe Sọl deghẹ vbe ẹghẹ ọ re a ghi sẹ nẹ nọ, ra vbe okuo.

¹¹ A wua ne Osanobua wẹ ne imẹ danmwẹ ọẹn ghe ne I ru ọba ne Osanobua maẹn emwi. Gie ima viọ asoro kevbe ọgọ amẹ ọnrẹn ne a kpao.”

¹² Ẹre Devid na mu ọgọ amẹ kevbe asoro ni rre ọkpẹn uhunmwu e Sọl, rẹn kevbe Abisiai keghi kpao. Ọmwa rhọkpa ma bẹghe ẹre ra ne iran rẹn emwi ne ọ sunu, amawẹ ne iran rhiọrre, ehia keghi wa vbiẹ ua, rhunmwuda, e Nọyaẹnmwa fian ovbe nọkhua ku iran.

¹³ Ọ re Devid na fian odẹ rra ghe obọ nọkpa vbe iya ni la uhunmwu oke, ọ keghi khian rrei ẹsẹse.

¹⁴ Ọ keghi go tie ivbiyokuo e Sọl kevbe Abna wẹẹ, “Abna, u họn ẹmwẹ ne I ta ra?” Abna keghi kha wẹẹ, “Gha ọnii khin ne ọ go ye ọba ehọ yi?”

¹⁵ E Devid keghi kha wẹẹ, “Okpia u gele khin ra ẹ i re rriọ? Ẹre uwẹ ọ re ọmwa ne ọ ghi kpọlọ sẹ vbe otọ Izrẹl? Vbọ ghi zẹ yi ne u ma na degue arowa a ighẹ ọba? Orhiọnkpa te la uwu agọ ne ọ do gbe arowa a.

¹⁶ U ma sẹtin winna iwinna ruẹn Abna! I ye eni Nọyaẹnmwa nọ rrọọ vẹn ihẹn wẹ te ọ kere ne uwa hia wulo rhunmwuda, wa ma sẹtin gbearoghe arowa uwa ne Nọyaẹnmwa ma ẹre ọba. Ghe! Asoro ọba vboo? Ọgọ amẹ ne ọ mu ke uhunmwu vboo?”

¹⁷ E Sọl keghi mu urhu e Devid, ọ na nọ rẹn wẹẹ, “Devid wẹ ọnii khin ra ovbi mwẹ?” E Devid keghi wanniẹn wẹẹ, “Mẹ nọ Umogun.”

¹⁸ Ọ keghi rhie te ẹe wẹẹ, “Vbọzẹ ne u na ye khu mwẹ khian, mẹ ne ọguọmwadia ruẹ? Vbe i a mobọ ru? De a i ghẹ ru ne I ru?

¹⁹ U ghi danmwehọ mwẹ, Umogun. A deghẹ e Nọyaẹnmwa ọ re ọ werriẹ ruẹ aro da mwẹ, a gha zọ ese imuohan gie ẹe, ọ gha fi ekhọe werriẹ, sokpan, a deghẹ emwa ne agbọn ọ re ọ ru ẹe, e Nọyaẹnmwa ọ re ọ gha fi iran unu. Rhunmwuda, iran khu mwẹ hin otọe e Nọyaẹnmwa rre. Iran wẹ ne I ya gha ga ẹbọ ẹrrẹe, kevbe ne I vbe gbe ihoi vbe otọe ne Nọyaẹnmwa mu ne emwa rẹn.

²⁰ Ghẹ gia gbe mwẹ uan ye otọe ẹrrẹe, vbe a lahin ehe ne Nọyaẹnmwa ye rre. Vbọzẹ ne ọba Izrẹl na ladian ne ọ do gbe ovbiọkhọe vbene imẹ ye na? vbe ọ ghi ru ọbafi mwẹ khian hẹ yi vbe ne ọ ru ọbafi ahianmwẹ ne oha?”

²¹ E Sọl keghi wanniẹn wẹẹ, “I baeku ru nẹ. Dọlegbe gha dee, e Devid ne ovbi mwẹ. I i ghi ruẹ emwi rhọkpa ọvbehe rhunmwuda, u ma gbe mwẹ uan ẹrẹna. Akpa ọ re I gha khin! Emwi dan ne ọ mu ohan ọ re I wa ru!”

²² E Devid keghi wanniẹn wẹẹ. “Ghe asoro ruẹ vbe emwa, Umogun, gie ọkpa vbe uwu emwa ruẹn gha dee ne ọ do rhie ẹre.

²³ E Nọyaẹnmwa ọ re ọ san iran ne emwa ẹmwata ni ru emwi ẹse, ẹse. Ẹrẹna nian, ọ rhie ruẹ yo mwẹ obọ sokpan I ma ru uẹ emwi rhọkpa, wẹ ne Nọyaẹnmwa ma ẹre ọba.

²⁴ Zẹ vbene I sẹ uẹ rae ẹrẹna, te Nọyaẹnmwa, gha vbe ru imẹ vberriọ, ne ọ fan mwẹ fua hin uwu ọlọghọmwa hia rre.”

²⁵ E Sọl keghi tama e Devid wẹẹ, “Te Osanobua gha fiangbe uẹ ovbi mwẹ. Te emwi hia ne u ru gha dinna odẹ nuẹn!” Ẹre Devid na lele odẹ, e Sọl keghi werriegbe gha die owa.