I Samuẹl 21 - Edo Bible (E Baibol Ẹdo) Version 1996

E Devid Lẹ Fua Ne Sọl

¹ E Devid keghi bu Ahimẹlẹk ne ohẹn vbe Nob. Ahimẹlẹk guọ vbe ọ do vbe ẹre, ọ nọ rẹn wẹẹ, “Vbe uwẹ ọkpa na gha di edinran hẹ yi?”

² E Devid keghi wanniẹn wẹẹ, “Ọba ọ re ọ gie mwẹ uhunmwu. Ọ wẹ ne I ghẹ tama ọmwa rhọkpa uhunmwu ne irẹn gie mwẹ re. Zẹ vbe ọ ghe emwa ne I hẹ khian, I tama iran nẹ ehe ne iran gha na do vba mwẹ.

³ De evbare ne u ghi mwẹ nian khekherriọ? Viọ ududu ebrẹd isẹn ra emwi ọvbehe ne u ghi mwẹ mẹ.”

⁴ Ohẹn ni keghi kha wẹẹ, “I i mwẹ ebrẹd kẹkan gberra ebrẹd iruemwi, I sẹtin viọ nuẹn a deghẹ emwa ruẹn ma ghi gu okhuo lovbiẹ ke nẹdẹ eso gha dee.”

⁵ E Devid keghi wanniẹn wẹẹ, “Ẹn, Iran ma ru emwi rhọkpa, Ikhuo i rre ehe ne ima ye. Ma gha rrie okhian kẹkan, te emwa mwẹ ye miẹn wẹ awua i gu iran. Inuinu ghi nọ vbe a miẹn wẹ okhian kpataki ọ re ọna khin!”

⁶ Ẹre ohẹn na viọ ebrẹd iruemwi ne Devid rhunmwuda ebrẹd ne a ya yo imuohan gie Osanobua ọkpa ọ re ọ gha mwẹ, avbe viọ ẹre hin uhunmwu eteburu iruemwi rre nẹ, a kevbe ya ebrẹd ne a da le rọ ẹe.

⁷ Ọkaolotu iran ni su ohuan e Sọl ne a tie ẹre Doeg, ne ọ ke Idọm rre keghi rre evba ẹdẹrriọ rhunmwuda ọ do mu eyan ugamwẹ eso sẹ.

⁸ Ọre Devid na tama Ahimẹlẹk wẹẹ, “U gha miẹn asoro ra umozo mu mẹ ra? I ma mu asoro mwẹ ra emwi igbinna rhọkpa mwẹ rhunmwuda, ugbẹn vbe a miẹn wẹ ọba ọ re ọ gie mwẹ uhunmwu, okhirhikhirhi ọ re I ya kpao.”

⁹ Ahimẹlẹk keghi wanniẹn wẹẹ, “Umozo e Golaiat ne ovbi e Filistin, ne u gbe vbe Iya Ela guemwẹ vbe emwa. Ọ rre iyeke adaghọ, a ya ukpọn gbalọ ẹe. A deghẹ u ho, u sẹtin mu, ọnii ọkpa ọ re emwi igbinna ne ọ rre emwana.” E Devid keghi kha wẹẹ, “Mu mẹ, umozo ne ọ ghi maa sẹ ọnii, ẹ i rrọọ.”

¹⁰ Ẹre Devid na kpao, ọ na lẹ ne Sọl, ọ na bu Akis ne ọba ọghe Gat.

¹¹ Ẹre emwa ọba na tama Akis wẹẹ, “Ọna i re Devid ne ọba ẹvbo ẹre ra? Ọmwa na ọ re avbe ikhuo nii ya gha so ihuan vbe iran ku wẹẹ, ‘E Sọl gbele arriaisẹn inu nọkhin, sokpan, e Devid gbele arriaisẹn igbe inu nọkhin.’ ”

¹² Emwi ne iran ta na keghi rueghe e Devid orhiọn, ohan Akis kegha muẹn ẹsẹse.

¹³ Ẹre Devid na ba gha mwẹmwẹ vbe odaro iran hia, ọ ghi gha gbẹnnẹ emwi ye ẹkhu onurho ẹvbo nii, ọ ghi vbe gha kpa odọnghọn ye ẹtu ẹre.

¹⁴ Akis keghi tama emwa rẹn wẹẹ, “Tẹ ọmwa na mwẹmwẹ! Vbọzẹ ne uwa na rhie ẹre bu mwẹ gha dee?

¹⁵ Avbe ọmwẹmwẹ ne I mwẹ ma he ye bun sẹ ra? Vbe uwa ghi na vbe mu ọvbehe rre hẹ ne ọ do gha mwẹmwẹ ma mwẹ vbe owa mwẹ?”