I Samuẹl 23 - Edo Bible (E Baibol Ẹdo) Version 1996

E Devid Miẹn Ẹvbo Keila Fan

¹ E Devid keghi họn wẹ ivbi e Filistin gha gu ẹvbo ne a tie ẹre Keila khọn, iran gha vbe do ọka ne iran da fian hẹ.

² Rhunmwuda ọnii, rẹn keghi nọ e Nọyaẹnmwa wẹẹ, “Ne I ya gu ivbie Filistin gbinna ra?” E Nọyaẹnmwa keghi wanniẹn wẹẹ, “Ẹn gha khian ya gu iran gbinna ne u vbe miẹn Keila fan.”

³ Sokpan, emwa Devid keghi tama rẹn wẹẹ, “Ehe ne ima ye vbe Juda na, emwi ne ọ si afianma ye ọmwa egbe sẹe vbọ, a deghẹ ma ghi vbe gha rrie Keila ya gu ivbi e Filistin khọn, ẹre te emwi hia ghi wa dọlegbe kulo.”

⁴ Ẹre Devid na dọlegbe nọ e Nọyaẹnmwa, e Nọyaẹnmwa keghi tama rẹn wẹẹ, “Ya gu e Keila gbinna rhunmwuda I gha rhie akhọnmiotọ nuẹn.”

⁵ Ẹre Devid kevbe emwa rẹn na gha rrie Keila, iran keghi dekun ivbi e Filistin, iran na gbele ni bun vbe uwu iran, iran na viọ emwi irri iran. Erriọ ọre Devid ya miẹn ẹvbo nii fan.

⁶ Ugbẹn vbe Abiata ne ovbi Ahimẹlẹk ghi lẹfua, ọ keghi mu adaghọ ni ọ na ya vba e Devid vbe Keila.

⁷ Iran keghi do tama e Sọl wẹ, Devid rrie Keila, rẹn keghi kha wẹẹ, “Osanobua rhie ẹre yọ mwẹ obọ nẹ. E Devid ya lẹ fi ẹvbo ne a gbe ekẹn ga, a na viọ ọkhẹ ye odẹ ne a la larọ, ọ khui egbe ye imu.”

⁸ Ẹre Sọl na koko emwa igbinna rẹn, wẹ ne iran gha rrie Keila ne iran ya gu e Devid ke emwa rẹn gbinna.

⁹ E Devid ghi họn wẹ e Sọl ra do gu irẹn gbinna, ọ keghi tama Abiata ne ohẹn wẹẹ, “Mu adaghọ nii gha di emwa.”

¹⁰ Ẹre Devid na kha wẹẹ, “E Nọyaẹnmwa, Osanobua Izrẹl, I họn ẹn wẹ e Sọl die Keila do dunmwu ẹẹn ruan rhunmwuda imẹ ne ọguọmwadia ruẹ.

¹¹ Emwa Keila gha mu mwẹ gie Sọl ra? E Sọl gha gele rre ra vbene I họẹn na? I rinmwian, e Nọyaẹnmwa, Osanobua Izrẹl, rhie ewanniẹn mẹ!” E Nọyaẹnmwa keghi kha wẹẹ, “E Sọl gha rre.”

¹² E Devid keghi vbe nọ wẹẹ, “Emwa Keila gha mu mwẹ kevbe emwa mwẹ viọ gie Sọl ra?” E Nọyaẹnmwa keghi kha wẹẹ, “Iran gha ru ẹe.”

¹³ Rhunmwuda ọnii, e Devid kevbe emwa rẹn ni sẹ ọmwa arhin uri eha (600) keghi kpao vbe Keila rre, iran na deyan okhian. E Sọl ghi họn wẹ Devid kpao vbe Keila rre nẹ, ọ ma ghi yo.

E Devid Vbe Ẹvbo Uhunmwu Oke

¹⁴ E Devid keghi ya lẹre ye ẹvbo uhunmwu oke ne oha vbe ọkpẹn e Zif. E Sọl kegha hia vbe odẹikodẹ ne obọ irẹn vba ẹre, sokpan Osanobua ma rhie ẹre ne ẹẹn.

