I Samuẹl 1 - Edo Bible (E Baibol Ẹdo) Version 1996

Ẹlkana Ke Ẹgbẹe Ọre Vbe Siailo

¹ Okpia ọkpa ne a tie ẹre Ẹlkana kegha rrọ, ovbi Ifreim nọ, ọ kegha rre Rama ne ẹvbo uhunmwu oke vbe otọe Ifreim. Ovbi e Jeroboam nọ, eyẹ ọghe Elihu, vbe ẹgbẹe Tohu ne uniẹn e Zuf.

² Ẹlkana keghi mwẹ ikhuo eva, ọkpa Hanna kevbe nọkpa Penina. E Penina keghi mwẹ emọ, sokpan, e Hanna ma biẹ.

³ Ukpukpo ọ re Ẹlkana ya ke ẹvbo ẹre kpao gha rrie Siailo, ne ọ ya ga, kevbe ne ọ ya zọ ese ghe Nọyaẹnmwa ne Oghodua. E Hofnai kevbe Finihaz ne ivbi Elai eva, kegha re ohẹn ọghe Nọyaẹnmwa vbe evba.

⁴ Ẹghẹ ke ẹghẹ ne Ẹlkana ya zọ ese ẹre, ọ ghi ghae ne Penina kevbe ivbi ẹre, ọkpọkpa.

⁵ Sokpan ọ ghi rhie ne ọ mobọ maa ne Hanna. Ọ kakabọ ho ẹmwẹ ọnrẹn, a gha rhe miẹn wẹ e Nọyaẹnmwa ma rhie ọmọ ne ẹẹn biẹ.

⁶ E Penina ne ogieva ẹre ghigha gbe igiogio ku ọre, ọ ghi gha yaghae rhunmwuda wẹ, e Nọyaẹnmwa ma rhie ọmọ ne ẹẹn biẹ.

⁷ Erriọ ọ re emwi na gha sunu ukpukpo; ẹghẹ kẹghẹ ne iran ya yo owa e Nọyaẹnmwa, e Penina ghi ru Hanna sẹrriọ wẹ, ọ ghi gha viẹ, ẹ i rri evbare rhọkpa.

⁸ Ẹlkana ne ọdọ ẹre ghi nọ rẹn wẹẹ, “Hanna, vbọzẹ ne u na viẹ yi? Vbọzẹ ne u ma na rri evbare? Vbọzẹ ne ẹko ruẹ na rhia sẹrriọ ẹghẹ hia? Mẹ ma sẹ emọ igbe ne uwẹ ra?”

E Hanna Kevbe Elai

^9-10 Ọ ghi sẹ ẹghẹ ọkpa vbe Siailo, vbe iran ghi rri evbare nẹ, e Hanna keghi kpaegbe. Elai ne ohẹn keghi tota ye ihe ọkpẹn onurho Ọgua Osa e Nọyaẹnmwa. Iro keghi wa han Hanna, ọ na viẹ eve orriara vbe ehe ne ọ na na erhunmwu ghe Nọyaẹnmwa.

¹¹ E Hanna keghi ye ekhọe kekhọe ru eyan wẹẹ, “Oghodua Nọyaẹnmwa, ghe mwẹ, mẹ ne ọguọmwadia ruẹ. Ghe ukpokpo ne I mwẹ, ne u ye mwẹ rre. A deghẹ u rhie ọmọ okpia mẹ, I yan rẹn ighẹ I gha yae fi ohan nuẹn ne ọ gha re ọwuẹ vbe ẹdẹ agbọn rẹn hia, ẹ i ra vbe gbe eto ẹre.”

¹² E Hanna keghi wa ya ẹghẹ ne ọ taẹn gha na erhunmwu ghe Nọyaẹnmwa. Elai kegha ghe akhuarhamwunu ẹnrẹn.

¹³ Ọ kegha na erhunmwu ye uwu unu, ọ yan unu sokpan, ẹ i guan ladian. Elai keghi rhunmwuda onii gha ro ighẹ te ọ da ayọn.

¹⁴ Ọ keghi tama rẹn wẹẹ, “Ghẹ ghi ya egbe ruẹ ma zẹ vbe ọdayọn. Sẹ ayọn ne a da rae ne u gie aro hian ruẹn vbe uhunmwu!”

