I Samuẹl 14 - Edo Bible (E Baibol Ẹdo) Version 1996

Emwi Udinmwẹ Ne Jonatan Ru

¹ Ọ ghi sẹ ẹdẹ ọkpa, e Jonatan keghi tama igbama ne ọ hẹ emwi igbinna mwẹ ọnrẹn wẹẹ, “Gie ima fian ẹẹn rra gha rrie agọ ivbi e Filistin.” Sokpan, e Jonatan ma tama erhae ighẹ Sọl.

² E Sọl keghi gba agọ ye ẹzi erhan nọkhua ọkpa vbe Migrọn, vbe ehe ne ọ ma rrei gbe vbe Gibea, ọmwa arhin uri eha (600) kegha gue ẹe.

³ (Ohẹn ne ọ mu adaghọ rhuan kegha re Ahija ne ovbi ọtẹn Ikabọd ne a tie ẹre Ahitub ne ovbi e Finihaz, eyẹ Elai ne ohẹn e Nọyaẹnmwa vbe Siailo.) Emwa nii ma rẹn wẹ e Jonatan ladian.

⁴ Vbe Ada e Mikmas okuta eva nekhua ne kpannọ kpannọ kegha rre odẹ ne Jonatan ra fian rra ya vba avbe e Filistin, ọkpa vbe obọ na kevbe nọkpa vbe obọ nọkpa. A kegha tie ọkpa vbọ Bozez, a keghi tie nọkpa Sẹnẹ.

⁵ Ọkpa kegha rre obọ okuọ Ada nii, ọ mu aro da Mikmas, nọkpa kegha rre obọ ekẹn, ọ na mu aro da Geba.

⁶ E Jonatan keghi khama igbama nii wẹẹ, “Gie ima fian ẹẹn rra gha rrie agọ avbe Filistin ne enigẹbọ na. Ọ gha kẹe, e Nọyaẹnmwa gha yi ma obọ, ọ gha ru vberriọ, emwi ọkpa ne ọ gha wẹ ne ima ghẹ khọnmiotọ i rrọ, vbe ne ọ khọnrẹn wẹ ne ima ru ibozẹghẹ sẹ.”

⁷ Igbama nii keghi wanniẹn tama rẹn wẹẹ, “Ru emwi ne ọ rhirhi gha re uwẹ ekhọe, I rrọ yaba ruẹ.”

⁸ E Jonatan keghi kha wẹẹ, “Ọ maa khekherriọ, ma gha fian ẹẹn rra ne a gie avbe emwa ni bẹghe ima.

⁹ Iran gha kha wẹ ne ima diakhẹ iran ni iran bu ima gha dee, ma ghi mudia ye ehe ne ima ye.

¹⁰ Sokpan, iran gha tama ima wẹ ne ima bu iran gha dee, ma ghi gele ru vberriọ, rhunmwuda, ọnii ọ khian gha re ama wẹ e Nọyaẹnmwa rhie akhọnmiotọ yan iran ne ima nẹ.”

¹¹ Ẹre iran na gie ivbi e Filistin deghẹ iran, ivbi e Filistin keghi kha wẹẹ, “Ghe vbe ivbi e Hibru eso ke uwu uvun ne iran te lẹre yi ladian.”

¹² Ẹre ivbiyokuo e Filistin na datie Jonatan kevbe igbama ni wẹẹ, “Wa gha die edinran, ma mwẹ ẹmwẹ ne ima ra tama uwa!” E Jonatan keghi tama igbama ni wẹẹ, “Lele mwẹ, e Nọyaẹnmwa rhie akhọnmiotọ vbe uhunmwu iran ne ivbi Izrẹl nẹ.”

¹³ E Jonatan keghi hin odukhunmwu, vbe ne ọ na ya obọ vbe owẹ kinnọ ẹn, igbama ni keghi lele ẹe. E Jonatan keghi dekun ivbi e Filistin nii, ọ na viọ ehia fianmwẹ otọ, igbama nii keghi gbele iran an.

