I Samuẹl 20 - Edo Bible (E Baibol Ẹdo) Version 1996

E Jonatan Yi Devid Obọ

¹ Ẹre Devid na lẹ kpao vbe Naiọt ne Rama rre, ọ na bu e Jonatan gha khian ya tama rẹn wẹẹ, “De emwi ne I ru? De a i ghẹ ru ne I ru? De abakuru ne I ru ghe erha a ne ọ na ho ne ọ gbe mwẹ uan?”

² E Jonatan keghi wanniẹn wẹẹ, “Osanobua ghẹ gie uẹ wu! Te erha mwẹ tama mwẹ emwi ne ọ rhirhi gha ho ne ọ ru, ọ kpọlọ ra ọ kanmwa, ẹ i ghẹ vbe rhie ọna lẹre mẹ. Ẹmwata i rre evba!”

³ Sokpan, e Devid keghi wanniẹn wẹẹ, “Erha rẹn vbe ne u ho ẹmwẹ mwẹ hẹẹ ọ re ọ na wẹ rẹn I tama ruẹn emwi ne irẹn khian ru, rhunmwuda, ọ gha balọ uẹ gbe. I ye Nọyaẹnmwa ne ọ rrọọ vẹn ihẹn ma ruẹn wẹ agbanmwẹ idin ọ re I ye na.”

⁴ E Jonatan keghi kha wẹẹ, “I gha ru emwi ne u rhirhi a gha ho.”

⁵ E Devid keghi wanniẹn wẹẹ, “Akhuẹ ne ọ re emwiukpo Uki ọgbọn, te ọ kere ne I gu ọba rri evbare. Sokpan, a deghẹ u kue yọ vberriọ, I gha ya lẹre ye uwu oha ọ te ya sẹ ẹghẹ ota ne irakhuẹ.

⁶ Erha a gha rẹn wẹ I ma rre do rri evbare, u ghi tama rẹn wẹ te I rinmwian an wẹ ne u rhie ẹghẹ mẹ ya zẹgiẹgiẹ gha rrie Bẹtlẹhẹm rhunmwuda, ẹghẹ ne a na zọ ese ukpo ọghe ẹgbẹe mwẹ hia ọ re nọ.

⁷ Ọ gha kha wẹẹ, ‘Ọ maa.’ I gha miẹn uhunmwu, sokpan a deghẹ ohu mu ẹẹn, a ghi rẹn wẹ te ọ mu egbe ne ọ gha ya ru mwẹ emwi.

⁸ Lahọ, u ghi ru mwẹ ẹse na, ne u ye ihẹn ne ima vẹn ne egbe rre. Sokpan, a deghẹ I rri abe, tobọ gbe mwẹ uan. Vbọzẹ ne u gha na rhie mwẹ gie erha gbe ua?”

⁹ E Jonatan keghi wanniẹn wẹẹ, “Ghẹ zẹdẹ mu ọnii ro, a deghẹ mẹ gele rẹn wẹ erha mwẹ ho ne ọ gbe ua, mẹ ghẹ ghi tama ruẹn?”

¹⁰ E Devid keghi nọ wẹẹ, “Gha ọ ghi ra tama mwẹ a deghẹ ohu ọ re erha ya rhie ewanniẹn nuẹn?”

¹¹ E Jonatan keghi kha wẹẹ, “Gie ima gha rrie uwu oha.” Iran na gele gha khian.

¹² E Jonatan keghi tama Devid wẹẹ, “E Nọyaẹnmwa Osanobua ọghe Izrẹl ọ re ọ khian gha re osẹe ima. Ẹghẹ na vbe akhuẹ kevbe irakhuẹ, I gha nọ erha mwẹ ọta. I gha gie ne a tama ruẹn a deghẹ ẹmwẹ esi ọ re ọ tae vbe ekpa ruẹ.

¹³ Deghẹ ọ ho ne ọ kuan ruẹn, te Nọyaẹnmwa gha kinmwi mwẹ gbe ua, a deghẹ I ma gie ne a khama ruẹn ne u miẹn ehe na rhie uhunmwu hin ebe rre. Te Nọyaẹnmwa gha deba ruẹ zẹ vbene ọ vbe deba erha mwẹ!

