I Pita 3 - Edo Bible (E Baibol Ẹdo) Version 1996

Avbe Ọdọ Vbe Amwẹ

¹ Erriọ wa vbe nọ zẹẹ, wa ne avbe amwẹ, wa gha gbe uhunmwu ke otọ ne avbe ọdafẹn uwa, vbene a gha na miẹn wẹ, a deghẹ eso vbe uwu iran ma yayi, iran ghi do rhunmwuda uyinmwẹ uwa yayi. Vbe ne uwẹ ighi na vbe ta ifi ẹmwẹ ọkpa.

² Rhunmwuda, iran gha miẹn uyinmwẹ ọghọ vbe ute ọghe uwa.

³ Wa ghẹ gha ya emwi itegbe te egbe ne uwa ba miẹn ehe na gha mose, egbe vbene uwa mẹ eto hẹ ra emwi itegbe ne uwa viọ ye egbe ra ukpọn ne uwa ya mu egbe.

⁴ Sokpan, ọ kere ne ose uwa gha re ọghe ekhọe ọmẹhẹ ne khuẹrhẹ, ne ọ re emwi ighobioye vbe odaro Osanobua.

⁵ Rhunmwuda avbe ikhuo ni ya ekhọe ga nẹdẹ, ni vbe mu idaehọ iran yan Osanobua, vberriọ ọre iran ya gha te egbe iran, te iran gbe uhunmwu ke otọ ne avbe ọdafẹn iran.

⁶ Erriọ Sera gha ye, te ọ gha họn ẹmwẹ ne ọdọ ẹre, ọ re ọ na gha tie ẹre “Enaẹmwẹ.” Wanwanna nian, ivbi ẹre ne ikhuo ọre uwa khin, a deghẹ wẹ yin ẹse, ighẹ wa ma vbe mu ohan emwi rhọkpa.

⁷ Kevbe uwa ne avbe ọdọ, vbe obọ ne uwa ya mu avbe amwẹ uwa, wa ghi gha ye rre wẹ, emwa ni ma wo vbe egbe iran khin, wa ghi gha mu iran tetete, rhunmwuda iran tobọ iran gha vbe deba uwa ghae vbe arrọọ ne Osanobua ra ghae ne emwa. Wa ghi gha ru vberriọ ne emwi rhọkpa ghẹ mu idobo ye uwa erhunmwu ne uwa na.

Oya Ne A Re Ba Emwi Ne A Ru Ẹse

⁸ Ne I ya fian ẹre ifi: wa gie vbene uwa ziro kevbe vbene emwi ye vbe ekhọe uwa, gha ya kugbe. Wa gha ho ẹmwẹ egbe, zẹ vbe etentẹn ne ikpia. Wa gha mwẹ itohan ghe egbe, ne uwa vbe gha mu egbe rri otọ ne egbe.

⁹ Wa ghẹ ya ọkhọ ha osa ọkhọ, ra ne a ya ihẹn ha osa ihẹn, sokpan wa gha ya erhunmwu afiangbe ha osa, rhunmwuda, ẹghẹ ne Osanobua na tie uwa, afiangbe ọre ọ wẹ rẹn ra rhie ne uwa.

¹⁰ Zẹ vbene ebe kha re, “Ọmwa ne ọ ho ne irẹn rri orhiẹnrhiẹn agbọn, ne irẹn vbe tọọ, we ne ọ ghẹ ghi ta ẹmwẹ dan, ne ọ ghẹ vbe ta ohoghe.

¹¹ Ọ ghi zobọ vbe emwi dan do gha ru emwi esi. Ọ ghi gha gualọ ọfumwegbe, ọ ghi gha zọ uhio ẹre khian.

¹² Rhunmwuda, te Nọyaẹnmwa wa rhie aro ye egbe ọmwata, ọ ghi gha họn erhunmwu ẹnrẹn vbe ẹghẹ hia. Sokpan, ọ ghi mu aro da iran ni ru emwi dan.”

¹³ Gha ọ ra ru uwa emwi dan yi adeghẹ wa mu aro ye ẹmwẹ ne uwa gha ru emwi esi?

¹⁴ Sokpan, gie a kha ighẹ te uwa gele rri oya ye ẹmwẹ emwi esi ne uwa ru, ọma kaan uwa! Wa ghẹ fian afianma ọmwa rhọkpa, wa ghẹ vbe si osi.

¹⁵ Sokpan, wa gha ya ọghọ ne Kristi vbe uwu ekhọe uwa, ne uwa vbe ya ẹe ru Nọyan uwa. Mu egbe vbe ẹghẹ hia ne u ya rhie ewanniẹn ne ọmwa ne ọ rhirhi nọ ruẹn, wẹ ne u rhan otọ idaehọ ne u mwẹ.

¹⁶ Sokpan u ghi ru ẹre ọghe ọghọ vbe ute. Ghẹ gie ekhọe ruẹ bu ohiẹn gbe uẹ hiehiere, a i rẹn deghẹ te a ghi ya ukpẹ sakan uwa, ọmwaikọmwa ne ọ ya unu rhia uwa, vbe ekpa uyinmwẹ ne uwa yin, zẹ vbe ne ọ lele Kristi, ekhue ghi mu iran ba ẹmwẹ ne iran ta.

¹⁷ Rhunmwuda, a rri oya ba ẹmwẹ uyinmwẹ esi, a deghẹ Osanobua ho ẹre ye vberriọ, ọre ọ maa sẹ, rhunmwuda ighẹ a ru emwi dan.

¹⁸ Rhunmwuda, Kristi tobọ ẹre wu ne uwa, ọ wu ye orukhọ, uhukpa ne emwa hia, ọmwa esi wu ne emwa dan, ne ọ miẹn ehe na viọ uwa gie Osanobua. A gbe ẹe ua vbe ekpa ọghe egbe, a keghi huẹn ọnrẹn kpaegbe vbe ekpa ọghe orhiọn.

¹⁹ Vbe uwu a rrọọ zẹ vbe orhiọn ni, ọre ọ na ya kpe orhu ma avbe orhiọn ne a munọ ye eghan.

²⁰ Ena keghi re orhiọn iran ni ma họn ẹmwẹ ne Osanobua vbe uwu ẹghẹ ne ọ na ya i ziengbe mudia vbe Noa ka okọ. Ibozẹghẹ ni gha rre uwu okọ ni — iran erẹnrẹn nọ, a keghi la ekpa amẹ miẹn iran fan.

²¹ Amẹ na keghi re emwikemwi ne a ya gie isamẹ ne ọ miẹn uwa fan banbanna nian, ẹ i re vbe ekpa ne ọ na kpe iruẹn ne ọ rre ikinnegbe kua, sokpan vbe ekpa eyan ne a ya ekhọe ne ọ ma bu abe gbe ọmwa yan ma Osanobua. Te isamẹ la ekpa arhiọkpaegbe Jesu Kristi miẹn uwa fan.

²² Ọmwa ne ọ kpao gha rrie ẹrinmwi nẹ, ọ kevbe rre obọ erha ọmwa Osanobua, ehe ne ọ na khaemwisẹ yan avbe odibo Osa hia kevbe avbe ọdakha ni rre ẹrinmwi kevbe avbe ẹtin.