¹⁴ Inu emwa ne iran gbele vbe ugbemwẹ ne okaro na ighẹ Jonatan kevbe igbama nii, kegha re omwa arhin ugie vbe igbinna ne iran gbinnaẹn vbe otọe ne ọ re ukhiọnmwẹ awowo ọkpa.

¹⁵ Ohan dan keghi mu ivbi e Filistin ni rre uwu oha nii hia, iran ni fu emwi viọ kevbe avbe ivbiyokuo ni rre agọ nii, kegha guọ zẹzẹzẹ, otọe keghi mu rueghe, ehe hia na tighi ua.

A Khọn Ivbi E Filistin Mu Otọ

¹⁶ Ibiẹka e Sọl ni bodẹ vbe Gibea vbe otọ e Bẹnjamin keghi bẹghe vbe ivbi e Filistin hia gha hẹ yo hẹ rre, vbene iran ma na rẹn emwi ne iran gha ru.

¹⁷ Ẹre Sọl na tama emwa rẹn wẹẹ, “Wa ka avbe ivbiyokuo ne a miẹn ehe na rẹn iran ni i rre emwa vbọ.” Iran keghi do miẹn wẹ, e Jonatan kevbe igbama ne ọ viọ emwi igbinna lele ẹe i ghi rre evba.

¹⁸ E Sọl keghi tama Ahija ne ohẹn wẹẹ, “Mu adaghọ nii rre” (rhunmwuda, vbe ẹdẹ ne a kha na te Ahija mu ẹẹn ke odaro ne ivbi Izrẹl).

¹⁹ Vbene Sọl wa gu ohẹn guan nii, otighi ne ọ rre agọ e Filistin kegha rhia yọ, e Sọl keghi rhunmwuda onii tama rẹn wẹẹ, “Ẹghẹ i rrọ ne a ya nọ e Nọyaẹnmwa!”

²⁰ Ẹre irẹn vbe emwa rẹn na vẹ la okuo bu emwa e Filistin ne emwi hia zighi mu, iran na gha gu egbe iran khọn.

²¹ Ivbi e Hibru eso ni te ka deba emwa e Filistin, iran na lele iran gha rrie okuo, keghi fi obọ werriẹ, iran na deba e Sọl kevbe Jonatan.

²² Avbe ivbi Izrẹl ni te ka lẹre ye uhunmwu oke Ifreim keghi họn wẹ avbe e Filistin lẹ khian, iran keghi vbe rhie obọ ba iran, iran na ya yan ivbi e Filistin.

²³ Okuo ni keghi gberra e Betavin, e Nọyaẹnmwa keghi miẹn ivbi Izrẹl fan vbe ẹdẹ ne ẹdẹrriọ.

Emwi Ni Sunu Vbe Iyeke Okuo Nii

²⁴ Vbe ẹdẹ ne a kha na, ohanmwẹ keghi wọ ivbi Izrẹl egbe, rhunmwuda, e Sọl ya eyan ne ọ ke ekhọe rre tama emwa hia wẹẹ, “Emwi ọ gha rruan ọmwaikọmwa ne ọ rri evbare ẹrẹna I te do rria ikhi vbe egbe avbe eghian mwẹ.” Ọ re a na miẹn wẹ, ọmwa rhọkpa ma he rri evbare ẹdẹ nẹdẹrriọ hia.

²⁵ Iran hia keghi do sẹ uwu ẹgbo, iran keghi miẹn owọn vbe ehe hia.

²⁶ Owọn wa vuọn oha nii hia, sokpan a ma miẹn ne ohan gie ẹe danmwẹ ọẹn rhunmwuda ohan ihẹn ne Sọl tiere mu iran.

²⁷ Sokpan, e Jonatan ma họn vbe erhae tie ihẹn yọ ma emwa nii: rẹn keghi niẹn ọkpọ ne ọ gue ẹe vbe obọ, ọ na dinmwi ẹẹn ye uwu oko owọn, ọ keghi re vbe owọn nii. Ọwarọkpa nii, egbe keghi sasa ẹe sẹ ayọ.

