I Samuẹl 17 - Edo Bible (E Baibol Ẹdo) Version 1996

E Golaiat Si Ivbi Izrẹl Evẹn

¹ Avbe ivbi e Filistin keghi si egbe koko ye Soko ne ọ rre otọ Juda ne iran do khọn okuo; iran keghi bu agọ ye ihe ọkpa ne iran tie ẹre Efes Damim ne ọ rre ẹkpo Soko kevbe Azẹka.

² E Sọl kevbe ivbi Izrẹl kegha die Iya Ela, iran na mu egbe vbe evba ne iran ya gu ivbi e Filistin gbinna.

³ Ivbi e Filistin keghi tẹn ye uhunmwu oke ọkpa, ivbi Izrẹl kevbe tẹn ye uhunmwu oke nọkpa vbe ne iya na gha rre ẹkpo iran.

⁴ Okpia ọkpa ne a tie ẹre Golaiat, ne ovbi ẹvbo ne a tie ẹre Gat, keghi ke uwu ẹbu avbe Filistin ladian, ọ na do si ivbi Izrẹl evẹn. Utanmwẹ ọnrẹn gberra ibata ihinrin,

⁵ ọ keghi mu ẹrhu ẹgere rhuẹ, ọ kevbe mwẹ ẹwu ematọn ne ukhuamwẹ ọnrẹn sẹ omwa uwan isẹn yan iyehan (125).

⁶ A kevbe gbalọ ematọn ya gue ẹre owẹ, ọ kevbe mwẹ ogala ematọn ne ọ de irri yi mu fi la izabọ.

⁷ Asoro ẹre keghi kpolo, ọ ye vbe erhan ido, unu ematọn ne ọ rrọọ keghi re omwa uwan ekesugie. Ovbiyokuo ọkpa ghi ke odaro ne, ẹẹn, ọnii ọ re ọ mu asa mwẹ ọnrẹn.

⁸ E Golaiat ghi mudia, ọ ghi datie ivbi Izrẹl wẹẹ, “De emwi ne uwa ru vbe evba yi, te uwa tẹn khẹ okuo ra? Wa ne eviẹn Sọl na, ovbi e Filistin mẹ khin! Wa zẹ orhiọnkpa vbe uwu uwa ne ọ do gunmwẹ gbinna.

⁹ Obọ ẹre gha ke ukhunmwu, ọ na gbe mwẹ uan, ma ghi khian eviẹn uwa, sokpan, a deghẹ obọ mwẹ ke ukhunmwu, mẹ na gbe ẹe rua, wa ghi khian eviẹn ima.

¹⁰ Evẹn ọre I si ivbiyokuo Izrẹl re vbene I wa mudia ye emwa na nian.” Ọ ghi vbe dọlegbe rhie te ẹe wẹẹ, “Wa danmwẹ ọẹn ghe ne uwa zẹ emwa rre ne ọ do gunmwẹ gbinna.”

¹¹ Ugbẹn vbe Sọl kevbe emwa rẹn ghi họn ẹmwẹ na, udu iran na kpaẹn fi ẹko.

E Devid Vbe Agọ E Sọl

¹² E Devid kegha re ovbi e Jese ne ovbi Ifreim vbe Bẹtlẹhẹm ne Juda. Emọ erẹnrẹn ọre Jese gha mwẹ, ẹghẹ ne Sọl na gha re ọba, e Jese wa khian ọmaẹn nẹ ẹsẹse.

¹³ Ivbi ẹre ne ikpia ni re ọdiọn keghi lele Sọl gha rrie okuo. Ne ọdiọn kegha re Eliab, nọkpa kegha re Abinadab, ne ogieha kegha re Siama.

¹⁴ E Devid kegha re ọvbokhan vbe uwu iran hia, avbe etiọnrẹn ne eha ne ọdiọn kegha rre ehe ne Sọl ye.

¹⁵ E Devid ghi werriegbe gha rrie Bẹtlẹhẹm ẹghẹ hia ne ọ miẹn ehe na ya gha gbearoghe avbe ohuan erhae.

¹⁶ E Golaiat keghi si ivbi Izrẹl evẹn ota vbe owiẹ la ikpẹdẹ iyeva.

