I Samuẹl 15 - Edo Bible (E Baibol Ẹdo) Version 1996

Okuo Ivbi Amalẹk

¹ E Samuẹl keghi khama e Sọl wẹẹ, “Mẹ ọ re Nọyaẹnmwa gie ne ọ ma uwẹ ọba ivbi Izrẹl ne emwa rẹn. Banbanna nian, danmwehọ ẹmwẹ ne Nọyaẹnmwa Oghodua khare.

² Rẹn ra rri ivbi Amalẹk oya rhunmwuda avbe erha iran odede mu aro igbinna da ivbi Izrẹl vbe ẹghẹ ne iran na gha ke otọ Igipt dee.

³ Gha khian, ya dekun emwa Amalẹk ne u wa fuẹn emwi hia ne iran mwẹ uan fẹẹrẹ. Ghẹ sẹ emwi ọkpa rae, wa gbele ehia a, ikpia ikhuo, ibiẹka, emọ obọ, ẹmila, ohuan e kamẹl kevbe ekẹtẹkẹtẹ.”

⁴ E Sọl keghi tie iyokuo ẹre si koko, ọ keghi ghe iran ghe vbe Tẹlẹm. Ivbiyokuo ni ke Izrẹl rre kegha re arriaisẹn uri (200,000) iran ni ke Juda rre kegha re arriaisẹn igbe (10,000).

⁵ Ẹre irẹn vbe emwa rẹn na gha rrie Amalẹk, iran na ya rhuẹ khẹ iran vbe uwu iya ẹzẹ ne ọ kae.

⁶ Ọ keghi tama ivbie Ken wẹẹ, “Wa ladian ne uwa kpao sẹ ivbi Amalẹk rae, ne I ghẹ gbele uwa ba iran. Wa mwẹ itohan ghe ivbi Izrẹl ẹghẹ vbe iran ke Igipt dee.” Ẹre emwa Ken na kpao.

⁷ E Sọl keghi khọn ivbi Amalẹk mu otọ ke Havila kpao ya sẹ Siọ vbe ọlarre owẹn Igipt.

⁸ Ọ keghi mu Agag ne ọba oghunmwu ke ẹe kevbe ẹmwẹ ne unu. Sokpan ọ keghi gbele emwa nekpa hia a.

⁹ E Sọl kevbe emwa rẹn sẹ Agag rae ye agbọn, iran ma vbe gbele avbe ohuan ni maa sẹẹ, avbe ẹmila, avbe ivbi ẹkhuia ẹmila ni maa sẹẹ kevbe ivbi ohuan ra avbe emwi ọvbehe hia ni rhirhi gha maa. Sokpan, iran keghi fuẹn emwi hia ni kulo kevbe ne ẹ i mwẹ vbe ọ gia ya ru hia a.

A Rhie Sọl Hin Ukpo Ọba Rre

¹⁰ E Nọyaẹnmwa keghi gu e Samuẹl guan wẹẹ,

¹¹ “Ọ da mwẹ ne I na ma e Sọl ọba, ọ fi iyeke gbe mwẹ nẹ, te ọ ghi rra uhi mwẹ.” Ohu keghi mu e Samuẹl, ọ na ye asọn ni hia rinmwian e Nọyaẹnmwa.

¹² Ẹdẹ ghi gbe vbe owiẹ ne ọ lele ẹe, ọ keghi gua kpao ne ọ ya gualọ e Sọl. Ọ keghi họn wẹ e Sọl rrie ẹvbo ne a tie ẹre Kamẹl ehe ne ọ na ma orre ọkpa ne egbe ẹre, ọ vbe ke evba kpao gha rrie Gilgal nẹ.

¹³ E Samuẹl keghi bu e Sọl, e Sọl keghi tuẹ ọe wẹẹ, “E Nọyaẹnmwa ne ọ fiangbuẹ e Samuẹl. I ru nẹ zẹ vbene ọ kha re.”

¹⁴ E Samuẹl keghi nọ wẹẹ, “Vbọzẹ ne imẹ na ye họn utumwẹ ẹmila kevbe ọghe ohuan yi?”

¹⁵ E Sọl keghi wanniẹn wẹẹ, “Obọ ivbi Amalẹk ọre emwa mwẹ na viọ ẹre. Iran viọ avbe ohuan kevbe ẹmila ni maa sẹ hin rre ne iran ya zọ ese ghe Nọyaẹnmwa ne Osanobua ruẹ. Ma fuẹn e ni ghi dekẹe hia fẹẹrẹ.”

¹⁶ E Samuẹl keghi tama rẹn wẹẹ, “Ta ẹe sẹ evba. I gha tama ruẹn ẹmwẹ ne Nọyaẹnmwa tama mwẹ nasọn.” E Sọl keghi kha wẹẹ, “Ta ẹe ma mwẹ.”

¹⁷ E Samuẹl keghi wanniẹn wẹẹ, “A gha rhe miẹn wẹ, wẹ ma ka egbe ruẹ ye emwi rhọkpa, wẹ ọrọre ọkaolotu ẹwae emwa Izrẹl. Nọyaẹnmwa ọ re ọ ya a ma ọba Izrẹl.

