I Samuẹl 13 - Edo Bible (E Baibol Ẹdo) Version 1996

Okuo Ne A Gu Emwa Filistin Khọn

¹ Ukpo … ọ re Sọl gha ye vbe ọ suẹn gha rriọba. Ọ keghi rriọba la ukpo eva yan Izrẹl.

² E Sọl keghi viọ arriaisẹn eha vbe ivbi Izrẹl, ọ na wẹ ne enekpa gha rrie owa. Ọ keghi viọ arriaisẹn eva ke egbe vbe Mikmas kevbe Bẹtẹl ne ẹvbo uhunmwu oke, arriaisẹn ọkpa na vbe gha gu e Jonatan ne ovbi ẹre vbe Gibea vbe otọe ẹwae Bẹnjamin.

³ E Jonatan keghi gbe ọkaokuo emwa Filistin ne ọ rre Geba, ivbi e Filistin keghi họn ẹmwẹ na. Ẹre Sọl na gie emwa ne iran ya si orhu la ẹvbo hia wẹ ne ivbi e Hibru mu egbe okuo.

⁴ Ivbi Izrẹl hia keghi họn ighẹ e Sọl gbe ọkaokuo ivbi e Filistin kevbe wẹ te ivbi e Filistin ghi khọ ẹko iran. Emwa ni hia keghi wa khuẹnniẹn yọ, iran keghi bu e Sọl gha rrie Gilgal.

⁵ Ivbi e Filistin keghi tie otiegba ne iran do gu ivbi Izrẹl gbinna. Iran kegha mwẹ ikẹkẹ ematọn ọghe okuo arriaisẹn ọgban (30,000) deba emwa ni hin ẹsin arriaisẹn ehan (6,000) kevbe ivbi iyokuo ni bun zẹ vbe ikpekhae ni rre ọkpẹn okun. Iran kegha rrie Mikmas ne ọ rre odẹ ahọ ọghe Betavin, iran keghi bu agọ ye evba.

⁶ Iran keghi gu ivbi Izrẹl gbinna ọghe ọhanabe, ẹ i ghi ye iran ẹse hiehie. Eso na lẹre ye uwu uvun okuta kevbe uvun otọ vbe uwu avbe okuta, deba uwu uye kevbe uhae.

⁷ Eso keghi fian Ẹzẹ Jọdan rra gha rrie otọe Gad kevbe Giliad. E Sọl keghi ye gha rre Gilgal, ohan kegha mu emwa ni gue ẹe, iran na gha guọ zẹzẹzẹ.

⁸ Zẹ vbene e Samuẹl tama rẹn, e Sọl keghi ya ikpẹdẹ ihinrọn mudia khẹ ọre vbe Gilgal sokpan, e Samuẹl ma rrie Gilgal, emwa nii ke suẹn gha kpao sẹ e Sọl rae.

⁹ Ẹre irẹn ghi na tama iran wẹẹ, “Wa mu ese na giẹn uan kevbe isara nii gun mwẹ.” Ọ keghi zọ ese na giẹn uan nii.

¹⁰ Ọ ghi wa da ru ẹe fo, e Samuẹl keghi rre. E Sọl keghi ya khian vba ẹre gbe ọbo khian ne ẹẹn.

¹¹ Sokpan e Samuẹl keghi kha wẹẹ, “De emwi ne u ru na yi?” E Sọl keghi wanniẹn wẹẹ, “I miẹn wẹẹ, avbe emwa nii lẹ sẹ mwẹ rae, wẹ ma vbe rre ye ẹghẹ ne u buru, deba ẹre, ivbi e Filistin vbe si koko ye Mikmas.

¹² Ọ re I na roro ẹe wẹẹ, ‘Te ivbi e Filistin ra do gun mwẹ gbinna vbe e Gilgal mwa na, I ma he nọ iyobọ e Nọyaẹnmwa, ọ re I na wẹ te I gha zọ ese nii.’ ”

¹³ E Samuẹl keghi wanniẹn wẹẹ, “Emwi ukọnmwẹ ọ re uwa ru nii. U ma ru vbene Nọyaẹnmwa Osanobua ruẹ tama ruẹn. Akpawẹ te u họn ẹmwẹ ọnrẹn, ọ gha gie uwa vbe uniẹn ruẹn gha khaemwisẹ yan Izrẹl ẹdẹdẹmwẹdẹ.

¹⁴ Sokpan, banbanna nian, arriọba ruẹ i khian gha rrọọ khian. E Nọyaẹnmwa gha gualọ ọmwa ekhọe ẹre ne ọ ya ẹe ma ọba yan emwa rẹn, rhunmwuda, u ma họn ẹmwẹ ne Nọyaẹnmwa.”

¹⁵ E Samuẹl keghi kpao vbe Gilgal rre, ọ na si okhian, emwa nekpa keghi lele Sọl zẹ vbene ọ wa bu avbe ivbiyokuo ẹre khian nii. Iran keghi ke Gilgal kpao gha rrie Gibea vbe otọ Bẹnjamin. E Sọl keghi kin ivbiyokuo ẹre lẹga, iran kegha re omwa arhunmwu uri eha.

¹⁶ E Sọl, e Jonatan ne ovbi ẹre kevbe emwa rẹn, keghi gba mudia vbe Geba, vbe otọe Bẹnjamin, ivbi e Filistin keghi bu agọ ọghe iran ye Mikmas.

¹⁷ Ivbi e Filistin keghi ghae egbe ye oka eha ne iran ya yo ehe ne iran na fu emwi viọ: oka ọkpa ghi mu uhunmwu da Ọfra vbe otọ Sual.

¹⁸ Ọvbehe ghi vbe mu uhunmwu da Bẹt Họrọn vbe ne nọkpa na mu uhunmwu da Iya e Zẹboim kevbe otọ oha.

¹⁹ Avbe ogiogun ma gha rre otọ Izrẹl rhunmwuda, ivbi e Filistin wa rhiegba yọ wẹ ne ivbi Izrẹl ghẹ sẹtin dunmwu umozo kevbe asoro.

²⁰ (Rhunmwuda ọnii, avbe Izrẹl ghi gha bu ivbi e Filistin yo ya gha lọ avbe ogba, aho, ughanmwa kevbe abakpa.

²¹ Igho ne iran hae yọ kegha re igho agiẹghẹ ọkpa vbe ne a ya lọ ughanmwa, zẹ uze yọ, kevbe agiẹghẹ eva vbe ne a ya lọ aho kevbe ẹguẹ.)

²² Ọ re a na miẹn wẹ vbe igbinna, ọkpa ne ọ gha mwẹ umozo kevbe asoro i rrọ vbe ivbiyokuo Izrẹl gberra e Sọl kevbe Jonatan ne ovbi ẹre.

²³ Ivbi e Filistin keghi gie ọka ivbiyokuo ọkpa ne iran ya gha khẹ Ada Mikmas.