I Samuẹl 10 - Edo Bible (E Baibol Ẹdo) Version 1996

¹ Ẹre Samuẹl na mu ovbi ẹluba ori, ọ na hihiẹe yan e Sọl uhunmwu, ọ mu ẹre unu hiẹnhiẹn, ọ wẹẹ, “E Nọyaẹnmwa nọnọ ori yan ruẹn, ne u gha re ne ọ khaemwisẹ yan emwa Izrẹl ne emwa rẹn. U gha khaemwisẹ yan avbe emwa rẹn, u ghi fannọ iran ye otọ hin obọ iran ne eghian iran hia rre. Emwi ne a gha ya yi ama yọ wẹ te Nọyaẹnmwa gele zẹ ruẹ ne u gha khaemwisẹ yan iran ne emwa rẹn ọ re ọna khin.

² U gha kpao vbe ehe ne I ye rre nẹ ẹrẹ, u gha khian vba ikpia eva vbe ọkpẹn idin Rekiẹl vbe Zẹleza ne ọ rre otọ Bẹnjamin. Iran gha tama ruẹn wẹ a miẹn avbe ekẹtẹkẹtẹ ne u gualọ khian nẹ, wẹ, ẹ i re igbinna avbe eni ọ re erhaa ghi ye ighẹ ẹmwẹ ruẹn ọre ọ ghi mu ro wẹẹ, ‘Vbe I a ra ru ẹmwẹ ovbi mwẹ hẹ?’

³ U gha ke evba kpao, u ghi do sẹ isi erhan iruemwi ne ọ rre Tabọ, U ghi miẹn ikpia eha ni rrie Bẹtẹl ne iran ya zọ ese ghe Osanobua vbe Bẹtẹl. Ọkpa vbọ gha viọ ivbi ẹwe eha mwẹ, ọkpa gha viọ ebrẹd eha mwẹ kevbe ne ogieha ghi mu ọgọ ohian ayọn mwẹ.

⁴ Iran gha tuọ, iran ghi vbe viọ eva ne uẹn vbe ebrẹd nii, u ghi miẹn iran re.

⁵ U ghi gha rrie oke Osanobua ne ọ rre Gibea, ehe ne agọ ivbi e Filistia ọkpa ye. U gha sẹ onurho ẹvbo nii, u gha miẹn otu avbe akhasẹ eso ni tuorre ke aka ne ọ rre uhunmwu oke nii dee, iran gha kpe akpata, ema, ufere kevbe ẹgiọn. Iran ghi gha kuu, iran ghi gha golo.

⁶ Orhiọn Osanobua gha hin yan ruẹn, u ghi deba iran gha ku, u ghi vbe gha go, u ghi gha ru vbe ọmwa ughaẹn fẹẹrẹ.

⁷ Emwi na ghẹ ghi sunu, u ghi ru vbe ne Osanobua rhie ye uẹ ekhọe.

⁸ U ghi ke odaro mẹ gha rri Gilgal, I gha do vba ruẹ vbe odọ ne i do zọ ese na giẹn uan kevbe isara. U ghi mudia la ikpẹdẹ ihinrọn khẹ mwẹ vbe evba I te do tama ruẹn emwi ne u gha ru.”

⁹ E Sọl ghi fi egbe werriẹ ne ọ kpao vbe ehe ne Samuẹl ye, Osanobua keghi mu akpa ọgbọn yọ e Sọl, emwi ne Samuẹl tama rẹn hia keghi wa sẹ ẹdẹ rriọ.

¹⁰ E Sọl kevbe ọguọmwadia ẹre ghi sẹ Gibea, otu akhasẹ ọkpa keghi do vba ẹre. Orhiọn Osanobua keghi hin yan rẹn udomwurri ọ na deba iran gha kuu, ọ kevbe gha go.

¹¹ Emwa ni ka rẹn ọnrẹn yi ghi miẹn ọẹn vbe ọ ru emwi vberriọ, iran kegha nọ egbe wẹẹ, “Vbọ ghi rruan ovbi e Kis yi? E Sọl vbe khian akhasẹ nẹ ra?”

¹² Okpia ọkpa ne ọ rre evba keghi nọ wẹẹ, “Iran ne akhasẹ nekpa na vboo, de emwa ne erha iran khin yi?” Erriọ ẹmwẹ na ne emwa ta ya suẹn wẹẹ, “Te Sọl ne arẹngbe ghi vbe khian akhasẹ ra?”