¹⁴ A deghẹ uhunmwu mwẹ ghi ye rre agbọn lahọ, u ghi mu eyan ruẹn sẹ ne u gie ekhọe ruẹ guobọ mwẹ. Sokpan, a deghẹ I ghi vbe wu.

¹⁵ U ghi mwẹ itohan ẹgbẹe ghe mwẹ ẹdẹdẹmwẹdẹ. E Nọyaẹnmwa ghẹ ghi dunmwu avbe eghian ruẹn hia fo nẹ,

¹⁶ te ile ne ima ta ma egbe na, gha ye gha re ne ọ ya mu gbain. A deghẹ u ghi rra ẹre, te Nọyaẹnmwa gha rria ruẹ ikhi.”

¹⁷ E Jonatan keghi dọlegbe wẹ ne Devid yan wẹẹ rẹn gha ho ẹmwẹ irẹn, rhunmwuda te Jonatan ho ẹmwẹ Devid zẹ vbene ọ ho ẹmwẹ egbe ẹre.

¹⁸ Ẹre Jonatan na tama rẹn wẹẹ, “Akhuẹ ọrọre emwiukpo Uki Ọgbọn, a deghẹ u ma rre, a gha wa rẹn.

¹⁹ Ọ gha vbe sẹ irakhuẹ, aro gha wa vbe dọlegbe dae sayọ wẹ u ma rre; rhunmwuda ọnii, ya lẹre ye ehe ne u ka lẹre yi ẹdẹrriọ, ne u lẹre ye iyeke avbe okuta nii rre evba.

²⁰ I gha filo ifẹnmwẹ eha ghe evba vbene a ba gha kha wẹ, ehe ne I kọn nọ.

²¹ I ghi tama ọguọmwadia mwẹ ne ọ ya gualọ ehia viọ rre. Adeghẹ I tama rẹn wẹẹ, ‘Ghe avbe ifẹnmwẹ vbe obọ na ne u viọ rre,’ ọ nii rhie ma wẹ emwi rhọkpa i ruẹ ne u ladian. I ya eni Nọyaẹnmwa nọ rrọọ vẹn ihẹn wẹ emwirhọkpa i ra ruẹ.

²² Sokpan, a deghẹ I tama rẹn wẹẹ, ‘Avbe ifẹnmwẹ na rre obọ nọkpa,’ u ghi kpao ọ, rhunmwuda, e Nọyaẹnmwa ọ re ọ wẹ ne u kpao.

²³ Zẹ vbe eyan ne ima yan ma egbe, e Nọyaẹnmwa gha ru ẹe ne ima sẹtin muẹn sẹ rhinrin ẹdẹ.”

²⁴ Ẹre Devid na ya lẹre ye uwu oha. Ọ ghi sẹ ẹghẹ emwiukpo Uki Ọgbọn, e Sọl ne ọba keghi rre do rri evbare,

²⁵ ọ keghi tota ye ehe ne ọ ka tota yi dee ẹdẹ vbe ọkpẹn egbekẹn. Abna keghi tota diake ẹe, e Jonatan na tota mu aro da ẹre vbe eteburu, ọmwa rhọkpa i rre ehe ne Devid gha te tota yi.

²⁶ Sokpan e Sọl ma zẹyọ ẹdẹrriọ, ọ kegha ro wẹẹ u gha ghe, “Emwi eso ọ re ọ ru ẹe, awua rre ọ re egbe.”

²⁷ Vbe ẹdẹ ne ọ lele ẹe vbe ikpẹdẹ ne ọ lele emwiukpo Uki Ọgbọn nii, te ihe itota e Devid ye de ihoi, e Sọl keghi nọ e Jonatan wẹẹ, “Vbọzẹ ne Devid ma na do rri evbare nodẹ kevbe ẹre na yi?”

²⁸ E Jonatan keghi wanniẹn wẹẹ, “Te ọ rinmwian mwẹ ne I gie irẹn gha rrie Bẹtlẹhẹm.