¹⁷ Ọ ghi sẹ ẹdẹ ọkpa, e Jese keghi tama e Devid wẹẹ, “Zẹ adanna ọka ne aranmwẹ na kevbe ududu ebrẹd igbe, ne u zẹgiẹgiẹ viọ gie avbe etuẹn vbe agọ.

¹⁸ U ghi vbe viọ ipapa emiowo ne aranmwẹ na gie ọkaokuo ne ọ rre evba. Ya ghe vbene ọ ghi ye avbe etuẹn hẹẹ, u ghi rhie emwi eso rre ne u gha rhiema ighẹ u miẹn iran, kevbe wẹ egbe rran iran.

¹⁹ E Sọl ne ọba, avbe etuẹn kevbe ivbi Izrẹl nekpa hia rre Iya Ela gu ivbi e Filistin khọn.”

²⁰ Ẹdẹ ghi gbe vbe owiẹ ne ọ lele ẹe, e Devid keghi guakpao vbe owiẹ vbirrivbirri, ọ keghi sẹ avbe ohuan rae ne ọmwa ọvbehe, ọ na viọ evbare ọ na gha khian zẹ vbene Jese tama rẹn. Ẹghẹ ne ọ ya sẹ evba kegha re vbe ivbi Izrẹl so ihuan okuo rrie ehe ne iran ghae yi vbe uhunmwu oke.

²¹ Ivbiyokuo avbe Filistin, kevbe ivbiyokuo ivbi Izrẹl keghi mudia ye ihe iran, iran keghi viọ aro da egbe ne iran gbinna.

²² E Devid keghi viọ evbare ne ọmwa ne ọ gha evbare, ọ na rhulẹ gha rrie odaro okuo, ọ na bu etiọnrẹn gha khian ya nọ iran vbene ọ ye iran hẹ.

²³ Ehe ne ọ na wa gu iran guan nii, e Golaiat keghi rre do si iran evẹn vbene ọ ka ru ẹe de yi. E Devid keghi họn vbe ọ guan.

²⁴ Ugbẹn vbe ivbi Izrẹl ghi bẹghe Golaiat, ohan mu iran ẹsẹse, iran keghi lẹkua.

²⁵ Iran keghi tama egbe wẹẹ, “Wa ya ghe ẹre, wa ghe vbene ọ si ọmwa evẹn hẹ! Ọmwaikọmwa ne ọ sẹtin gbe ẹe, ọba gha fe ẹre, ọ ghi rhie ovbi ẹre ne okhuo ne ẹẹn rhie rọnmwẹ, ọ ghi vbe we ne ẹgbẹe erhae ghẹ ghi zẹ igho uhunmwu.”

²⁶ E Devid keghi nọ emwa ni mudia ke ẹe vbe evba wẹẹ, “De emwi ne a gha ru ne ọmwa ne ọ sẹtin gbe ọmwa na yi, ne ọ vbe ban ukpọn efaa na hin Izrẹl ẹkun rre? Vbe ọ ke rre ighẹ ọ na ghẹ ovbi e Filistin ne ukpikolo, ne ọ do gha fa iran an ighẹ ivbiyokuo Osanobua ne ọ rrọọ.”

²⁷ Iran keghi tama rẹn emwi ne a gha ru ne ọmwa ne ọ gbe Golaiat.

²⁸ Eliab ne ọtẹn e Devid ne ọdiọn keghi họn vbe ọ gu emwa nii guan. Ohu ẹre keghi mu ẹẹn, ọ na tama rẹn wẹẹ, “Vbe u a ru vbe emwa na yi? De ọmwa ne u sẹ avbe ohuan ni rae na vbe uwu oha yi? U ghe ẹre ighẹ gie aro mwẹ sẹ! Ghe ẹhi ẹre, okuo ọ re ọ rre do ghe!”

²⁹ E Devid keghi kha wẹẹ, “Vbe i a ghi ru nian? Ne imẹ ghẹ vbe zẹdẹ nọ ọta hiehie?”

³⁰ Ọ na mu aro da ọmwa ọvbehe, vbe nọ ọta ọkpa nii, ẹghẹikẹghẹ ne ọ ya nọọn, ewanniẹn ọkpa nii ọ re ọ miẹn.

