I Samuẹl 18 - Edo Bible (E Baibol Ẹdo) Version 1996

¹ Ugbẹn vbe Sọl vbe Devid ghi gha guan nẹ, ẹmwẹ e Devid keghi wa la e Jonatan ekhọe sẹrriọ wẹ, ọ keghi ho ẹmwẹ ọnrẹn zẹ vbe ne ọ ho ẹmwẹ egbe ẹre.

² Ke ẹdẹ ne ẹdẹrriọ kpao, e Sọl keghi rhie Devid ke egbe, ọ ma ghi vbe gie ẹe gha rrie.

³ E Jonatan kevbe Devid keghi gba vẹn ihẹn ne egbe wẹ ọse ẹdẹdẹmwẹdẹ iran khian gha khin, rhunmwuda ne irẹn na ho ẹmwẹ ọnrẹn ẹsẹse.

⁴ Ọ keghi kie ẹwu ne irẹn te hẹ ye egbe, ọ na viọ ne Devid, ke ẹe kevbe ẹwu okuo ẹre kevbe uhanbọ ẹre, kevbe ugbẹkun ẹnrẹn.

⁵ E Devid keghi wa gha ru rho obọ vbe uhunmwu hia ne Sọl gie ẹre re, e Sọl keghi rhunmwuda onii ya ẹe ru ọkaolotu vbe ivbiyokuo ẹre. Ọna keghi wa yẹ emwa e Sọl kevbe avbe ọkaolotu ẹre hia.

E Sọl Do Gha Gbọvo E Devid

⁶ Avbe ivbiyokuo ghi die owa vbe e Devid ghi ke ehe ne ọ na gbe Golaiat rre nẹ, ikhuo keghi wa ke okpẹvbo hia ni rre Izrẹl ladian bu e Sọl sẹ odẹ. Iran na gha so ihuan oghọghọ, iran na gha kpe ukusẹ kevbe ẹgogo.

⁷ Vbe ehe ne iran na kuu nii, ikhuo nii kegha so ihuan wẹẹ, “E Sọl gbele avbe arriaisẹn sokpan e Devid avbe arriaisẹn vbe ihe igbigbe.”

⁸ Ọ na ma rhiẹnrhiẹn e Sọl, ohu keghi mu ẹẹn ẹsẹse. Ọ keghi kha wẹẹ, “Iran ye avbe arriaisẹn igbigbe so eni e Devid sokpan avbe arriaisẹn ọkpa iran ya so eni mwẹ. Emwi ọkpa ne ọ ghi dekẹe ne ẹẹn nian ọrọre ne iran do ma ẹre ọba.”

⁹ Ke ẹdẹ ne ẹdẹrriọ kpao, ọ na gha gbọvo e Devid, ọ na gha bẹghe vbe egbe ẹre.

¹⁰ Vbe ikpẹdẹ ne ọ lele ẹe, orhiọn dan ne ọ ke obọ Osanobua rre keghi hin e Sọl, ọ na gha tu wawaawa vbe owa ẹre zẹ vbe ọmwẹmwẹ. E Devid kegha kpe akpata ẹre zẹ vbene ọ ru ẹe ẹdẹgbegbe, e Sọl keghi mu asoro mwẹ obọ.

¹¹ E Sọl keghi ya ekhọe ẹre ta ẹe wẹẹ, “I gha hae ginna ekẹn.” Ọ na fi asoro ni gie ẹe igba eva sokpan, e Devid keghi gban egbe nẹ vbe eveva.

¹² Ohan e Devid keghi do gha mu e Sọl rhunmwuda, Osanobua he irẹn ye otọ nẹ sokpan ọ keghi rrọ de ba e Devid.

¹³ Rhunmwuda ọnii, e Sọl keghi rhie ẹre ladian vbe evba, ọ keghi ya ẹe ru ọkaokuo arhin arriaisẹn. E Devid kegha viọ emwa rẹn yo okuo,

¹⁴ ọ na gha ru rho obọ vbe emwi ne ọ ru hia rhunmwuda, e Nọyaẹnmwa rrọọ yaba ẹre.

¹⁵ E Sọl ghi miẹn vbene ọ dunna ne Devid hẹ, ohan rẹn keghi dọlegbe gha mu ẹn sayọ.

¹⁶ Sokpan, emwa hia ni rre Izrẹl kevbe Juda kegha ho ẹmwẹ e Devid, rhunmwuda, ọkaolotu ne emwi dunna na ọre nọ.

