I Samuẹl 16 - Edo Bible (E Baibol Ẹdo) Version 1996

A Ma Devid Ọba

¹ E Nọyaẹnmwa keghi tama e Samuẹl wẹẹ, “Inu ẹghẹ u ra khiẹ e Sọl la yi? Mẹ rhie ẹre hin ọba Izrẹl rre nẹ. Gualọ ẹvbi ọliv eso rhie mwẹ obọ. I gha gie uẹ gha rrie ọghe Jese ne ọ rre Bẹtlẹhẹm, rhunmwuda, I zẹ ọkpa vbe uwu ivbi ẹre nẹ ne ọ rriọba.”

² E Samuẹl keghi nọọn wẹẹ, “Vbe i a gha na ru emwi vberriọ hẹ? E Sọl gha họn te ọ gbe mwẹ uan!” E Nọyaẹnmwa keghi wanniẹn wẹẹ, “Mu ovbi ẹkhuia ẹmila mwẹ obọ, ne u kha wẹ te u do zọ ese ghe Nọyaẹnmwa.

³ Tie Jese ye izọ ese na, I gha tama ruẹn emwi ne u gha ru. Ọmwa ne I ghi tama ruẹn, u ghi ma ẹre ọba.”

⁴ E Samuẹl keghi ru zẹ vbene Nọyaẹnmwa wẹ ne ọ ru, ọ na gha rrie Bẹtlẹhẹm. Avbe ọkaolotu ẹvbo nii keghi rre do vba ẹre vbene iran na guọ zẹzẹzẹ, iran nọ rẹn wẹẹ, “Ọbiro, a deghẹ okhian maa?”

⁵ Rẹn keghi wanniẹn wẹẹ, “Ẹn, te I rre do zọ ese ghe Nọyaẹnmwa. Wa họnmwẹ egbe ne uwa bu mwẹ gha dee.” Ọ keghi vbe wẹ Jese kevbe ivbi ẹre họnmwẹ egbe, ọ na wẹ ne iran vbe gha die ehe izọese nii.

⁶ Iran ghi rre nẹ, e Samuẹl keghi dẹghe Eliab, ọ na ye ekhọe ẹre kha wẹẹ, “Ọmwa na ne ọ mudia ye odaro e Nọyaẹnmwa na, ọrọre ọmwa ne ọ zẹẹ.”

⁷ Sokpan, e Nọyaẹnmwa tama rẹn wẹẹ, “Ghẹ ghe ẹre wẹ ọ tanẹn ra wẹ ọ mose, mẹ he ẹe nẹ, rhunmwuda, ẹ i re vbene ọmwa ne agbọn ghe emwi ọ re imẹ ghe ẹre. Agbọn ghe ikpakpa, sokpan, ekhọe imẹ ghe.”

⁸ Ẹre Jese na tie Abinadab ne ovbi ẹre, ọ na rhie ẹre bu e Samuẹl gha dee. Sokpan, e Samuẹl wanniẹn wẹẹ, “Ẹn o, e Nọyaẹnmwa ma vbe zẹ ọna.”

⁹ Ẹre Jese na vbe rhie Saima rre. E Samuẹl kevbe kha wẹẹ, “E Nọyaẹnmwa ma vbe zẹ ọna.”

¹⁰ Erriọ ọre Jese ya viọ ihinrọn vbe uwu avbe ivbi ẹre bu e Samuẹl rre. E Samuẹl tama rẹn wẹẹ, “Ne Nọyaẹnmwa zẹe i rre uwu iran na rhọkpa.”

¹¹ Ọ keghi nọ rẹn wẹẹ, “U ye mwẹ emọ ikpia ọvbehe ra?” E Jese keghi wanniẹn wẹẹ, “Ne ọvbokhan ne ọ rrọọ, ọre ọ ghi ke ẹe sokpan, ọ rre ehe ne ọ na su ohuan.” E Samuẹl keghi kha wẹẹ, “Ya tie ẹre rre, ọ ma rre nẹ ma i zọ ese na.”

¹² Ẹre Jese na gie na a ya tie ẹre rre. Rẹn kegha re igbama ne ọ mose ẹsẹse kevbe ne egbe vbe rran, kevbe ne aro ẹre fi usanna. E Nọyaẹnmwa keghi tama e Samuẹl wẹẹ, “Ọna nọ, ma ẹre ọba!”

¹³ E Samuẹl keghi mu ẹvbi ọliv nii, ọ keghi sirra etiọnrẹn hia nọnọ ori ye ọre uhunmwu. Orhiọn Nọyaẹnmwa na hin yan e Devid vbe ọwarọkpa nii, ọ na vbe guẹe gha rrọ ke ẹghẹ nii kpao. Ẹre Samuẹl na gha rrie Rama.

E Devid vbe Ẹguae Sọl

¹⁴ Orhiọn e Nọyaẹnmwa keghi kpao sẹ e Sọl rae, orhiọn dan ne Nọyaẹnmwa gie rre keghi do gha mu ẹẹn rueghe.

¹⁵ Eguọmwadia ẹre keghi tama rẹn wẹẹ, “Ma rẹnrẹn wẹ orhiọn dan ne Nọyaẹnmwa gie rre wa mu uẹn rueghe nian.

¹⁶ Rhunmwuda ọnii, gie ima, ne ima ya gualọ ọmwa ne ọ guara kpe akpata rre. A deghẹ orhiọn dan ni ghi vbe rre, ọmwa nii ghi kpe akpata, orhiọn dan ghi kannọ obọ hin ruẹn egbe rre.”

¹⁷ E Sọl keghi tama iran wẹẹ, “Wa gunmwẹ gualọ ọmwa ne ọ guara kpe ẹsẹse, ne uwa rhie ẹre gunmwẹ.”

¹⁸ Ọkpa vbe uwu iran ni mudia ke ẹe ke ghi kha wẹẹ, “E Jese ne ovbi e Bẹtlẹhẹm mwẹ ọmọ okpia ọkpa ne ọ wa guara kpe akpata. Ọmwa ne ọ din wa nọ, ovbiyokuo ẹmwata, ọmwa ne ẹmwẹ ma ẹre unu, ke ne ọ mose. Nọyaẹnmwa rrọ yaba ẹre.”

¹⁹ Ẹre Sọl na gie emwa ya tama e Jese wẹẹ, “Gie ovbi uẹ ighẹ e Devid ne ọsuohuan bu mwẹ gha dee.”

²⁰ E Jese keghi gie Devid bu e Sọl gha khian, ọ na mu ọgọ ohian ayọn ọkpa, kevbe ovbi ẹwe kevbe ebrẹd ne ọ sẹ ekẹtẹkẹtẹ ọkpa mu, gie ẹe.

²¹ E Devid keghi bu e Sọl gha dee, ọ na gha winna ne ẹẹn. E Sọl keghi wa ho ẹmwẹ ọnrẹn ẹsẹse, ọ na gie ẹe gu irẹn gha viọ emwi igbinna mwẹ.

²² Ẹre Sọl ghi na gie ne a khama e Jese wẹẹ, “Ẹmwẹ e Devid wa yẹ mwẹ. Gie ẹe tota ke mwẹ ne ọ gha winna mẹ.”

²³ Ke ẹghẹ nii kpao, ẹghẹikẹghẹ ne orhiọn dan ne Osanobua gie rre ghi ya hin yan e Sọl, e Devid ghi mu akpata ẹre gha kpee. Orhiọn dan nii ghi sẹ ọc rae, egbe ghi do rran e Sọl, ọ ghi do werriegbe gha ye ẹe ẹse.