²⁸ Sokpan, ọkpa vbe uwu avbe emwa nii keghi kha wẹẹ, “Obọ ohanmwẹ da emwa hia, sokpan erha a yan ma ima wẹẹ, ‘Emwi ọ gha rruan ọmwa ne ọ rhirhi a rri evbare ẹrẹna.’ ”

²⁹ E Jonatan keghi kha wẹẹ, “Emwi ne ọ mu ohan erha mwẹ wa ru emwa na re, ghe vbene egbe ma mwẹ hẹ nian rhunmwuda ne I na rri owọn kherhe!

³⁰ U ma miẹn vbene ọ gha te gha ma hẹ akpawẹ te emwa na rri evbare ne iran miẹn vbe iran khọn avbe eghian nẹ, ẹ i re avbiẹ emwa e Filistin iran gha te ye gbele.”

³¹ Vbe ẹdẹrriọ, ivbi Izrẹl keghi khọn ivbi e Filistin kevbe Mikmas kpao ya sẹ Aijalọn, obọ ohanmwẹ keghi kakahọ da ivbi Izrẹl.

³² Iran keghi rhunmwuda onii de rhu emwi ne iran khọn viọ vbe obọ avbe eghian iran, iran keghi viọ avbe ohuan, ẹmila kevbe ivbi ẹmila, iran keghi gbele ehia vbe evba dandaandan, iran rri emiowo ẹre ke ẹe kevbe esagiẹn.

³³ Iran keghi ya tama e Sọl wẹẹ, “Ghe vbe avbe emwa nii gha ru khọ ghe e Nọyaẹnmwa vbe kpa ne iran na rri emiowo ke ẹe kevbe esagiẹn.” E Sọl keghi datu wẹẹ, “Etẹ wa khin, wa werriẹ okuta nọkhua ọkpa bu mwẹ gha die emwa.”

³⁴ Rẹn keghi kha wẹẹ, “Ya tama iran hia ne iran viọ ẹmila ke ohuan iran gha die edinran. Emwa ọre iran gha na vbe gbele ẹe ne iran rri ọe, ne iran ghẹ ghi rukhọ ghe e Nọyaẹnmwa vbekpa ne iran na rri emiowo ke ẹe kevbe esagiẹn.” Rhunmwuda ọnii, iran hia keghi viọ ẹmila iran gha dee do gbele vbe evba.

³⁵ E Sọl keghi gba aka ọkpa ne Nọyaẹnmwa, ọna ọrọre ne okaro ne ọ ka gha gba.

³⁶ E Sọl keghi tama emwa rẹn wẹẹ, “Wa gie ima ya hẹ rhu avbe emwa e Filistin vbe asọn, a ghi viọ iran emwi vbe ẹdẹ te do gbe ne a gbele iran hia a.” Iran keghi wanniẹn tama rẹn wẹẹ, “Ru ẹe vbene u roro ighẹ ọ ke yi vbe ekhọe ruẹ.” Sokpan, ohẹn ke kha wẹẹ, “Gia ka nọ Osanobua nẹ.”

³⁷ Ẹre Sọl na nọ Osanobua wẹẹ, “Ne I dekun ivbi e Filistin ra? U gha gie ima khọnmiotọ ra?” Sokpan, Osanobua ma zẹ ẹmwẹ wanniẹn ẹdẹrriọ.

³⁸ Ẹre Sọl na tama avbe ọkaolotu emwa ni wẹẹ, “Wa larre ne uwa do gualọ orukhọ ne a ru ẹrẹna miẹn.

³⁹ I ya eni e Nọyaẹnmwa nọ rrọọ ọmwa ne ọ gie Izrẹl khọnmiotọ yan wẹ ọ gha khọnrẹn ne ọ gha re e Jonatan ne ovbi mwẹ ọ re ọ ru orukhọ na, te a gha gbe ẹe rua.” A ma miẹn ọmwa ne ọ guan ẹmwẹ rhọkpa.