E Devid Rhie Ovbi E Sọl Rọnmwẹ

¹⁷ Ẹre Sọl na tama e Devid wẹẹ, “Ghe Mẹrab ne ovbi mwẹ nokhuo ne ọdiọn, u gha ga mwẹ zẹ vbe ovbiyokuo ne ọ din kevbe ne a gba ẹko ẹre, u na vbe gha khọn avbe okuo e Nọyaẹnmwa, I gha rhie ẹre nuẹn rhie rọnmwẹ.” (E Sọl keghi te gha ro wẹ erriọ ọ re obọ ivbi e Filistin gha na vba e Devid ya gbe ua, ne irẹn ghẹ tobọ irẹn ru ẹe.)

¹⁸ E Devid keghi wanniẹn wẹẹ, “Gha ọ re imẹ, vbe uniẹn mwẹ a khin ne I gha na gha re orruan ọba?”

¹⁹ Sokpan, ọ ghi sẹ ne a gha ya ye Mẹrab ne Devid, iran keghi rhie ẹre ne okpia ọkpa ne a tie ẹre Adriẹl ne ovbi ẹvbo ne a tie ẹre Nehola.

²⁰ Sokpan e Mikal ne ovbi Sọl kegha ho ẹmwẹ e Devid, e Sọl ghi họn vberriọ, ọ keghi mobọ ya ẹko rhiẹnrhiẹn ọẹn.

²¹ Ọ keghi kha wẹẹ, “I gha rhie Mikal ne Devid, I gha ya ẹe khuẹn ifi muẹn ne ivbi e Filistin gbe ẹe rua.” Rhunmwuda ọnii, e Sọl keghi tama Devid ukpogieva wẹẹ, “I gha ya ọmọ ne uẹn.”

²² Ọ keghi tama avbe ewọe ẹre ne iran hẹko tama Devid, “Ẹko ruẹ wa rhiẹnrhiẹn ọba, avbe ẹwae ẹre hia wa vbe ho ẹmwẹ ruẹn, ẹghẹ ne ọ kere ne u ya rhie ovbi ẹre rọnmwẹ ọ re ọ na khin.”

²³ E Devid keghi kha wẹẹ, “Uyi nọkhua wa nọ ne ọmwa gha re orruan ọba, ọ kpọlọ sẹ ovbiogue kevbe ovbi evbamarẹn zẹ vbe ne imẹ ye na.”

²⁴ Avbe ewọe nii keghi ya tama e Sọl vbene Devid kha hẹ.

²⁵ E Sọl keghi tama iran wẹ ne iran ya tama Devid wẹẹ, “Emwi ne ọba ho vbe obọ ruẹ ma gberra ukpikolo ọghe ivbi e Filistin iyisẹn ni wulo nẹ, ne ọ ya ọnii rria avbe eghian rẹn ikhi.” (Erriọ ọre Sọl te mwamwaẹn we obọ ivbi e Filistin gha ya vba e Devid).

²⁶ Ewọe e Sọl na ya tama Devid vbene Sọl kha hẹ, ẹko e Devid na rhiẹnrhiẹn yọ wẹ rẹn ra do gha re orruan ọba. Ọ ghi te sẹ ẹdẹ ne a rhie oha rrie.

²⁷ E Devid kevbe emwa rẹn keghi ya gbele ivbi e Filistin uri. Ọ keghi viọ ukpikolo iran, ọ na ya ka ẹe ye otọ vbe odaro ọba ne ọ miẹn ehe na gha re orruan rẹn. Ẹre Sọl na rhie Mikal ne ovbi ẹre ne Devid rhie rọnmwẹ.

²⁸ E Sọl keghi do miẹn vbe ẹmwata wẹ e Nọyaẹnmwa rrọ yaba e Devid kevbe wẹ e Mikal ne ovbi irẹn ho ẹmwẹ ọnrẹn.

²⁹ Rhunmwuda ọnii, ohan e Devid keghi dọlegbe gha mu ẹẹn, ọ keghi wa ya eghian so ẹe vbe ẹdẹ agbọn rẹn hia.

³⁰ Ivbi iyokuo e Filistin ghi gha mu okuo rre, sokpan, ẹghẹ nii hia ọ re a ya miẹn wẹ obọ e Devid ọ re ọ da otọ sẹ ivbi iyokuo e Sọl nekpa hia. Rẹn keghi do dọlegbe gha hin usi yọ.