I Samuẹl 22 - Edo Bible (E Baibol Ẹdo) Version 1996

Ugbelemwẹ Avbe Ohẹn

¹ E Devid keghi lẹ hin e Gat rre, ọ na ya lẹre ye uvun okuta ọkpa vbe ọkpẹn Adulam. Avbe etiọnrẹn kevbe emwa ẹgbẹe ọre nekpa ghi họn ighẹ ọ rre evba, iran keghi ya deba ẹre.

² Emwa hia fẹẹrẹ ne a ghi zẹ ọre owẹ ra ne ọ defi osa ra ne ẹkun agbọn ma sẹ ọre otọ, keghi bu ẹre gha khian, rẹn kegha re ọkaolotu iran. Iran keghi re omwa ikpia uri eva (400).

³ E Devid keghi ke evba kpao gha rrie Mizpa ne Moab, ọ keghi tama ọba e Moab wẹẹ, “Lahọ gie erha mwẹ kevbe iye mwẹ do tota ke uẹ I te do rẹn emwi ne Osanobua khian ru mẹ.”

⁴ Ẹre Devid na sẹ evbibiọ ọe rae ye owa ọba Moab, iran kegha rre evba vbe ẹghẹ ne Devid ya lẹre ye uvun okuta hia.

⁵ E Gad ne akhasẹ keghi bu e Devid gha dee, ọ tama rẹn wẹẹ, “Ghẹ ghi di emwa ya, gha rrie otọ e Juda ọwarọkpa.” Ẹre Devid na kpao, ọ na gha rrie ẹgbo Hẹrẹt.

⁶ E Sọl Keghi rre Gibea ẹdẹ ọkpa ọ na tota ye ototọ erhan tamarisk vbe uhunmwu oke, asoro ẹre kevbe gu ẹe vbe obọ. Emwa rẹn hia na mudia lẹga ẹre. Iran keghi tama rẹn wẹ a rẹn ehe ne Devid kevbe emwa rẹn ye nẹ,

⁷ rẹ keghi tama emwa rẹn wẹẹ, “Wa danmwehọ, wa ne ivbi e Bẹnjamin, te uwa ro ighẹ e Devid gha mu ugbo azara ne uwa, ọ ghi vbe ma uwa ọkaokuo nekherhe kevbe nekhua vbe uwu ivbiyoko ẹre ra?

⁸ Ọnii ọ si ẹe ne uwa na ho odẹ ne uwa gha la mwẹ re ra? A ma miẹn orhiọnkpa vbe uwu uwa ne ọ tama mwẹ wẹ ovbi mwẹ kevbe Devid gba vẹn ihẹn ne egbe nẹ. A i vbe miẹn orhiọnkpa ne ẹmwẹ mwẹ da ra ne ọ vbe tama mwẹ wẹ e Devid ne ọ re ọkpa vbe uwu emwa mwẹ gualọ odẹ ne ọ gha na gbe mwẹ uan kevbe wẹ ovbi mwẹ vbe yi ẹre ike!”

⁹ E Doeg ne ovbi ẹvbo Idọm wa mudia ba emwa e Sọl vbe ẹghẹ ne a kha na, ọ keghi kha wẹẹ, “I miẹn e Devid vbe ọ la ọghe Ahimẹlẹk ne ovbi Ahitub, vbe Nob.

¹⁰ Ahimẹlẹk keghi nọ e Nọyaẹnmwa emwi ne Devid gha ru, iyeke ọnii, ọ keghi viọ evbare ne Devid, deba umozo e Golaiat ne ovbi e Filistin.”

¹¹ Ẹre Sọl ne ọba na gie ne a tie Ahimẹlẹk ne ohẹn ke ẹe kevbe emwa rẹn hia ni vbe re ohẹn vbe Nob, iran keghi bu ẹre gha dee.

¹² E Sọl keghi tama Ahimẹlẹk wẹẹ, “Danmwehọ mwẹ Ahimẹlẹk!” Rẹn keghi wanniẹn wẹẹ, “Ghe mwẹ enaẹmwẹ.”

¹³ E Sọl keghi nọ rẹn wẹẹ, “Vbọzẹ ne uwẹ vbe Devid na si uma odẹ ne uwa gha la mwẹ re yi? Vbọzẹ ne u na viọ evbare kevbe umozo ne ẹẹn, u na vbe gu Osanobua guan ne ẹẹn? Banbanna nian, ọ mu aro igbinna da mwẹ nẹ, ehe ne obọ ẹre gha na ke ẹe sẹẹ ọre ọ ghi gualọ.”

¹⁴ Ahimẹlẹk keghi wanniẹn wẹẹ, “E Devid ọ re ne ọ guobọ ruẹ sẹ vbe avbe emwa ruẹn hia! Orruan an nọ, rẹn ọ vbe re ọkaolotu emwa ne u ya khẹ egbe, emwa ni rre ẹguae ruẹ hia wa vbe ya ọghọ ne ẹẹn ẹsẹse.

¹⁵ Ọ na i ya suẹn gha gu Osanobua guan ne ẹẹn ra? Hiehiere! Umogun, ghẹ kha vberriọ wẹ mẹ ra ọmwaikọmwa vbe uwu ẹgbẹe mwẹ gualọ odẹ ne a gha la a re. I ma rẹn ọkpa I ma rẹn eva vbe ẹmwẹ na.”

¹⁶ Ọba keghi kha wẹẹ, “Ahimẹlẹk, uhunmwu wẹ vbe ẹgbẹe ruẹ hia ra ya khiẹ ọre.”

¹⁷ Ọ keghi tama emwa ne ọ ya khẹ egbe ni mudia ke ẹe wẹẹ, “Wa gbele avbe ohẹn e Nọyaẹnmwa na, rhunmwuda iran gu e Devid si uma, iran ma vbe tama mwẹ wẹ ọ lẹ fua nẹ, vberriọ iran rẹn vbekpa ẹre ẹsẹse ke ẹghẹ nii gha dee.” Sokpan iran nii keghi he ne iran kpa obọ ya gbele avbe ohẹn e Nọyaẹnmwa.

¹⁸ Ẹre Sọl na khama Doeg wẹẹ, “Gbele iran an!” E Doeg keghi gbele iran hia a. Vbe ẹdẹ nẹdẹrriọ, inu ohẹn e Nọyaẹnmwa ne ọ gbele kegha re isẹn yan iyenẹ.

¹⁹ E Sọl kevbe gie ne a gbele emwa ọvbehe ni rre Nob ne ẹvbo avbe ohẹn ikpia kevbe ikhuo, emobọ kevbe emowẹ, ẹmila, ẹsin kevbe ohuan, a keghi wa gbele ehia a.

²⁰ Sokpan, Abiata ne ọkpa vbe uwu avbe ivbi Ahimẹlẹk keghi lẹfua, ọ na bu e Devid gha khian ya deba ẹre.

²¹ Ọ keghi tama rẹn wẹ, e Sọl gbele avbe ohẹn e Nọyaẹnmwa hia.

²² E Devid keghi tama rẹn wẹẹ, “Ugbẹn vbe I wa bẹghe Doeg vbe evba nii ẹdẹrriọ, I wa rẹn wẹ ẹ i mwẹ ọ ma tama e Sọl. Rhunmwuda ọnii nian, mẹ ọ si ẹe ne emwa ruẹn hia na wulo na.

²³ Tota ke mwẹ, ghẹ gie ohan muẹn. Ma eva ẹre Sọl ho ne ọ gbele ua, sokpan, u gha rre ehe ne I ye, emwirhọkpa i ru uẹ.”