I Samuẹl 24 - Edo Bible (E Baibol Ẹdo) Version 1996

E Devid Ma Gbe Sọl Rua

¹ E Sọl ghi ke ehe ne ọ na ya gu ivbi e Filistin gbinna rre, iran keghi tama rẹn wẹ e Devid rre uwu oha vbe ọkpẹn Ẹngẹdi.

² E Sọl keghi viọ omwa arriaisẹn eha vbe uwu emwa rẹn ni guara gbinna sẹẹ vbe Izrẹl, ọ na suẹn ya gha gualọ e Devid vbe emwa rẹn, vbe odẹ ahọ ọghe Okuta Ẹwe Oha.

³ Ọ keghi do sẹ uvun okuta ọkpa ne ọ sikẹ ehe ne ohuan na rria vbe ọkpẹn odẹ, ọ na la uwu ẹre ne ọ ya ghughẹ. A keghi miẹn wẹ e Devid kevbe emwa rẹn rre uwu ẹre gban an vbe ehe ne iran na lẹre.

⁴ Iran keghi tama rẹn wẹẹ, “Ẹghẹ ruẹ ọna khin na, e Nọyaẹnmwa tama ruẹn wẹ rẹn gha rhie eghian ruẹn yan ruẹn obọ, u ghi ru ẹre emwi ne ọ rhirhi khọn ruẹn.” E Devid keghi baba gha khian, ọ na ya fian vbe ehọ ukpọn ẹwu e Sọl vbene Sọl ma na rẹn.

⁵ Sokpan, ekhọe e Devid keghi do gha fi ẹre asan.

⁶ Ọ keghi tama emwa rẹn wẹẹ, “E Nọyaẹnmwa ghẹ gun mwẹ ru arowa mwẹ, ọmwa ne Nọyaẹnmwa ma re ọba, emwi rhọkpa. Ọ ma kei ne I ya obọ kan rẹn, rhunmwuda, ọba ne Nọyaẹnmwa zẹe nọ.”

⁷ Ẹre Devid na ya emwa rẹn gbe ibiẹ rrie ne iran ghẹ dekun e Sọl. E Sọl keghi kpaegbe, ọ ladian vbe uwu uvun, ọ na gha khian.

⁸ Ẹre Devid na lele ẹe, ọ na da tie ẹre wẹẹ, “U gha tọ u kpẹre Umogun!” E Sọl keghi fi egbe werriẹ, e Devid keghi vbokho uhunmwu rre tue ọre otuẹ ọghọ.

⁹ Ọ tama rẹn wẹẹ, “Vbọzẹ ne u na zẹ ye emwa ni tama ruẹn wẹ mẹ ho ne I gbe uẹ ua re?

¹⁰ Wẹ gha tobọ miẹn nian wẹ te Nọyaẹnmwa wa rhie ruẹ yọmwẹ obọ ẹrẹna vbe uwu uvun okuta nii. Emwa mwẹ eso te wẹ ne I gbe uẹ ua sokpan ohan ruẹn keghi to mwẹ, I na wẹ I i ya obọ kan ruẹn hiehiere rhunmwuda, wẹ ọ re ọmwa ne Nọyaẹnmwa zẹe ne ọ gha re ọba.

¹¹ Ghe o erha mwẹ, ghe osọnmwẹ ẹwu ruẹ vbe ọbo mwẹ! I fian ẹn rhie vbene I ma na gbe uẹ ua. Ọ kere ne ọ ni ya a rẹn wẹ I ma kha ighẹ I gha sọtẹ ruẹ ra ne I ruẹ emwi rhọkpa. A gha rhe miẹn wẹ, te uwẹ khu mwẹ khian ne u gbe mwẹ uan, I ma rukhọ ghe ruẹ.

¹² E Nọyaẹnmwa ọ re ọ ghi bu ohiẹn ne ọ diyi vbe imẹ vbe ruẹ. Te ọ gha rria ruẹ ikhi ye emwi ne u ru mwẹ re na, rhunmwuda, mẹ i ra ya obọ mwẹ kan ruẹn hiehiere.

¹³ Wẹ họn ẹn vbe a ya ẹe kpa itan wẹẹ, ‘Emwa dan ọ re ọ ru emwi dan,’ sokpan mẹ i ra ya obọ kan ruẹn.

¹⁴ Ghe emwi ne ọba Izrẹl ho ne ọ gbe ua! Ghe emwi ne ọ khu khian, ekita ne ọ wu, ovbi ọkhọe.

¹⁵ E Nọyaẹnmwa gha bu ohiẹn, ọ gha ta ne ọ diyi vbe uwu ima. Te ọ gha guan ye ẹmwẹ na, ọ ghi degue mwẹ, ọ ghi miẹn mwẹ fan vbe ọbo ruẹ.”

¹⁶ E Devid ghi guan fo nẹ, e Sọl keghi kha wẹẹ, “Wẹ ọnii gele khin ra Devid ne ovbi mwẹ?” Ọ keghi suẹn gha viẹ.

¹⁷ Ẹre ọ na tama e Devid wẹẹ, “Wẹ ọ re ọ rri ase, mẹ ọ re ọ rukhọ. Te uwẹ wa gha maa mẹ, vbene imẹ na gha ruẹ khọ.

¹⁸ U rhie ma mwẹ ẹdẹ nẹrẹ na vbene ekhọe ruẹ ma ghe mwẹ hẹ, rhunmwuda u ma gbe mwẹ uan vbe Nọyaẹnmwa rhie mwẹ ye uẹ obọ.

¹⁹ Avbe miẹn ra wẹ obọ ọmwa vba oghian rẹn, ọ zọrobọ ne ọ gha rrie vbe ne ẹ i na ru ẹre emwi rhọkpa? Te Osanobua gha fiangbe uẹ ye emwi ne u ru mẹ ẹrẹna!

²⁰ Banbanna nian, aro mwẹ dae nẹ wẹ u gha rriọba vbe Izrẹl kevbe wẹ arriọba na gha wa gha rre obọ ruẹ khian.

²¹ Ye eni Nọyaẹnmwa yan ma mwẹ wẹ u gha sẹ ivbi mwẹ rae ye agbọn ne a ghe miẹn wẹ eni mwẹ kevbe eni ẹgbẹe mwẹ wa gbe ẹro.”

²² E Devid keghi yan wẹ rẹn gha ru vberriọ. Ẹre Sọl na gha rrie owa, e Devid kevbe emwa rẹn kegha rrie ehe ne iran lẹre yi.