I Pita 1 - Edo Bible (E Baibol Ẹdo) Version 1996

¹ E Pita ne ukọ Jesu Kristi ọre ọ gbẹn ebe na gie emwa ne Osanobua hannọ zẹ ni ragha zẹ vbe emwa ne ọlọghọmwa ya lẹ hin owa rre, gba ikinkin ọghe Pọntus, Galatia, Kapadonia, Esia kevbe Bitinia.

² Te a hannọ uwa zẹ vbe emwamwa ekhọe ọghe Osanobua ne Erha, ne Orhiọn rẹn ye uwa khian emwa ni huanrẹn, ne uwa gha họn ẹmwẹ ne Jesu Kristi, ne esagiẹn ọnrẹn kpe uwa iruẹn kua. Ẹsọhẹ kevbe ọfumwegbe gha re ọghe uwa vbene ọ vuọn sẹ omwa fo.

Idaehọ Ne Ọ Ma Wu

³ Wa gie ima rhie ekpọnmwẹ ne Osanobua ne Erha kevbe Nọyaẹnmwa Jesu Kristi! Rhunmwuda itohan rẹn nọkhua, ọ keghi rhie arrọ ọghe ọgbọn ne ima, vbe ekpa ne ọ na huẹn Jesu Kristi kpao vbe orinmwi. Ọ na rhie idaehọ ne ọ ma wu vuọn ima.

⁴ Rhunmwuda ọnii, te ima ghi rhie aro ye odẹ wẹ, ọ gha sẹ ima obọ vbe afiangbe ọrhẹnrhẹn ne Osanobua rhie khẹ emwa rẹn. Ọ rhie ẹre hin rre khẹ uwa vbe ẹrinmwi, ehe ne ẹ i na sẹtin kẹkẹ na ne ọ rhia, ra ne ọ fafaa.

⁵ Ọ ghe uwa ọre nọ, wa ne a la ekpa ẹsọhẹ ya ẹtin Osanobua rhie lẹre, vbe ne a i na mwẹ ẹbe, vbe uwu ne uwa na mudia khẹ imiẹnfan, ne a gha rhie ne emwa hia miẹn vbe ẹdẹ ufomwẹ ẹghẹ.

⁶ Wa gie ọyẹnmwẹ ọ na gha sẹ uwa, a gha rhe miẹn wẹ ẹ i mwẹ wa ma gha mwẹ ẹkorriaramwẹ vbe ẹghẹ kherhe, rhunmwuda edanmwẹ ughughan ne u wa miẹn.

⁷ Emwi ne ọ na sunu vberriọ ọrọre ne a miẹn ehe na ghe a deghẹ iyayi ẹmwata ọre uwa mwẹ. Igoru ne a miẹn wẹ ọ sẹtin rhia, uhin ighẹ te a ye ya erhẹn danmwẹ ọẹn ghe, rhunmwuda ọnii iyayi uwa ne ọ ya ọgbin igho ghan sẹẹ igoru, ẹ i mwẹ a ma danmwẹ ọẹn ghe, na ọ miẹn ehe na tọ. Erriọ ọre uwa gha na miẹn urhomwẹ, ọghọ, kevbe uyi rhie vbe Ẹdẹ ne Jesu Kristi gha ye egbe ne a miẹn.

⁸ Egbe ne uwa ma rhe ya miẹn ọre aro, wa ye ho ẹmwẹ ọnrẹn, egbe ne uwa ma he rhie ye miẹn ọẹn nian, wa ye ya ẹe yi, wa keghi ya ọyẹnmwẹ nọkhua, ọ ghe uyi ne ẹ i gia gie, sẹ ọyẹnmwẹ.

⁹ Rhunmwuda emwi ne uwa rhunmwuda ẹre yayi, sẹ uwa obọ nẹ, ọnii nọ wẹ, imiẹnfan orhiọn uwa.

¹⁰ Ẹmwẹ imiẹnfan na, ọre avbe akhasẹ wa gbe aro ke otọ gha nọ ẹmwẹ ọnrẹn, vbe gha gualọ otọ ẹre khian, iran keghi ta ẹmwẹ emwi na ne Osanobua ra ya we uwa ye otọ.

¹¹ Iran keghi hia ne iran gualọ ẹe miẹn, ẹghẹ ne ọ ghẹ gha khin, kevbe vbene ọ gha ya rre hẹ, rhunmwuda, Orhiọn Kristi ne ọ rre uwu iran keghi ta ẹmwẹ ẹghẹ na, vbene iranna ta ẹmwẹ oya ne Jesu gha re ye otọ, ke ẹe kevbe uyi ne ọ gha lele ẹe.

