I Krọnikol 9 - Edo Bible (E Baibol Ẹdo) Version 1996

Iran Ni Ke Imu Rre

¹ A keghi gbẹnnẹ eni ivbi Izrẹl hia ye otọ zẹvbe dọmwadẹ ẹgbẹe iran Ebe avbe iran ne Ọba Izrẹl ọ re a gbẹnnẹ emwi na yi. A ka wa viọ ivbi Izrẹl kpao gha rrie Babilọn rhunmwuda orukhọ iran.

² Emwa kẹkan, avbe ohẹn kevbe Livai rre usun emwa ni ka wa gha die otọ iran.

³ Avbe emwa ni ke ẹwae Juda, e Bẹnjamin, Ifreim kevbe Manasẹ rre keghi ya gha rre Jerusalẹm.

^4-6 Ẹgbẹe uri eha vbe igbe ihinrin (690) vbe ẹwae e Juda keghi gha rre Jerusalẹm ivbi uniẹn Pẹrẹs ne ovbi e Juda, ọmwa ne ọ gha re ọkaolotu iran kegha re Utai ne ovbi Amihud kevbe eyẹ Ọmri. Usun avbe erha iran odede eso kegha re Imri kevbe Bani. Ivbi uniẹn e siela ne ovbi e Juda, ọmwa ne ọ gha re ọkaolotu iran kegha re Asaia, rẹn keghi re ọkaẹgbẹe ọghe ẹgbẹe irẹn. Ivbi uniẹn Zẹra ne ovbi e Juda, ọmwa ne ọ gha re olotu iran kegha re Jeuẹl.

^7-8 Iran na vbe uwu ẹwae Bẹnjamin kegha rre Jerusalẹm E Salu ne ovbi e Mẹsiulam, ne ọ gha re ovbi e Hodavaia ne ovbi e Hasẹnua, Ibneia ne ovbi Jeroham, Ela ne ovbi Uzi kevbe eyẹ ọghe Maikri, e Mẹsiulam ne ovbi e Siefatia, ne ọ gha re ovbi Reuẹl Ibnija.

⁹ Ẹgbẹe uniẹn na ni dia evba ya kegha re iyisẹn ihinrin, igbe isẹn kevbe ehan (956).

Avbe Ohẹn Ni Gha Rre Jerusalẹm

^10-12 Avbe ohẹn na ọre ọ gha rre Jerusalẹm E Jedaia, e Jehoiarib kevbe Jakin Azaraia ne ovbi e Hilkaia (iran na ọ o gha re ọka ọwa emwi Ọgua Osa) usun avbe erha iran odede kegha re Mẹsiulam, e Zadọk, e Meraiọt kevbe Ahitub. Adaia ne ovbi e Jeroham, ne usun avbe erha iran odede gha re e Pasiọ kevbe Makija, e Maasai ne ovbi Adiẹl, ne usun avbe erha iran odede gha re Jazẹra, e Mẹsiulam, e Mesilemit, kevbe Imnẹ.

¹³ Inu avbe ohẹn ni gha re ọkaẹgbẹe ke gha re arriaisẹn ọkpa, iyisẹn ihinrọn kevbe iyeha (1,760). Iran kegha re iguesẹ ni rrọ vbe iwinna hia ne a ghi winna vbe Ọgua Osa.

Avbe Livai Ni Gha Rre Jerusalẹm

^14-16 Avbe Livai na o re o gha rre Jerusalẹm: E Siemaia ne ovbi e Hasiub, ne usun avbe erha iran odede gha re. Azrikam kevbe Hasabia, ne ẹwae e Merari e Bakbaka, e Hẹrẹs kevbe Galal. E Matanaia ne ovbi e Mika, ne usun avbe erha iran odede gha re e Zikri kevbe Asaf. Obedaia ne ovbi e Semaia, ne usun avbe erha iran gha re Galal kevbe Jedutun, e Berakia, ne ovbi Asa kevbe eyẹ ọghe Ẹlkana ne ọ gha rre iwewe otọe avbe ne a tie ẹre Nẹtofa.

Avbe Ọgbalegbe Ọgua Osa Ni Gha Rre Jerusalẹm

¹⁷ Usun avbe ọgbalegbe Ọgua Osa ni gha rre Jerusalẹm ke gha re: E Sialọm Akub, e Talmọn, kevbe Ahiman, E Sialọm kegha re ọkaolotu iran.

¹⁸ Do sẹ ẹghẹ na, ehe ne a viọ ivbi uniẹn iran yi kegha re odẹ ahọ Urho Ọba. Iran ka vbe gha re ọgbalegbe vbe onurho ne a la la agọ avbe Livai.

¹⁹ E Sialọm ne ovbi e Kore kevbe eyẹ Ebiasaf, kevbe iran ni gba re ivbi uniẹn e Kora ọ re ọ ka gha avbe ọgbalegbe vbe onurho Owa Ukpọn ne a ya rẹn ighẹ e Nọyan rre evba zẹ vbene avbe erha iran ka vbe gha ye ne iran na gha re ne ọ gbearoghe agọ e Nọyaẹnmwa.

²⁰ E Finihaz ne ovbi Eleaza, te Nọyaẹnmwa gha deba ẹre! — rẹn ọ gha mwamwa iwinna ne iran ẹghẹ nii.