¹⁸ Ọ na vbe gie uẹ ne u ya fuẹn emwa Amalẹk ne emwa dan ni rua. Ọ tama ruẹn wẹ ne u gbinna rhinrin u te do fuẹn iran hia a.

¹⁹ Vbọ ghi zẹ ne u na he uhunmwu ye ọre obọ? Vbọzẹ ne uwa na do emwi gha fu hẹẹ, ne uwa na gha ru emwi ne ẹ i yẹ e Nọyaẹnmwa?”

²⁰ E Sọl keghi kha wẹẹ, “I ru vbene e Nọyaẹnmwa kha re. I ladian gha khian vbene ọ wẹ ne I ru, I mu ọba Agag gha dee, I keghi gbele emwa Amalẹk hia.

²¹ Sokpan avbe emwa mwẹ ma gbele avbe ẹmila kevbe ohuan ni maa sẹ ne iran munọ ẹn, sokpan iran keghi viọ iran gha die Gilgal vbe emwana, ne iran ya zọ ese ghe Nọyaẹnmwa Osanobua ruẹ.”

²² E Samuẹl keghi kha wẹẹ, “De ne ọ yẹ e Nọyaẹnmwa sẹẹ vbọ yi? Ahọn ẹmwẹ ra ese ne a zọọ? A họn ẹmwẹ ne ẹẹn, ọre ọ maa sẹẹ ne a gha gbe ohuan ne ọ maa sẹẹ ne ẹẹn.

²³ Ne a sọtẹ ọre vbe rhia vba azẹn, kevbe ne gha tọn egbe mu, te ọ vbe ye vbe orukhọ ẹbọ ne a gho. Rhunmwuda ighẹ wẹ ma rhie ẹmwẹ e nọyaẹnmwa, rẹn vbe rhie ruẹ hin ọba rre.”

²⁴ E Sọl keghi wanniẹn wẹẹ, “I ru orukhọ nẹ, I ma rhie iyi ọghe Nọyaẹnmwa kevbe igiodẹ ne uwẹ ru mwẹ. Ohan avbe emwa mwẹ ọ re ọ gha mu mwẹ, I keghi ru vbene iran ho.

²⁵ Sokpan, banbanna nian, I rinmwian, ya orukhọ mwẹ bọ mwẹ, ne u lele mwẹ werriegbe gha rrie Gilgal ne I miẹn ehe na ya ga e Nọyaẹnmwa.”

²⁶ E Samuẹl keghi wanniẹn wẹẹ, “I i lele uẹ werriegbe rrie evba, u he iyi e Nọyaẹnmwa, rẹn vbe he uwẹ nẹ zẹ vbe ọba ivbi Izrẹl.”

²⁷ Ẹre Samuẹl na fi egbe werriẹ ne ọ kpaa, sokpan e Sọl keghi da ẹre agbada ẹwu yi, ọ keghi sọọ.

²⁸ E Samuẹl keghi tama rẹn wẹẹ, “E Nọyaẹnmwa yanghan arriọba Izrẹl hin ruẹn obọ rre ẹrẹna, ọ keghi mu ne ọmwa ọvbehe ne ọ maa sẹ ruẹ.

²⁹ Ọba Oghodua ugborrirri ọghe Izrẹl i ta ohoghe ra ne ọ gha fi ekhọe werriẹ, rẹn i re ọmwa kẹkan, ẹ i gbe yo gbe rre.”

³⁰ E Sọl keghi wanniẹn wẹẹ, “I rukhọ nẹ, sokpan, mu uyi yọmwẹ egbe vbe sirra avbe ọkaolotu emwa mwẹ kevbe Izrẹl hia. Lele mwẹ werriegbe ne I miẹn ehe na ya ga e Nọyaẹnmwa ne Osanobua ruẹ.”

³¹ Ẹre Samuẹl na lele ẹe werriegbe gha rrie Gilgal. E Sọl keghi ga e Nọyaẹnmwa.

³² E Samuẹl keghi kha wẹẹ, “Wa mu Agag ne ọba bu mwẹ gha die emwa na.” Agag kegha dee vbene ọ na guọ vbe ọ dee. Ọ keghi kha wẹẹ, “Uwu mianmwẹ gbe!”

³³ E Samuẹl keghi kha wẹẹ, “Vbene umozo ya iye nibun khian ne ẹ i ghi mwẹ emọ, erriọ ọ re iye uẹ ra vbe khian ne ẹ i ghi mwẹ ọmọ ẹrẹna.” Ọ keghi hele Agag ike yo odaro aka ne ọ rre Gilgal.

³⁴ Ẹre Samuẹl na gha rrie Rama. E Sọl ne ọba kevbe gha rrie owa vbe Gibea.

³⁵ E Samuẹl ma ghi dọlegbe miẹn ọba vbe ẹghẹ ne ọ ghi ya vbe agbọn, sokpan, ọ keghi khiẹ ọre. Ọ keghi da e Nọyaẹnmwa wẹ rẹn ma e Sọl ọba Izrẹl.