¹⁵ Rẹn keghi wanniẹn wẹẹ, “Ẹ i re erriọ enọwanrẹn, I ma da ayọn, I ma he vbe da ayọn usin. Oya ọ re ọ ru mwẹ, ọ re I na gha na erhunmwu, I keghi mu ẹmwẹ enegbe mwẹ hia ma e Nọyaẹnmwa.

¹⁶ Ghẹ gha ro ighẹ okhuo ne ọ ku ogboi ọre I khin. Te I gha na erhunmwu vberriọ rhunmwuda agbọn khan mwẹ.”

¹⁷ Elai keghi tama rẹn wẹẹ, “Gha khian vbe ọfumwegbe, te Osanobua Izrẹl gha rhie emwi ne u nọ ẹre re nuẹn.”

¹⁸ Okhuo nii keghi wanniẹn wẹẹ, “Te u ghi ra gha zẹ iro itohan da mwẹ vbe ẹghẹ hia.” Ọ na kpao. Ọ keghi ya rri evbare, ọ ma ghi vbe gha khiẹ.

Ubiẹmwẹ Kevbe A Ya Fi Ohan E Samuẹl

¹⁹ Vbe owiẹ ne ọ lele ẹe, Ẹlkana kevbe ẹgbẹe ọre keghi guakpao, iran ghi gaa e Nọyaẹnmwa nẹ, iran keghi werriegbe gha rrie owa iran vbe Rama. Ẹlkana kevbe Hanna ne amwẹ ọnrẹn keghi miẹn egbe, e Nọyaẹnmwa keghi họn erhunmwu ẹnrẹn.

²⁰ Erriọ a miẹn ọẹn wẹ, ọ keghi hanmwa, ọ na biẹ ọmọ okpia. Ọ keghi he ẹre Samuẹl. Ọ wẹẹ, “Obọ e Nọyaẹnmwa ọre I na nọ rẹn.”

²¹ Ẹlkana kevbe ẹgbẹe ọre kegha rrie Siailo ne ọ ya zọ ese ukpukpo kevbe ese ne irẹn yan rẹn kpataki, ghe e Nọyaẹnmwa.

²² Sokpan, e Hanna ma yo. Ọ keghi tama ọdọ ẹre wẹẹ, “Ọmọ na gha ghi wa fian ewẹn nẹ, I ghi rhie ẹre gha rrie owa Osanobua, ọ ghi ya gha rre evba vbe ẹdẹ agbọn rẹn hia.”

²³ Ẹlkana keghi tama rẹn wẹẹ, “Ru ẹe vbene ọ ke yi sẹẹ vbe aro ruẹ, tota ye owa u te do fian ọmọ nii ewẹn. Osanobua ne ọ gie eyan ne u yan rẹn sẹ.” Rhunmwuda ọnii, e Hanna keghi tota vbe owa, ọ na gha koko ovbi ẹre.

²⁴ Ugbẹn vbe ọ ghi fian ẹre ewẹn nẹ, ọ keghi rhie ẹre gha rrie Siailo, ọ keghi mu ẹkhuia ẹmila ne ọ rre ukpo eha mwẹ kevbe ọduẹki irhuarhua kevbe ọgọ ohian ayọn ọkpa vbene ọ ru ọvbokhan sẹ nii, ọ keghi rhie ẹre gha rrie owa e Nọyaẹnmwa vbe Siailo.

²⁵ Iran ghi gbe ẹkhuia ẹmila nii nẹ, a keghi rhie ọmọ nii gie Elai.

²⁶ E Hanna keghi tama rẹn wẹẹ, “Dọmọ o, u ye yi mwẹ ẹro nian? Mẹ ọrọre okhuo nii ne u miẹn vbe ọ mudia vbe emwana gha na erhunmwu ghe Nọyaẹnmwa.

²⁷ Ọmọ na ọ re I nọ ẹre re, ọ kevbe rhie emwi ne I nọ rẹn re mẹ.

²⁸ Rhunmwuda ọnii, te imẹ ghi ra ya ẹe fi ohan ne Nọyaẹnmwa. Ẹghẹ ne ọ rhirhi ya vbe agbọn, ọ ghe Nọyaẹnmwa rẹn khian gha khin.” Ẹre iran na ga e Nọyaẹnmwa vbe evba.