I Samuẹl 25 - Edo Bible (E Baibol Ẹdo) Version 1996

Uwu E Samuẹl

¹ E Samuẹl keghi wu, ọre ivbi Izrẹl hia na si koko, iran na do khiẹ ọre. Iran na ghi re ẹre ye Rama ne ẹvbo ẹre. Vbe iyeke ọnọna, e Devid keghi kpao, ọ na gha rrie ẹgbo ọghe Paran.

E Devid Kevbe Abigẹl

^2-3 Okpia ọkpa kegha rrọ vbe ẹwae Keleb, a keghi tie eni ẹnrẹn Nabal. Ovbi ẹvbo ne a tie ẹre Moan nọ, sokpan, ẹvbo ne a tie ẹre Kamẹl ọ re ọ na gha winna ọ keghi re ọmwa ne ọ fe ẹsẹse, ọ kegha mwẹ ohuan arriaisẹn eha (3,000) kevbe ẹwe arriaisẹn (1,000). A kegha tie ọvbokhan rẹn Abigẹl, okhuo na keghi wa mose, ẹwaẹn vbe gba ne ẹẹn, sokpan ọdafẹn ọnrẹn kegha re ọmwa oya ne egbe balọ. E Nabal keghi gia eto ohuan ẹnrẹn vbe kamẹl,

⁴ e Devid kegha rre uwu ẹgbo nii, ọ keghi họn.

⁵ Ọre ọna gie igbama igbe ne iran gha rrie Kamẹl, ya gualọ ẹe miẹn ne iran vbe wẹ ẹre do.

⁶ Ọna tama iran wẹ ne iran tama e Nabal wẹẹ, “E Devid wẹ do, ọse mwẹ, ọ na erhunmwu guẹ ẹsẹse, kevbe ẹgbẹe ruẹ kevbe emwi ruẹn hia.

⁷ Ọ họẹn wẹ u gha gia eto ohuan ruẹn, ọ vbe ho ne u rẹn wẹ ke ima kevbe avbe ọsuohuan ruẹn ọ re ogba rrọ usin, ma ma vbe ru iran emwi rhọkpa. A ma vbe do emwi iran ọkpa rhie vbe uwu ẹghẹ ne iran ya gha rre Kamẹl hia gha dee.

⁸ Nọ iran, iran gha tama ruẹn. E Devid wẹ ne u rhan obọ itohan miẹn emwa irẹn rhunmwuda ma gha rrie edinran vbe ẹdẹ eghọ. Rhunmwuda ọnii, viọ emwi ne obọ ruẹ gbare ne ima ne eguọmwadia ruẹ; kevbe Devid ne ọ siọ ne ọ ghaan.”

⁹ Emwa e Devid keghi ya ta uhunmwu na ma Nabal zẹ vbene Devid gie. Iran na mudia vbe evba.

¹⁰ Vbe okiekie, e Nabal keghi wanniẹn wẹẹ, “E Devid? De Ọmwa ne a tie vberriọ. yi? I ma he họn ẹmwẹ ọnrẹn ẹdẹ. Ẹ i re avbiẹ eviẹn ni lẹkua ọ ghi rre ẹvbo!

¹¹ Mẹ i rhie ebrẹd mwẹ ra amẹ mwẹ ra emiowo ne I gbele ne iran ni gun mwẹ gia eto ohuan, ne I viọ gie emwa ne a ma rẹn ẹvbo ne iran ke rre!”

¹² Emwa Devid keghi bu ẹre gha khian, iran na ya tama rẹn vbene Nabal kha hẹ.

¹³ Ọ keghi tama iran hia wẹẹ, “Wa gbalọ agbada, uwa.” Iran keghi gele ru vberriọ, e Devid keghi vbe mu ọghọe gba, ọ na viọ omwa uri eva vbe emwa rẹn mwẹ, vbene uri ọkpa na tota ke emwi vbe owa, vbe ehe ne evbare ye.

¹⁴ Ọkpa vbe uwu avbe eguọmwadia e Nabal keghi tama Abigẹl ne amwẹ Nabal wẹẹ, “Vbe u a a ye ehọ yi? E Devid gie emwa eso wẹ ne iran do wẹ arowa ima do sokpan, rẹn keghi wa rhovbiẹ iran,

¹⁵ vberriọ, te iran wa gha maa ima egbe ẹsẹse, iran ma kpokpo ima hiehiere, ẹghẹ ne ima vbe iran gba ya vbe oha hia, emwi ima ọkpa ma vbe wi.