²⁹ Ọ keghi kha wẹẹ, ‘Lahọ gunmwẹ gha khian, rhunmwuda ẹgbẹe ima gha ru emwiukpo izọ ese, etẹn mwẹ keghi kha wẹ ne I ghẹ mwẹ I ma gha rre evba. Rhunmwuda ọnii nian, a deghẹ ọse mwẹ ọ re u khin, gun mwẹ gha khian ya miẹn avbe etẹn mwẹ.’ Ọnii ọ re ọ zẹe ne ẹ i na re ehe ne a na rri evbare vbe ehe ne u ye.”

³⁰ Ohu e Jonatan keghi wa kakabọ mu e Sọl. O tama rẹn wẹẹ, “Wẹ ne a ma biẹ ẹse na, I rẹnrẹn ighẹ uma ọkpa ọ re uwẹ vbe Devid gha ye, u na gha fa egbe ruẹ kevbe nene iye uẹ nii u an.

³¹ Wẹ ma rẹn wẹ e Devid gha rre agbọn, u i ra rriọba vbe ẹvbo na. Banbanna nian, ya rhie ẹre rre, te ọ gha wu.”

³² E Jonatan keghi wanniẹn wẹẹ, “Vbọzẹ ne ọ gha na wu yi? De emwi ne ọ ru?”

³³ Ọ ghi wa ta ọnii, e Sọl keghi wa fi asoro gie ẹe ne ọ wa gbe ẹe rua, evba e Jonatan ghi na do rẹn wẹ te erha irẹn wa yan yọ ne ọ gbe Devid ua.

³⁴ Ọ keghi guọnmwẹ egbe kpao vbe eteburu rre, ọ ma rri evbare ẹdẹrriọ ne ọ re ikpẹdẹ ne ogieva ọghe emwiukpo Uki Ọgbọn. Ekhọe ẹre keghi wa rhia ba ẹmwẹ Devid rhunmwuda e Sọl yagha e Devid.

³⁵ Vbe owiẹ ne ọ lele ẹe, e Jonatan kegha rrie uwu oha ne ọ ya vba e Devid, zẹ vbene iran mwamwa ẹẹn yi. Ọ na rhie ọvbokhan okpia ọkpa ba egbe,

³⁶ ọ keghi tama rẹn wẹẹ, “Rhulẹ ne u ya gualọ ifẹnmwẹ ne I ra filo.” Ọvbokhan nii keghi rhulẹ, e Jonatan keghi fi ifẹnmwẹ ke odaro ne ẹẹn.

³⁷ Ọvbokhan nii ghi sẹ ehe ne ifẹnmwẹ nii de yi, e Jonatan keghi niẹn urhu davan ya khama rẹn wẹẹ, “Ifẹnmwẹ nii ye rrei vbe odaro ruẹ.

³⁸ Ghẹ mudia ye evba, zẹgiẹgiẹ!” Ọvbokhan okpia nii keghi rhọ avbe ifẹnmwẹ nii, ọ na dọlegbe bu arowa ẹre gha dee,

³⁹ vbe ne ọ ma na rẹn enaye; e Jonatan vbe Devid ọkpa ọ re ọ rẹnrẹn.

⁴⁰ E Jonatan keghi viọ emwi igbinna rẹn ne ọvbokhan nii, ọ na wẹ ne ọ viọ iran werriegbe gha rrie owa.

⁴¹ Ọvbokhan okpia nii ghi kpao nẹ, e Devid keghi ladian vbe iyeke utete avbe okuta nii, ọ keghi lovbiẹ ye otọ lọlọọlọ, ọ na vbokho uhunmwu rriotọ igba eha. Rẹn kevbe Jonatan kegha viẹ vbe iran mu egbe unu hiẹnhiẹn, ẹko e Devid ọ re ọ rhia sẹ Ọghe Jonatan.

⁴² Ẹre Jonatan na tama Devid wẹẹ, “Te Nọyaẹnmwa gha yaba ruẹ. E Nọyaẹnmwa gha ru ẹe ne a miẹn wẹ mẹ vbe ruẹ, ivbi uẹ kevbe ivbi mwẹ ni gha lele ima, gha ru zẹ vbene ile ne ima gu egbe ta khare ẹdẹdẹmwẹdẹ.” Ẹre Devid na kpao, e Jonatan keghi dọlegbe gha die owa.