I Pita 4 - Edo Bible (E Baibol Ẹdo) Version 1996

Uyinmwẹ Ne A Fiwerriẹ

¹ Vbene a ghi na miẹn wẹ, ikinnegbe ọre Kristi ya rri oya, wa vbe ya egbe iro vberriọ rhie ẹtin ye egbe uwa iwu, rhunmwuda ọmwa ne ọ ghi rri oya nẹ vbe egbe, ẹ i ghi de fi orukhọ.

² Rhunmwuda ọnii khekherriọ, ke ẹghẹ na kpao, wa ghi gha lo edẹ agbọn uwa vbe emwa na, vbe ne a gha na miẹn wẹ, iho Osanobua ọre ọ ta ne a gha ru ma rẹn ighẹ ẹ i re orriarria emwa ne agbọn.

³ Rhunmwuda, wa lo ẹghẹ ne ọ taẹn sẹ nẹ, ne uwa ya gha ru vbene avbe enimayayi ru. Ẹdẹ agbọn uwa kegha re ne a lo ye uyinmwẹ iruẹn ufifimwẹ, ayọn ne a da gbe egbe, ohọhọ, ẹbu idayọn, kevbe iruẹbọ nẹ ọ hu ọmwa ẹko.

⁴ Wanwanna nian, te ọ ghi yan iran ni ga ẹbọ unu uan ighẹ wa i ghi gu iran mwẹ obọ vbe uyinmwẹ akuọkan kevbe epiankhanrhan nii, iran ghi gha ye ukpẹ sakan uwa.

⁵ Sokpan, iran gha ya ye unu iran na iyẹn egbe iran ma Osanobua, ne ọ mu egbe ne ọ ya bu ohiẹn ni wulo nẹ kevbe ni ma he wulo.

⁶ Ọna ọre ọ si ẹe ne a na vbe ya kpe orhu nene Iyẹn Ne ọ maa ma iran ni wulo nẹ, iran ne a bu ohiẹn ọnrẹn nẹ vbe ne a vbe bu ohiẹn emwa hia vbe ekpa ọghe egbe. A kpe orhu ẹre ma iran, ne iran miẹn ehe na gha lo ẹdẹ agbọn iran vbe ọghe orhiọn zẹ vbe ọghe Osanobua.

Emwa Ni Lo Emwi Ne Osanobua Ya We Iran Ẹse

⁷ Ufomwẹ emwi hia sẹ otọ fo nẹ. Wa gha ziengbe emwi, wa ghi vbe khẹ yegbe, ne uwa sẹtin gha na erhunmwu.

⁸ Ke odaro emwi hia, wa gha ya ẹko ata ho ẹmwẹ egbe, rhunmwuda, aho ẹmwẹ ọmwa gbe ebe gue orukhọ ni bun.

⁹ Wa gha khian ẹlẹ tuẹ egbe, vbe ne a i na gui ẹzọ egbe.

¹⁰ Dọmwadẹ ọghọe zẹ vbe ọmwa ne ọ ya obọ mu avbe emwi ughughan ne Osanobua ya wẹ ẹse, ọ kere ne ọ gha lo avbe emwi nii, ne ọ maa sẹ emwa ọvbehe egbe.

¹¹ Ne ọ kpe orhu, we ne ọ gha kpe orhu ẹmwẹ Osanobua, ne ọ ga emwa ọvbehe, we ne ọ gha ya ẹtin ne Osanobua rhie nẹẹn hia ga, ne a miẹn ehe na miẹn wẹ, vbe uwu emwi hia, te a ghi la ekpa Jesu Kristi rhie urhomwẹ ne Osanobua, ọmwa ne ọ yan ẹtin kevbe uyi ẹdẹ kevbe ẹdẹdẹmwẹdẹ. Isẹ.

Ne A Gha Rri Oya Zẹvbe Ọmwa Nọyayi

¹² Ọse mwẹ ni ghan, wa ghẹ gie edanmwẹ nọwegbe ne uwa miẹn ẹghẹ na, yan uwa unu uan, zẹ vbe emwi ne a ma he miẹn ẹdẹ.

¹³ Sokpan, wa gha ghọghọ wẹ, a vbe ghae sẹ uwa obọ vbe uwu oya ne Kristi re, ne uwa miẹn ehe na vuọn ne oghọghọ vbe Ẹdẹ ne iran gha ya egbe ladian.

¹⁴ Ọ ma kaan uwa, adeghẹ a rhovbiẹ uwa rhunmwuda ighẹ wa re eguọmwadia Jesu, rhunmwuda, ọnii rhie maa wẹ, orhiọn uyi nii, ighẹ Orhiọn Osanobua, tuorre yan uwa nẹ.

¹⁵ Ọma kei ne ọmwaikọmwa vbe uwu uwa rri oya ba ẹmwẹ ẹrrẹe.

¹⁶ Sokpan, deghẹ u rri oya rhunmwuda ighẹ, u re ọguọmwadia Kristi, ghẹ gie ekhue ẹre mu uẹn, sokpan gha kpọnmwẹ Osanobua wẹ, u vbe khuẹnniẹn eni Kristi.

¹⁷ Ọ sẹe nẹ nian ne ibuohiẹn gha ya suẹn, emwa Osanobua ọre a gha ka bu ohiẹn ọnrẹn. A deghẹ egbe ima ọre ọ na suẹn, vbe ọ ra gha ye hẹ vbe ufomwẹ ọnrẹn, vbe egbe iran ni ma ya Iyẹn Ne ọ maa ne ọ ke obọ Osanobua rre yi?

¹⁸ Zẹ vbene ebe khare, “A deghẹ egbe i re egbe ne emwa ni maa, gha ya miẹn uhunmwu, vbe ọ ra gha ye iran hẹ ighẹ iran ni ma rẹn Osanobua kevbe emwa orukhọ!”

¹⁹ Rhunmwuda ọnii khekherriọ, iran ni rri oya rhunmwuda wẹ, vbene Osanobua wẹ emwi gha ye iran hẹ nọ, wẹ ne iran la ekpa uyinmwẹ esi iran wa ya egbe iran hia yan Ayi ne ọ yi iran, ọmwa ne ọ re ne ẹ i hiẹ ọmwa.