I Samuẹl 2 - Edo Bible (E Baibol Ẹdo) Version 1996

Erhunmwu E Hanna

¹ E Hanna keghi na erhunmwu wẹẹ: “E Nọyaẹnmwa ya oghọghọ vuọn ekhọe mwẹ nẹ, ọyẹnmwẹ sẹ mwẹ ye emwi ne ọ ru! I giẹ iran ne eghian mwẹ nian, ọyẹnmwẹ sẹ mwẹ rhunmwuda, Osanobua yọmwẹ obọ nẹ.

² “Ọmwa ne ọ huanrẹn vbe Nọyaẹnmwa i rrọọ, ọmwa ne ọ yevbe ọre irrọọ, ugue ne ọ ye vbe Osanobua mwa i rrọọ.

³ Dobọ owogho oghagha ruẹ yi gie ẹmwẹ uhiomwẹ ruẹn gbẹdọ, rhunmwuda, e Nọyaẹnmwa, Osanobua ne ọ rẹn emwi ne ọ sunu nọ, ọ vbe bu ohiẹn emwi ne emwa ru hia.

⁴ A bunnọ uhanbọ ivbiyokuo ni wo, sokpan, nọma wegbe kegha wo yọ.

⁵ Iran ne a koko ẹse la iyoha ba ẹmwẹ evbare, ohanmwẹ ma ghi gbe iran ne ohanmwẹ te gbe ọvbehe. Amwẹ ne agan biẹlẹ emọ ihinrọn, sokpan, a ma sẹ ọkpa rae ne nọ biẹlẹ enibun.

⁶ E Nọyaẹnmwa ọ re ọ gbe, rẹn ọ vbe huẹn. Rẹn ọ re ọ gie emwa yo ẹvbo eni wulo nẹ. Ọ ghi vbe dọlegbe viọ iran gha dee.

⁷ Ọ gha si eso kẹ otọ, ọ ghi tọn eso mu.

⁸ Ọ tọn iran ne ẹ i mwẹ mu hin uwu usẹ iran rre. Ọ ya iran ru ihuan ivbi ọba, ọ keghi viọ iran ye ukpo uyi. E Nọyaẹnmwa ọ re ọ yan ẹyotọ agbọn na, uhunmwu iran ọ re ọ bọ agbọn yan.

⁹ “Ọ degue iran ne emwa rẹn ni maa, sokpan, iran ne emwa dan keghi gu ebi ro. Ọmwa i sẹtin ya ẹtin obọ ẹre khọnmiotọ.

¹⁰ A gha fuẹn eghian e Nọyaẹnmwa, ọ gha van yan iran ke ẹrinmwi rre, e Nọyaẹnmwa gha bu ohiẹn agbọn; ọ gha rhie ẹtin ne ọba ẹre, ọ gha rhie akhọnmiotọ ne ọba ne ọ hannọ zẹ.”

¹¹ Ẹre Ẹlkana na werriegbe gha rrie Rama, sokpan, ọmọ okpia nii keghi tota vbe Silo, ọ kegha ga e Nọyaẹnmwa vbe ototọ Elai ne Ohẹn.

Ivbi Elai

¹² Ivbi Elai ne ikpia kegha re emọ ni ku ogboi. Iran i zẹdẹ zẹ ye ẹmwẹ e Nọyaẹnmwa

¹³ ra ilele avbe emwi ne ọ kere ne avbe ohẹn gha miẹn emwa ẹre. Sokpan, ọmwa gha zọ ese, eguọmwadia ohẹn ghi mu awan ne ọ mwẹ ikpinhianbọ eha gha khian. Ehe ne a he na wa ye le emwi nii,

¹⁴ ọ gha dunmwu awan nii ye uwu ukodo, emwikemwi ne awan nii ghi viọ ladian, ọ ghe ohẹn ọre nọ. Erriọ iran gha a ru ivbi Izrẹl hia ni do zọ ese vbe Siailo.