²¹ E Zẹkaraia ne ovbi e Meselemia kevbe gha re ọgbalegbe vbe onurho Owa Ukpọn ne a ya rẹn ighẹ e Nọyaẹnmwa rre evba.

²² Vbe uwu ehia, inu emwa ne a zẹe ne iran gha re ọgbalegbe onurho kevbe ehe ne a la la owa ke gha re uri ọkpa vbe vbe iweva (212). A keghi gbennẹẹn eni iran ye otọ zẹ vbene iran ya rre dọmwadẹ igue. E Devid ne Ọba kevbe e Samuẹl ne akhasẹ ọ re ọ viọ iran ye ukpo adazẹ na.

²³ Iran kevbe avbe ivbi uniẹn iran ọ re ọ gha gbearoghe onurho Ọgua Osa. Onurho ọkpọkpa kegha rre igienenẹ, okuo ekẹn ahọ kevbe orrie.

²⁴ Ọkaolotu ọgbalegbe kevbe gha rre ọkpọkpa vbọ.

²⁵ Etẹn avbe ọgbalegbe ghi yi iran obọ, igue iran gha ye, iran ghae egbe ye otu do gha khẹ odẹ la ikpẹdẹ ihinrọn.

²⁶ Avbe oka ọgbalegbe ne enẹ kegha re Livai, iran ọre a ghi ka emwi hia ye ọre obọ. Iran ọre ovbe gbearoghe avbe ughugha ni rre Ọgua Osa kẹẹ ke emwi hia ni rre evba.

²⁷ Ehe ne iran ye ke wa sikẹ Ọgua Osa rhunmwuda iwinna ọrọre ne iran gbearoghe ẹre kevbe ne iran gha kie urho ẹre ye otọ owiowiẹ.

Avbe Livai Nekpa

²⁸ Avbe Livai nekpa ọre ọ gbearoghe avbe ọkpan ne a ya ru ugamwẹ vbo Ọgua Osa. Iran ọre ọ viọ iran ladian, iran ọ vbe viọ iran la owa vbe ẹghẹikẹghẹ ne a ya lo iran.

²⁹ Iran nekpa kegha gbearoghe avbe emwi iruemwi ni huanrẹn ni dekẹe kevbe irhuarhua, ayọn ofigbọn ọliv, avbe eturari kevbe emwi ni ghi winhin hia.

³⁰ Sokpan iwinna ọre emwi ni winhin ne a gha gha khin.

³¹ E Livai ne a tie eni ẹnrẹn Matitaia, ne ọre ovbi e Sialọm nọdiọn, vbe uniẹn e Kora, ọ re ọ yan iwinna emwi ne a ghi fian ẹre eka ya ru ugamwẹ imuohan nẹ.

³² Ivbi ẹwae Kohat ọ re yan eka iruemwi ne a lo vbe Ọgua Osa vbe Ẹdẹ Ikẹtin hia.

³³ Eso vbe ẹgbẹe avbe Livai ọre ọ yan emwi ihuan ne a kpee vbe Ọgua Osa. Avbe ọkaẹgbẹe avbe ẹgbẹe na eso vbe avbe ughugha ni rre Ọgua Osa ọre iran gha ye, iran i vbe mwẹ obọ vbe avbe iwinna ọvbehe, rhunmwuda, ke asọn ke avan ọ re a ya tie iran ye iwinna.

³⁴ Avbe emwa ne a kha na, avbe ọkaẹgbẹe ẹgbẹe Livai iran gha khin, zevbe uniẹn edọmwadẹ ọghọe ọghe erha iran odede. Avbe ọkaolotu ni gha rre Jerusalẹm ọre iran gha khin.

Avbe Erha Odede Kevbe Ivbi Uniẹn E Sọl

³⁵ E Jiẹl ọre ọ bu e Gibiọn, ọ na yin ẹnrẹn. A kegha tie amwẹ ọnrẹn Maaka.

³⁶ Ovbi ẹre nọdiọn kegha re Abdọn, ivbi nekpa kegha re Zọ, Kis, Baal, Nẹ, Kevbe Nadab,

³⁷ e Gẹdọ, Ahio, Zẹkaraia kevbe Miklọt,

³⁸ ne erha e Simea. E Jerusalẹm ọre ivbi iran gha deba ivbi ẹgbẹe ọvbehe vbe uniẹn nii.

³⁹ E Nẹ o gha re erha Kis, e Kis ọ gha re erha Sọl. Emọ enẹ e Sọl biẹlẹe: e Jonatan, e Malkisua, Abinadab kevbe Esbal.

⁴⁰ E Jonatan ọ gha re erha Meribal, ne o gha re erha Maika.

⁴¹ E Maika keghi biẹlẹ emọ enẹ, ena ọre Pitọn, e Mẹlẹk, e Tarea kevbe Ahaz.

⁴² Ahaz ọre erha e Jara ne ọ vbe emọ eha, ena ọre Alemẹt Azmavẹt kevbe Zimri, e zimri ọre erha Moza,

⁴³ e Moza ọre erha Binia ne ọ biẹ Refaia, ne ọ biẹ Eleasa, ne ọ biẹ Azẹl.

⁴⁴ Azẹl keghi mwẹ emọ ehan, ena ọre Azrikam, e Bokeru, Ismaẹl, Searia, Obedaia kevbe Hanan.