¹³ E Sọl ghi ku nẹ deba ugomwẹ, ọ kegha rrie aka ne ọ rre uhunmwu oke.

¹⁴ Ovbiye erha Sọl ghi nọ irẹn vbe ọguọmwadia ẹre wẹẹ, “Vbe uwa ye ke ẹdẹ rriọ gha de yi?” E Sọl keghi wanniẹn wẹẹ, “Avbe ekẹtẹkẹtẹ ma gha gualọ, ugbẹn vbe a ghi miẹn wẹ ma ma miẹn ọẹn, ma keghi ya miẹn e Samuẹl.”

¹⁵ Ovbiye erha ẹe ni keghi nọ rẹn wẹẹ, “Vbọ ghi tama uwa?”

¹⁶ E Sọl keghi wanniẹn wẹẹ, “Ọ tama ima ighẹ a miẹn avbe emwirri nii nẹ.” Sokpan ọ ma tama ovbiye erha ẹe ni wẹ Samuẹl tama rẹn wẹ rẹn gha rriọba.

A Ma E Sọl Ọba

¹⁷ E Samuẹl keghi tie emwa nii hia si koko vbe Mizpa ne iran ru ugamwẹ.

¹⁸ Ọ keghi tama iran wẹẹ, “E Nọyaẹnmwa ne Osanobua Izrẹl khare wẹẹ, ‘Mẹ ọ re ọ viọ uwa ke Igipt ladian, I keghi miẹn uwa fan vbe obọ ivbi Igipt kevbe avbe emwa ọvbehe hia ni gha kpokpo uwa.

¹⁹ Mẹ ọrọre Osanobua uwa, ne ọ viọ uwa hin uwu ukpokpo kevbe ọlọghọmwa ne uwa ye rre, sokpan banbanna nian, wa he mwẹ yotọ, wa na wẹ ne I rhie ọba ne uwa. Ọ maa khekherriọ, wa do si egbe koko ye odaro mwẹ vbe uniẹn kevbe ẹgbẹe!’ ”

²⁰ Ẹre Samuẹl na wẹ ne uniẹn ọkpọkpa gha ladian, e Nọyaẹnmwa keghi hannọ uniẹn e Bẹnjamin zẹ.

²¹ Ẹre Samuẹl na wẹ ne ẹgbẹe ni rre uniẹn Bẹnjamin gha ladian ọkpọkpa, ọ keghi hannọ ẹgbẹe Metri zẹ. Ẹre ikpia ni rre ẹgbẹe Metri na vbe gha ladian, a keghi hannọ e Sọl ne ovbi Kis zẹ. Iran ke ghi gualọ ẹe sokpan iran ma miẹn ọẹn.

²² Iran keghi dọlegbe nọ e Nọyaẹnmwa wẹẹ, “Ọmwa ọvbehe yevbe rrọọ ra?” E Nọyaẹnmwa keghi wanniẹn iran wẹẹ, “E Sọl rre evba, ọ lẹre ye iyeke ehe ne a viọ ihẹ yi.”

²³ Ọre iran na rhulẹ gha khian ya rhie Sọl ladian bu emwa nii gha dee, ọ ghi mudia ye uwu ẹbu iran, ọ keghi wa ya ibata ọkpa ohoho tan sẹ emwa hia.

²⁴ E Samuẹl keghi Tama emwa nii wẹẹ, “Wa ghe ọmwa ne Nọyaẹnmwa zẹẹ, ọmwa ọvbehe ne ọ yevbe ọre vbe uwu ima i rrọọ.” Iran hia keghi wa we wẹẹ, “Ọba gha tọ ọ kpẹre!”

²⁵ E Samuẹl keghi rhan otọ ẹre ma emwa nii, uyi ne ọ khẹ ke ọba kevbe iwinna ne ovbe khẹ ke ẹe ne ọ gha winna, ọ keghi gbẹnnẹ ọẹn ye uwu ebe, ọ na rhie ẹre hin rre ye ehe ne ọ huanrẹn. Ọ na wẹ ne emwa hia gha rrie owa.

²⁶ E Sọl keghi vbe gha rrie owa ẹre vbe Gibea. Emwa ni mwẹ ẹtin eso ne Osanobua rhie ye ẹre ekhọe keghi lele ẹe.

²⁷ Sokpan avbe ẹwobi emwa eso kegha kha wẹẹ, “Vbe oko na ra sẹtin ru ne ima yi?” Iran keghi ye aro tila e Sọl rua. iran ma ye imuohan gie ẹe.