¹⁵ Ye vbe sẹ ọnii, uhin ighẹ a te do mu emiowo nii kpao ne a ya giẹn ọnrẹn uan, ọguọmwadia ohẹn ghi rre do tama ọmwa ne ọ zọ ese nii wẹẹ, “Fian emiowo mẹ mu gie ohẹn rhie tọn, ẹ i ra miẹn ruẹn emiowo ne a vbiẹvbiẹ vbe ẹ i re ọghọgbọn.”

¹⁶ A deghẹ okpia nii ghi wanniẹn wẹẹ, “Gia ka giẹn ẹvbi ẹre nẹ, iyeke ọnii, u sẹtin rhie ne ọ ye ruẹ.” Ọguọmwadia ohẹn ghi kha wẹẹ, “Ẹn o, rhie mẹ nian! A deghẹ u ma rhie mẹ, I gha ya ẹtin miẹn ruẹn re!”

¹⁷ Orukhọ avbe ivbi Elai na keghi re emwi ne ọ wegbe vbe aro e Nọyaẹnmwa rhunmwuda obọ oya ne iran ya gha mu avbe emwi ne a ya zọ ese ghe Nọyaẹnmwa.

E Samuẹl Vbe Siailo

¹⁸ E Samuẹl ne ọmọ okpia nii, kegha ga e Nọyaẹnmwa vbe Siailo, ọ ghi mu adaghọ eto ovbiohuẹ rhuan.

¹⁹ Ukpukpo ọ re iye ẹe ya gha dẹlẹ ovbi ẹwu gie ẹe vbe ọ gha lele ọdafẹn ọnrẹn ya zọ ese ukpukpo nii.

²⁰ Ẹghẹ nii, Elai ghi fiangbe Ẹlkana kevbe ọvbokhan rẹn, ọ ghi khama Ẹlkana wẹẹ, “E Nọyaẹnmwa ne ọ gie okhuo na biẹlẹ emọ ọvbehe nuẹn ne ọ rhie ihe ọnọna ne u ya fi ohan ne ẹẹn na.” Iyeke onii, iran ghi werriegbe gha rrie owa.

²¹ E Nọyaẹnmwa keghi fiangbe Hanna, ọ keghi biẹlẹ emọ ikpia eha ọvbehe kevbe emọ ikhuo eva ọvbehe. Ọmọ okpia nii ighẹ Samuẹl keghi wan vbe uwu ugamwẹ e Nọyaẹnmwa.

Elai Kevbe Ivbi Ẹre

²² Elai keghi do khian ọmaẹn ẹsẹse, ọ keghi do gha họn uyinmwẹ ne ivbi ẹre yin ghe ivbi Izrẹl, kevbe wẹ iran mu avbe ikhuo ni winna vbe onurho Owa Ukpon yagha.

²³ Rẹn keghi rhunmwuda onii tama iran wẹẹ, “Vbọzẹ ne uwa na ru avbe emwi na yi? Emwa hia ọ re ọ wa na iyẹn emwi dan ne uwa ru hia ma mwẹ.

²⁴ Wa gie ẹe sẹ evba, ivbi mwẹ. Emwi ne emwa e Nọyaẹnmwa ta vbe ekpa uwa mu ohan gbe.

²⁵ Ọmwa gha ba emwi ku ru ghe ọmwa ọvbehe, Osanobua sẹtin degue ẹre, sokpan de ọmwa ne ọ ra degue ọmwa ne ọ ba emwi ku ru ghe Osanobua?” Sokpan, iran ma zẹ ye erha iran re, rhunmwuda, Osanobua ta ẹe nẹ wẹ te irẹn ra fuẹn iran uan.

²⁶ Ẹre ọmọ okpia nii ighẹ e Samuẹl na gha wan yọ, aro ne ọ maa ọghe Nọyaẹnmwa kevbe emwa nagbọn, kegha rre ọre egbe.