¹⁶ Iran keghi tan ifuẹn gue ima asọn kevbe avan vbe ẹghẹ ne ima na gha rre ehe ne iran ye gbe aro ghe ohuan ima.

¹⁷ Ya roro ẹmwẹ na ne u rẹn vbene u gha ru ẹe hẹ. Emwi nọkhua sẹtin la ekpa ọna rre do degbe arowa ima kevbe ẹgbẹe ọre. Ọ rhia sẹrriọ wẹ ẹ i danmwehọ ọmwa rhọkpa!”

¹⁸ Abigẹl keghi zẹgiẹgiẹ viọ ududu ebrẹd uri, ẹkpo ohian ayọn eva ohuan ne a ranmwẹ isẹn, ititi ọmọ azara ne a ka re iyisẹn, ududu ọmọ ohọ ne a ka re uri, ọ na kuẹn ehia yan ekẹtẹkẹtẹ.

¹⁹ Ọ na tama avbe eguọmwadia wẹẹ, “Wa khianmwu, I lele uwa dee vbe odieke.” Sokpan ọ ma ta ẹmwẹ rhọkpa ma ọdafẹn ọnrẹn.

²⁰ Ọ ghi wa hin ekẹtẹkẹtẹ la ehe ne odẹ na gọ vbe uhunmwu oke, ghe ẹre ghe Devid, ke ẹe kevbe emwa rẹn vbe iran bu ẹre dee.

²¹ E Devid keghi ka gha roro ẹe wẹẹ, “Vbọzẹ ne I na tan ifuẹn gaa emwi oko nii vbe uwu oha vbe edinran, emwi ẹnrẹn rhọkpa ne a do rhie ẹ i rrọọ, ọna ọ re ọ ghi ya san mwẹ ẹse ne I ru ne ẹẹn?

²² Te Osanobua gha kinmwi mwẹ gbe ua a deghẹ ima gbele emwa rẹn hia ne ọ ghẹ ghi ke ẹe vbọ ọ te sẹ owiẹ!”

²³ Abigẹl ghi dẹghe e Devid, ọ keghi zẹgiẹ tuorre, ọ na mu ẹko rhuotọ

²⁴ vbe akharha e Devid, ọ keghi tama rẹn wẹẹ, “Lahọ danmwehọ mwẹ adazẹ, kha ighẹ mẹ ọ re ọ ru ehia.

²⁵ Lahọ ghẹ zẹ ye Nabal re ighẹ ẹwobi ọmwa nii. Emwi ne a ya eni ẹnrẹn kha ọre gele wa nọ — akpa! I ma miẹn emwa ne u gie rre adazẹ.

²⁶ E Nọyaẹnmwa ọ re ọ ma guẹ rria ikhi ne egbe ruẹ ne u gbele avbe eghian ruẹn. Banbanna nian, mẹ ya eni e Nọyaẹnmwa ne ọ rrọ vẹn ihẹn ma ruẹn wẹ, eghian ruẹn hia kevbe emwa ni te gualọ odẹ ne iran gha la ruẹ re, vbene a ra rri e Nabal oya ọ re a ra vbe rri iran oya.

²⁷ Lahọ adazẹ, miẹn mwẹ emwi ne I viọ guẹ na ne u viọ ne emwa ruẹn.

²⁸ Lahọ u ghi ya bọ mwẹ, adazẹ, ighẹ a baku ru mwẹ hia, e Nọyaẹnmwa gha ya uwẹ rriọba kevbe avbe ivbi uẹ ba ẹre. Rhunmwuda, okuo ẹre ọ re u khọn, u i ra vbe ru emwi ne ọ ma gba vbe ẹdẹ agbọn ruẹn hia.

²⁹ Adeghẹ ọmwaikọmwa vbe dekun ruẹn, ọ na wẹ rẹn ra gbe ua, e Nọyaẹnmwa, Osanobua ruẹ gha rhie ruẹ lẹre, zẹ vbene ọmwa rhie emwi ighobioye lẹre. Zẹ vbe ọghe avbe eghian ruẹn, vbene ọ rhirhi a gha ye hẹ, e Nọyaẹnmwa gha filo iran kua zẹ vbe ne ọmwa ye umọvọn filo okuta kua.