³¹ Emwa eso ghi họn vbene Devid kha hẹ, iran na tama e Sọl, rẹn keghi gie ne a tie ẹre rre.

³² E Devid keghi tama e Sọl wẹẹ, “Ọmwa rhọkpa ghẹ gie afianma ovbi e Filistin na fian ẹẹn. I gha ya gu ẹe gbinna.”

³³ E Sọl keghi wanniẹn wẹẹ, “Ẹn o, vbe u a ghi ra ya sẹtin gu ẹe gbinna hẹ? Ọvbokhan kherhe wẹ khin, okuo ọ re irẹn khọn ke ne a biẹ ọe gha dee!”

³⁴ E Devid keghi kha wẹẹ, “U gha tọ u kpẹre Umogun, mẹ ọ re ọ gbearoghe avbe ohuan erha mwẹ. Ẹghẹikẹghẹ ne oduma ra akpakomiza a rhirhi ya mu ohuan,

³⁵ I ghi lele ẹe, I ghi dekun ẹnrẹn, I ghi wọlọ ovbi ohuan hin ẹre unu rre. a deghẹ nene oduma ra akpakomiza ghi mu igbinna gun mwẹ, I ghi gba ẹre ẹho mwẹ, I ghi gbe ẹe rua.

³⁶ I gbele avbe oduma kevbe akpakomiza, e rriọ I ra vbe ru e Filistin ne ukpikolo na, ọmwa ne ọ fa ivbiyokuo Osanobua nọ rrọ ua.

³⁷ E Nọyaẹnmwa ne ọ fan mwẹ vbe obọ oduma kevbe akpakomiza, gha vbe fan mwẹ vbe obọ e Filistin na.” E Sọl keghi kha wẹẹ, “Ọ maa khekherriọ, gha khian, Osanobua gha yaba ruẹ.”

³⁸ Ọ keghi viọ ẹwu okuo ọghe ọe ne Devid ne ọ hẹ yọ, ọ keghi mu ẹrhu ẹgere rhuẹ Devid, ọ na ma ẹwu igbinna ematọn nẹ.

³⁹ E Devid keghi yọ ẹwu igbinna okuo nii, ọ na te wẹ ne irẹn gha khian. Sokpan ọ ma sẹtin, rhunmwuda, ọ ma he hẹ iran ye egbe ẹdẹ. Rẹn keghi tama e Sọl wẹẹ, “Mẹ i sẹtin ya ena hia gbinna, I ma he guẹ ọe.” Ẹre ọ na bannọ ehia kua.

⁴⁰ Rẹn keghi rhie ọkpọ ọsuohuan Ọghe ọe, ọ na hannọ ikpokuta ne rọnmọ rọnmọ isẹn vbe ẹzẹ, ọ na viọ ye ẹkpo ẹre, ọ keghi rhie umọvọn rẹn mwẹ obọ, ọ na bu e Golaiat gha khian.

Obọ E Devid Ke Okhunmwu Ne Ọghe Golaiat

⁴¹ E Filistin ni kegha bu e Devid dee, vbene ọmwa ne ọ viọ emwi igbinna mwẹ ọnrẹn na ke odaro ne ẹẹn, ọ na gha sikẹ ọre dee.

⁴² Ugbẹn vbe ọ ghi dẹghe e Devid ẹse nẹ, ohu ẹre keghi mu ẹẹn ẹsẹse rhunmwuda, ọmọ ne ọ mose ẹsẹse nọ.

⁴³ Ọ keghi tama e Devid wẹẹ, “Vbe u a ye ovbi erhan nii ru yi? Te u ro ighẹ ekita mẹ khin ra?” Ọ na gha mu ẹbọ ne ọ gho gbe Devid.

⁴⁴ Ọ na tama e Devid wẹẹ, “Bu mwẹ gha dee, I gha mu ikun ruẹn ne ahianmwẹ kevbe aranmwẹ rhie re.”

⁴⁵ E Devid keghi wanniẹn wẹẹ, “Te uwẹ bu imẹ dee nian, ke uwẹ kevbe umozo, asoro kevbe ogala, sokpan, mẹ bu ruẹ dee vbe eni e Nọyaẹnmwa ne Udazi, ne ọ re Osanobua ivbiyokuo Izrẹl, ne uwẹ fara.