Emwi Ne A Ta Ẹe Ighẹ Ọ Ra Rruan Ẹgbẹe Elai

²⁷ Akhasẹ ọkpa keghi do ta uhunmwu ne e Nọyaẹnmwa gie na ma Elai wẹẹ, “Ẹghẹ ne Errọn ne erha uwa odede na gha re ọviẹn vbe Igipt ọ re I na rhie egbe mwẹ ma rẹn.

²⁸ I keghi hannọ ẹgbẹe ọghe ọe zẹ, vbe uwu ẹwae ni rre Izrẹl hia ne iran gha re ohẹn mwẹ, ne iran gha ga vbe Ogiukpo, ne iran gha giẹn eturari kevbe ne iran gha rhuan adaghọ ya nọ mwẹ ọta. I kevbe rhie asẹ ne iran, ne iran gha ghae vbe emwi ne a giẹn uan vbe aka.

²⁹ Vbọzẹ ne aro uwa ghi na vbe wu ye emwi izọ ese kevbe emwi ihaoko mwẹ ne I nọ vbe obọ emwa mwẹ? Vbọzẹ ne uwẹ ne Elai na daa ne ivbi uẹ sẹ emwi ihaoko mwẹ ne I nọ vbe obọ emwa mwẹ? Vbọzẹ ne uwẹ ne Elai na daa ne ivbi uẹ sẹ imẹ vbe ne u na gie iran gha rri ehe ne ọ maa sẹ vbe emwi ne emwa ya zọ ese ghe mwẹ ya gha tii ye egbe?

³⁰ Mẹ ne Nọyaẹnmwa ne Osanobua ọghe Izrẹl ọ re ọ yan rẹn vbe ẹghẹ ne ọ gberra wẹ ẹwae ruẹ kevbe ẹgbẹe ruẹ, gha ga mwẹ zẹ vbe ohẹn ẹdẹdẹmwẹdẹ sokpan, banbanna nian, I khare wẹ I i ghi mwẹ obọ vbọ sokpan, I gha daa ne iran ni daa mẹ, sokpan, iran ni zan mwẹ, I gha fa iran an.

³¹ Yẹrẹro nian, ẹghẹ dee ne I gha na gbele avbe igbama ni rre ẹgbẹe ruẹ kevbe ẹwae ruẹ rua sẹrriọ wẹ, a i ghi ra miẹn ọmwa ọkpa ne ọ gha ke ẹe vbe ẹgbẹe ruẹ ne ọ do khian ọmaẹn.

³² Emwi gha ba so uẹ, aro ruẹ ghi viẹn ye emwi ọ maa ne agbọn ne I gha viọ ne ivbi Izrẹl nekpa, sokpan, a i ghi dọlegbe miẹn ne ọ khian ọmaẹn vbe uniẹn ruẹn.

³³ Sevba, I gha sẹ ọkpa vbe uwu ivbi uẹ rae ye agbọn, rẹn ghi gha ga mwẹ zẹ vbe ohẹn. Sokpan rẹn gha do rhu aro, ọ ghi hohua, ivbuẹ ni ghi dekẹe hia, uwu ọkpankpan iran ra wulo yi.

³⁴ Ẹghẹ ne ivbi uẹ eva ighẹ Hofnai kevbe Finihaz gha na wulo ẹdẹ ọkpa, ọnii gha rhie maa ruẹn wẹ, ẹmwẹ ne I ta nẹ, ẹ i mwẹ ọ ma sẹ.

³⁵ “I gha zẹ ohẹn ne ọ guobọ mwẹ, ọ ghi vbe gha ru emwi hia ne I ho ne ọ ru. I gha viọ emọ ne ẹẹn, iran ni gha ga vbe odaro avbe ọba ne I hannọ zẹ.

³⁶ Iran ni ghi miẹn uhunmwu vbe avbe ivbi uẹ, iran ghi ya gha nọ ohẹn igho kevbe evbare, iran ghi vbe rinmwian ne a gie iran gha ye avbe ohẹn obọ ne iran ma kue miẹn evbare unu gha re.”