⁴⁰ Ẹre Sọl na tama iran wẹẹ, “Wa hia mudia vbe odọ ne imẹ vbe Jonatan mudia vbe edinran. Iran wanniẹn tama rẹn wẹ, ru ẹe vbe ne u roro ighẹ ọ ke yi sẹẹ.”

⁴¹ E Sọl keghi tama e Nọyaẹnmwa ne Osanobua Izrẹl, “Ya uta rhie ewanniẹn mẹ. A deghẹ Jonatan ra mẹ ọ re ọ ba emwi ku ru, u ghi mu Urim, sokpan, a deghẹ ivbi Izrẹl ne emwa ruẹn nọ, u ghi mu e Tumin.” Ewanniẹn keghi rhie ma wẹ e Jonatan kevbe Sọl nọ, ọ keghi zẹ orhue ne avbe emwa ni gbe.

⁴² E Sọl keghi kha wẹẹ, “Ta enọkhin vbe uwu ima vbe Jonatan ne ovbi mwẹ.” Ọ keghi mu e Jonatan.

⁴³ E Sọl keghi nọ e Jonatan wẹẹ, “Vbe u a ru yi?” E Jonatan keghi wanniẹn wẹẹ, “I rri owọn kherhe. Ghe mwẹ vbe emwa na, I mu egbe ne I gha ya wu.”

⁴⁴ E Sọl keghi tama rẹn wẹẹ, “Te Osanobua gha kinmwi mwẹ gbe ua ẹrẹna, a deghẹ a ma gbe ua.”

⁴⁵ Sokpan avbe emwa nii keghi tama e Sọl wẹẹ, “Te uwẹ we ne a gbe Jonatan ne ọ gie Izrẹl miẹn akhọnmiotọ nọkhua na rua ra? Ẹdẹ! Ma ya eni e Nọyaẹnmwa ne ọ rrọọ yan wẹ eto ọkpa i ra vbọ fua vbe uhunmwu ẹnrẹn. Iyobọ Osanobua ọre ọ ya ru emwi ne ọ ru ẹrẹna.” Ọre a na miẹn wẹ emwa ni ma gia gbe Jonatan rua.

⁴⁶ Vbe iyeke ọnii, e Sọl keghi werriegbe vbe ne ọ na khu ivbi e Filistin khian, iran keghi werriegbe gha rrie otọ iran.

Arriọba E Sọl Kevbe Ẹgbẹe Ọre

⁴⁷ E Sọl ghi rriọba nẹ, ọ keghi khọn avbe eghian rẹn hia vbe ehehia, avbe Moab, Amọn kevbe Idọm, ọba e Zọba kevbe avbe ivbi e Filistin. Ehe ne ọ na gbinna hia, ọ kegha khọnmiotọ.

⁴⁸ Ọ gbinna igbinna ọmẹguae, obọ ẹre keghi ke ukhunmwu ne ọghe avbe ivbi Amẹlẹk. Ọ keghi degue Izrẹl hin obọ a dekun ọmwa rre.

⁴⁹ Ivbi E Sọl ne ikpia kegha re Jonatan, Isvi kevbe Nakisiua, ovbi ẹre ne okhuo ne ọdiọn kegha re Mẹrab, nekherhe kegha re Mikal.

⁵⁰ Amwẹ ọnrẹn kegha re Ahinoam ne ovbi Ahimaz, ọkaokuo ẹre kegha re ọtiọnrẹn ighẹ Abna ne ovbi e Niẹ ne ọtẹn erhae.

⁵¹ E Kis ne erha e Sọl kevbe Niẹ ne erha Abna, kegha re ivbi Abiẹl.

⁵² Inu ẹghẹ ne ọ wa ya vbe agbọn, igbinna nọ wegbe ọre ọ ya ẹe gu ivbi e Filistin gbinna. Ẹghẹikẹghẹ ne ọ ya miẹn ọmwa ne ọ din ra ne ọ wegbe, ọ ghi rhie ẹre ba ivbiyokuo ẹre.