⁴⁶ E Nọyaẹnmwa gha rhie ruẹ ye ẹtin mwẹ atataobọ ẹdẹnẹrẹ na, obọ mwẹ gha ke ukhunmwu ne uẹn, I gha fian uhunmwu ruẹn fua, I ghi viọ ikun ivbiyokuo e Filistin ne avbe ahianmwẹ kevbe aranmwẹ ne iran gha re. Otọ agbọn hia ghi rẹn wẹ, Izrẹl mwẹ Osanobua.

⁴⁷ Emwa ni rre emwa hia ghi rẹn wẹ, ọ gha miẹn emwa rẹn fan, ẹ i vbe miẹn umozo kevbe asoro nẹ ọ ke ru ẹe. Rẹn ọ re ọ khọn miotọ vbe okuo, te ọ ra viọ uwa hia ye ẹtin ima obọ.”

⁴⁸ E Golaiat keghi vbe dọlegbe gha khian bu e Devid dee, ẹre Devid na zẹgiẹgiẹ rhulẹ ghe ehe ne ivbiyokuo e Filistin tẹn yi khẹ igbinna ne ọ ya gu ẹe gbinna.

⁴⁹ E Devid keghi fi obọ ye ẹkpo ẹre ọ na rhie ikpokuta ladian, ọ na ya umọvọn fi ẹe gie Golaiat. Ọ na wa vba ẹre uharo, ọ na hae la ẹre uwu uhunmwu, e Golaiat keghi de mu aro rhu otọ.

⁵⁰ Erriọ ọ re obọ e Devid ya ke okhunmwu ne Golaiat vbene umozo i na rrọ, ọ na ya umọvọn kevbe ikpokuta gbe ẹe rua.

⁵¹ Ọ keghi rhulẹ bu ẹre gha khian, ọ na mudia yan rẹn, ọ na yuo umozo e Golaiat hin ako ẹre rre, ọ keghi fian ẹre uhunmwu, ọ na gbe ẹe rua. Ugbẹn vbe ivbi e Filistin ghi miẹn wẹ, asukpekhae iran wu, iran keghi lẹkua.

⁵² Ivbi Izrẹl kevbe Juda keghi khu iran gha we lele iran khian, iran keghi khu iran rhinrin ya sẹ e Gat kevbe ya sẹ onurho Ẹkrọn. Ivbi e Filistin ne emwi vbare keghi dele lele odẹ e Siareim, ya sẹ e Gat kevbe Ẹkrọn.

⁵³ Ivbi Izrẹl keghi werriegbe vbe ehe ne iran na te khulo ivbi e Filistin khian, iran keghi fu iran emwi viọ vbe agọ iran.

⁵⁴ E Devid keghi mu uhunmwu e Golaiat gha rre Jerusalẹm, sokpan ọ keghi viọ emwi igbinna e Golaiat ye owa ukpọn ọghe irẹn.

A Rhie Devid Bu E Sọl Gha Dee

⁵⁵ E Sọl ghi miẹn vbe Devid bu e Golaiat khian ne ọ ya guẹe gbinna, ọ keghi nọ Abna ne ọkaivbiyokuo ẹre wẹẹ, “Abna, de ovbi ọmwa ne ọ khin yi?” Abna keghi wanniẹn wẹẹ, “I ma zẹdẹ rẹn hiehie Umogun.”

⁵⁶ E Sọl keghi khama rẹn wẹẹ, “Gha khian, ya gualọ otọ ẹre rre khekherriọ.”

⁵⁷ Ugbẹn vbe Devid ghi werriegbe sẹ agọ vbe ọ ghi gbe Golaiat nẹ, Abna keghi rhie ẹre hu e Sọl gha khian. Te Devid ye dada uhunmwu e Golaiat mwẹ obọ.

⁵⁸ E Sọl keghi nọ rẹn wẹẹ, “Ọmọ okpia, ovbi ao u khin.” E Devid keghi wanniẹn wẹẹ, “Ovbi ọguọmwadia ruẹ ighẹ Jese ne ovbi e Bẹtlẹhẹm ọre I khin.”