I Samuẹl 19 - Edo Bible (E Baibol Ẹdo) Version 1996

E Sọl Zẹ Devid Gha Kpokpo

¹ E Sọl keghi tama e Jonatan ne ovbi ẹre kevbe avbe ivbiyokuo ẹre wẹ rẹn ho ne irẹn gbe Devid rua, sokpan, e Jonatan kegha ho ẹmwẹ e Devid ẹsẹse.

² Rhunmwuda ọnii, ọ keghi tama e Devid wẹẹ, “Erha mwẹ ho ne ọ gbe ua. Rhunmwuda ọnii, gha kinna egbe! Akhuẹ, u ghi lẹre ye ẹkhokho okpa.

³ I gha yo uwu oha ne u lẹre yi ne I ya gu erha mwẹ guan vbe ekpa ruẹ. I gha miẹn uhunmwu ẹmwẹ, I gha do tama ruẹn.”

⁴ E Jonatan keghi tian e Devid ma e Sọl wẹẹ, “Dọmọ ọ, ghẹ ru e Devid ne ọguọmwadia ruẹ emwi ne ọ ma gba, ọ ma he ru emwi ne ọ ma gba ghe ruẹ ẹdẹ, sokpan, vbe ẹmwata, emwi ne ọ he ru hia, nẹ ọ rhie ere nọkhua gie uẹ ọ re ehia khin.

⁵ Ọ rhie uhunmwu ẹnrẹn mwẹ atataobọ ya gbe Golaiat, e Nọyaẹnmwa keghi khọn okuo akhọnmiotọ nọkhua ne Izrẹl. Wẹ miẹn ọẹn, ọ keghi ye ẹko rhiẹnrhiẹn ọn, Vbọzẹ ne u gha na ru ọmwa ne ọ ma rukhọ emwi ne ọ ma gba ne u gha na gbe e Devid vbe ne ẹ i na mwẹ emwi nọ zẹe hiehiere?”

⁶ E Sọl keghi danmwehọ ẹmwẹ ne Jonatan tae, ọ keghi vẹn ihẹn vbe eni e Nọyaẹnmwa wẹ a i ra gbe Devid.

⁷ Rhunmwuda ọnii, e Jonatan keghi tie Devid ọ na na iyẹn emwi hia ma rẹn, rẹn keghi rhie ẹre bu e Sọl gha khian, ọ na vbe ya gha ga ọba vbene ọ ka ru ẹe de yi.

⁸ Okuo keghi vbe dọlegbe saa ne ivbi e Filistin. E Devid keghi dekun iran, obọ ẹre keghi ke ukhunmwu ne iran sẹ vberriọ wẹ, iran keghi lẹkua hin ehe ne ọ ye rre.

⁹ Ọ ghi sẹ ẹdẹ ọkpa, orhiọn dan ne ọ ke ehe ne Nọyaẹnmwa ye rre keghi hin yan e Sọl. E Sọl keghi tota ye uwu owa ẹre ke ẹe kevbe asoro vbe obọ. E Devid keghi vbe gha rre evba, ọ na gha kpe akpata ne ẹẹn.

¹⁰ E Sọl keghi te hia ne ọ ya asoro ẹre ha e Devid ginna ekẹn, sokpan, e Devid keghi bi egbe, asoro na ya de ba ye ekẹn, e Devid keghi lẹ fua, ọ na miẹn uhunmwu.

¹¹ Vbe asọn ọkpa nii, e Sọl keghi gie emwa eso ne iran ya gha khẹ owa e Devid, ne iran gbe ẹe rua vbe ẹdẹ a ghi gbe. Ẹre Mikal ne amwẹ Devid na ya tama rẹn wẹẹ, “A deghẹ u ma lẹfua asọn na, ikun ruẹn ọre a khian mu ẹdẹ ne akhuẹ.”

¹² Ọ keghi mu ẹẹn la ewindo fi otọ, ọ na lẹfua.

¹³ Ọ keghi mu ukhurhẹ iran vbe owa nii, ọ na mu ẹẹn ye ukpo. Ọ na mu ukohunmwu ne a ya eto ẹwe ru ye odẹ uhunmwu ẹnrẹn, ọ na ya ukpọn gue ẹre.

¹⁴ Emwa ne Sọl gie ghi wẹ ne iran ya mu e Devid, e Mikal keghi khama iran wẹ egbe ma rran rẹn.

¹⁵ Sokpan, e Sọl keghi gie iran werriegbe ne iran ya ye aro iran tobọ iran miẹn Devid, ọ tama iran wẹẹ, “Wa mu ẹẹn mu ewa ne ọ lovbiẹ yi gha die emwa, mẹ gha gbe ẹe rua.”

¹⁶ Iran keghi la owa, iran keghi miẹn ukhurhẹ owa nii vbe ukpo ẹre, ukohunmwu eto ẹwe nii, kegha rre ọ re uhunmwu.

¹⁷ E Sọl keghi nọ Mikal wẹẹ, “Vbọzẹ ne u na ya mwẹ do ogboi rua vbe nian yi ne u na gie oghian mwẹ lẹ fe?” Rẹn keghi wanniẹn wẹẹ, “Rẹn tama mwẹ wẹ rẹn gha gbe mwẹ uan a deghẹ I ma yi rẹn obọ ne irẹn ya lẹfua.”

¹⁸ E Devid keghi lẹfua, ọ na bu e Samuẹl gha rrie Rama, ọ na ya talọ emwi hia ne Sọl ru ẹre re ma rẹn. Rẹn kevbe Samuẹl keghi gba gha rrie Naiọt, iran na ya di evba ya.

¹⁹ Iran keghi do khama e Sọl wẹ e Devid rre Naiọt vbe Rama.

²⁰ Ọ na gie emwa eso ne iran ya mu ẹẹn. Iran keghi do vba avbe akhasẹ eso, iran gha kuu, iran gha vannọ, e Samuẹl kegha re ọkaolotu iran. Ẹre orhiọn Osanobua na hin emwa e Sọl, iran kevbe suẹn gha ku iran na gha vannọ.

²¹ Ugbẹn vbe Sọl ghi họn ẹmwẹ na, ọ keghi vbe gie otu ọvbehe gha khian, iran na kevbe suẹn gha ku, iran na gha vannọ, ọ keghi vbe gie emwa ukpogieha erriọ ọre ọ vbe sunu vbe egbe iran.

²² Ẹre rẹn tobọ irẹn na kpao gha rrie Rama. Ọ ghi sẹ uhae nọkhua ne ọ rre Seku, ọ keghi nọ wẹ de ehe ne Samuẹl vbe Devid ye, iran na tama rẹn wẹ, iran rre Naiọt.

²³ Ugbẹn vbe ọ ghi wa khian ni orhiọn Osanobua keghi hin yan rẹn tobọ ẹre, ọ kegha kuu, ọ na gha vannọ ọ te ya sẹ Naiọt.

²⁴ Rẹn keghi bannọ ukpọn kua, ọ na gha ku, ọ na gha vannọ vbe odaro e Samuẹl. Ọ keghi wa lovbiẹ vbe irhunmwirhun avan nii hia ke ẹe kevbe asọn nii hia. (Erriọ ọre itan na ya suẹn wẹẹ, “Akhasẹ ọre Sọl ghi vbe khin ra?”)