¹⁵ Sevba, te ohan ye gha mu e Devid rhunmwuda, te Sọl wa mu egbe ne ọ gbe ẹe rua. E Devid kegha rre Hores vbe ẹvbo oha vbe ọkpẹn Zif.

¹⁶ E Jonatan keghi ya vba ẹre vbe evba, ọ na rhie igiẹdu ne ẹẹn wẹ, ẹ i mwẹ Osanobua ma degue ẹre.

¹⁷ E Jonatan keghi tama rẹn wẹẹ, “Ghe gie ohan mu ẹẹn, e Sọl ne erha mwẹ i ra sẹtin ru uẹ emwirhọkpa, U gha rriọba vbe Izrẹl, mẹ ghi gha re ne ọ zẹ diake uwẹ zẹ vbene erha mwẹ tobọ ẹre wa vbe rẹn ẹsẹse.”

¹⁸ Iran eva keghi gba vẹn ihẹn ne egbe. E Devid kegha rrie Hores, e Jonatan na gha rrie owa.

¹⁹ Emwa eso keghi ke Zif kpao bu e Sọl gha rrie Gibea, iran tama rẹn wẹẹ, “E Devid lẹre ye otọ ima vbe Hores ne uhunmwu oke Hakila vbe odẹ ekẹn ọghe ẹgbo Juda.

²⁰ Ma rẹnrẹn, Umogun, ighẹ u ho ẹsẹse ne obọ ruẹ vba ẹre, u ghi gha dee nian, ma gha ru ẹe ne obọ ruẹ vba ẹre.”

²¹ E Sọl keghi wanniẹn wẹẹ, “Te Osanobua gha fiangbe uwa ne uwa na tohan mwẹ vberriọ!

²² Wa ya dọlegbe gualọ otọ ẹre ẹse, wa gualọ otọ ehe ne ọ wa ye kevbe ọmwa ne ọ miẹn ọẹn vbe evba. Iran tama mwẹ wẹ ọ gu ẹwaẹn gbe.

²³ Wa gualọ otọ avbe ehe ne ọ wa lẹre yi dandaandan, ne uwa wa do tama mwẹ. Ẹghẹ nii, I ghi lele uwa gha khian, a deghẹ ọ ye rre ẹdogbo nii, I ghi gualọ ẹe miẹn, ọ gha khọn rẹn wẹ ne I gha na wa gualọ ẹe la otọ e Juda hia nọ.”

²⁴ Ẹre iran na werriegbe, iran na karo ne Sọl gha rrie Zif. E Devid kevbe emwa rẹn kegha rre uwu ẹgbo e Moan vbe otọe iya ne emwa i ye vbe odẹ ekẹn ọghe nene ẹgbo.

²⁵ E Sọl kevbe emwa rẹn keghi ladian ya gha gualọ e Devid khian, sokpan, rẹn họẹn, ọ na gha rrie iya okuta ne ọ rre ẹgbo Moan, ọ na ya gha rre evba. E Sọl ghi họn, ọ na gha gualọ e Devid khian.

²⁶ E Sọl kevbe emwa rẹn kegha rre obọkpa ọghe nene oke vbe ne Devid kevbe emwa rẹn na gha rre obọ nọkpa. Iran keghi yẹn owẹ ye okhian ne iran lẹ fe Sọl kevbe emwa rẹn ne ọ ghi wa sikẹ iran, ọ kẹ ekherhe ne obọ iran vba iran.

²⁷ Vbe uwu ẹghẹ nii zẹ, iran keghi gie do tama e Sọl wẹẹ, “Dọlegbe gha dee ẹgiẹgiẹ! Ivbi e Filistin mu okuo rri ẹvbo!”

²⁸ Ẹre Sọl ghi na da obọ e Devid ne ọ khu khian yi, ọ na ya gu ivbi e Filistin gha gbinna. Ọna ọ si ẹe ne a na tie evba nii oke Iwannegbe.

²⁹ E Devid keghi kpao gha rrie otọ Ẹngẹdi, ọ na ya lẹre ye evba.