³⁰ E Nọyaẹnmwa ghẹ ghi ru emwi esi ne ọ yan ma ruẹn na hia nẹ, ọ na vbe ya a rri ọba Izrẹl.

³¹ U i ra gha gbe I ma rẹn ra ne ẹko gha balọ ọ, adazẹ, rhunmwuda ighẹ u gbe ọmwa ran vbe ne ẹ i na mwẹ otọ ra u rria ikhi ne egbe ruẹ. E Nọyaẹnmwa ghẹ ghi fiangbe uẹ nẹ, adazẹ, ghẹ mianmian mwẹ.”

³² E Devid keghi wanniẹn tama rẹn wẹẹ, “Rhie urhomwẹ ne Nọyaẹnmwa ne Osanobua Izrẹl ne ọ gie uẹ bu mwẹ gha dee ẹrẹna!

³³ Kpọnmwẹ Osanobua ye ẹwaẹn esi ruẹ kevbe emwi ne u ru ẹrẹna ne u ma na gun mwẹ ru a i ghẹru de izigha kevbe ne u ma na gun mwẹ rria ikhi egbe mwẹ.

³⁴ E Nọyaẹnmwa ọ re ọ ma gun mwẹ ruẹ emwirhọkpa. Debare, akpawẹ u ma zẹgiẹgiẹ do vba mwẹ, I ye eni Osanobua Izrẹl nọ rrọọ vẹn ihẹn wẹ vbe ọ te sẹ owiẹ, emwa Nabal hia gha wulo.”

³⁵ Ẹre Devid na miẹn ẹre emwi ne ọ viọ gie ẹe, ọ na tama rẹn wẹẹ, “Werriegbe gha rrie owa, ghẹ vbe fian afianma. I gha ru vbene u ho.”

³⁶ Abigẹl keghi bu e Nabal gha khian vbe ọ wa rre eghọ, egbe ne ọ kei ne ọba. Ayọn gbe ẹe, ọ keghi wa vbe hẹ yo hẹ rre, rhunmwuda ọnii, Abigẹl ma vbe ta ẹmwẹ ọkpa ma rẹn ẹdẹ te dọ gbe.

³⁷ Aro ghi gbannọẹn nẹ, ọ keghi na iyẹn emwi hia ma rẹn. Egbe keghi ku ẹre ohiọnhiọn, arọ na wa kinmwi ẹẹn,

³⁸ ọ ghi te gha vbe ikpẹdẹ igbe, e Nọyaẹnmwa keghi fi e Nabal emwi, ọ na wu.

³⁹ Ugbẹn vbe Devid ghi họn wẹ Nabal wu, ọ keghi kha wẹẹ, “Rhie urhomwẹ ne Nọyaẹnmwa, ọ rria Nabal ikhi ye ihẹn ne ọ tie mẹ, ọ ma gie imẹ ne ọguọmwadia ẹre ru a i ghẹru. E Nọyaẹnmwa rria e Nabal ikhi ye emwi dan ne ọ ru.” Ẹre Devid na gie ne a khama Abigẹl wẹ rẹn ho ne irẹn si ẹre ẹgbẹe.

⁴⁰ Eguọmwadia keghi bu ẹre gha rrie Kamẹl, iran keghi tama rẹn wẹẹ, “E Devid ọ re ọ gie ima gha dee wẹ ne ima rhie ruẹ rre ne u do gha re amwẹ irẹn.”

⁴¹ Abigẹl keghi vbokho uhunmwu rri otọ, ọ wẹẹ, “Ọguọmwadia ẹre, ne ọ mu egbe ne ọ kpe avbe eguọmwadia ẹre owẹ, ọ re imẹ khin.”

⁴² Ọ keghi zẹgiẹgiẹ kpaegbe, ọ na hin ekẹtẹkẹtẹ ọre. Eguọmwadia ẹre ne ikhuo isẹn keghi lele ẹe, ọ kevbe lele eguọmwadia e Devid gha khian, ọ na ya gha re amwẹ ọnrẹn.

⁴³ E Devid keghi rhie Ahinoam ne ovbi ẹvbo ne a tie ẹre Jezrẹl rọnmwẹ, Abigẹl keghi vbe do gha re amwẹ ọnrẹn na.

⁴⁴ Vbe ẹghẹ ne a kha na, e Sọl rhie Mikal ne ovbi ẹre ne ọ te re amwẹ Devid ne Palti ne ovbi e Lais nẹ, ovbi ẹvbo ne a tie ẹre Galim nọ.