¹² Osanobua keghi rhie maa avbe akhasẹ na wẹ iwinna iran i re ọghe ẹmwẹ ọmaa ne egbe iran, sokpan ọ maa ne egbe uwa, vbe ẹghẹ ne iran na guan kan ẹmwẹ ẹmwata na ne uwa họn nẹ nian. Avbe odibo Iyẹn Ne ọ maa nii, ya ẹtin Orhiọn Ne Ọ Huanrẹn ne a gie ke ẹrinmwi rre gha guan, iran ta ẹmwẹ ẹmwata na ma uwa. Avbe ẹmwata na keghi re egbe ne avbe odibo Osa tobọ iran gha ho ne iran rẹn emwi ne a ya ẹe kha.

Utiemwẹ Ye Uyinmwẹ Ne Ọ Huanrẹn

¹³ Rhunmwuda ọnii khekherriọ, wa mu ekhọe uwa egbe ye otọ ne a ya fian emwi gbua. Wa rhie vbẹ ne uwa vbe rhie ekhọe uwa aro ye odẹ fẹẹrẹ gha khẹ afiangbe ne a gha rhie ne uwa vbe ẹdẹ ne Jesu Kristi gha ya egbe ladian.

¹⁴ Wa gha họn ẹmwẹ ne Osanobua, wa ghẹ gie a miẹn wẹ avbe emwi ne uwa te rriarria ba ẹghẹ ne uwa na he re ne ọ ma rẹn ne a ye, ye gha ma uwa emwi ne uwa gha ru.

¹⁵ Sokpan, wa gha re ne ọ huanrẹn vbe emwi ne uwa ru hia zẹ vbene Osanobua ne ọ tie uwa vbe re ne ọ huanrẹn.

¹⁶ Rhunmwuda, ebe khare wẹẹ, “Ọ kere ne uwa gha re ne ọ huanrẹn rhunmwuda ne ọ huanrẹn ọre imẹ vbe khin.”

¹⁷ Wa gha na erhunmwu ghe Osanobua, erha ọre uwa tie ẹre re, ọmwa ne ọ ya omwa ọkpa bu ohiẹn emwa hia zẹ vbe iwinna ne dọmwadẹ ọghọe winnaẹn, rhunmwuda ọnii khekherriọ, ẹghẹ ne uwa ghi mwẹ vbe agbọn vbe emwa na, wa ya ẹe gha go wan rẹn.

¹⁸ Rhunmwuda wa rẹn osa ne a hae ya dẹ uwa hin obọ ẹre rre ighẹ uyinmwẹ ne ẹ i mwẹ ere, ne uwa miẹn vbe obọ avbe erha uwa odede. Ẹ i re avbe emi ne ọ fafaa, vbe ne avbe igoru vbe esiliva ye.

¹⁹ Izọ ese ighobioye ọghe Kristi ọre a ya rhan uwa ye otọ, emwa ne ọ ye vbe oteghe ohuan ne ẹ imwẹ okan ra ama.

²⁰ Osanobua zọ ẹe ye otọ nẹ a te do yi agbọn, rhunmwuda uwa, ọre ọ na do rhie ẹre ladian ne a miẹn vbe ẹdẹ okiekie na.

²¹ ekpa ẹre ọre uwa na ya Osanobua yi, ọmwa ne ọ huẹn ọnrẹn kpao vbe orinmwi rre, ọ na rhie uyi nẹẹn, ọre a na miẹn wẹ, iyayi kevbe idaehọ uwa, Osanobua ọre a tua ẹre mu.

²² Vbene uwa ghi na la ekpa ne uwa na ru vbene ẹmwata khare, ye egbe uwa khian ne ọ huanrẹn nẹ nian, ne uwa na vbe mwẹ aho ẹmwẹ ọmwa ẹmwata ghe emwa iyayi ne iho uwa, wa gha ya ekhọe uwa hia ho ẹmwẹ egbe uwa ẹsẹse.

²³ Rhunmwuda la ekpa ẹmwẹ Osanobua ne ọ rrọọ, kevbe ne ọ re ọghe ẹtẹbitẹ dọlọ uwa biẹlẹ nẹ, zẹ vbe ivbi evbibiẹ ọmwa ọkpa, ne ọ re ne ẹ i wu ighẹ ẹ i re ne ọ wu.

²⁴ Zẹ vbene ebe kha re, “Te emwa hia ye vbe irunmwu ne oha, uyi ẹre hia ye vbe obobo ẹre. Irunmwu wu, obobo ẹre kharha kua,

²⁵ sokpan ẹmwẹ Nọyaẹnmwa ya mu ẹdẹdẹmwẹdẹ.” Nene ẹmwẹ na ọrọre Iyẹn Ne ọ maa ne a rhie gie uwa.