I Krọnikol 5 - Edo Bible (E Baibol Ẹdo) Version 1996

Ivbi Uniẹn E Riubẹn

¹ Ivbi uniẹn e Riubẹn ighẹ ovbi e Jekọb ne ọdiọn ọ re ena khin. (Rhunmwuda ne ọ na gu ọkpa vbe uwu avbe egbakhian erha ẹe ru emwi ọdọ vbe amwẹ, ọ keghi mu ehe ọghe emwi ni te khẹke ọmọdiọn fua, a na mu ne Josẹf.

² Sokpan, ọ rhe ye vberriọ, ẹwae Juda ọ re ọ do wegbe sẹ, ọ na biẹ enọ khaemwisẹ ne ẹwae ni hia.)

³ E Riubẹn ne ovbi e Jekọb ne ọdiọn keghi biẹlẹ emọ ikpia enẹ, ena ọ re Hanọk, Palu, Hẹzrọn kevbe Kami.

^4-6 Ivbi uniẹn e Joẹl ke orre ọkpa ya sẹ ọvbehe ọ re ena khin, e Siemaia, e Gọg, e Siimei, e Maika, e Reaia, e Baal kevbe Beera. E Tiglat Pailesa keghi mu Beera, ne ọ gha re ọkaolotu oghunmwu, ọ na mu ẹẹn gha rrie iwe.

⁷ Emwa ne eni ẹnrẹn ladian vbe ebe uniẹn ọghe Riubẹn zẹ vbe ọkaolotu ọ re ena khin; e Jeiẹl, e Zẹkaraia,

⁸ Bẹla ne ovbi Azaz kevbe eyẹ e Siẹma ne uniẹn e Joẹl. Ewae na, ẹvbo Aroa ọ re iran yinrin kevbe otọe ne ọ ke evba laghe odẹ okuọ ọghe Nebo kevbe Baal Meon.

⁹ Iran kegha mwẹ oghẹn ohuan ni bun vbe otọe Giliad, rhunmwuda ọnii, iran keghi wa mu otọe nii vbe odẹ ahọ vbọ sẹ ato ne ọ wa ya vbẹ sẹ Ẹzẹ Yufretes.

¹⁰ Vbe ẹghẹ ọba e Sọl, ẹwae e Riubẹn keghi mu okuo gie emwa Hagrit, iran na gbele iran vbe okuo, iran na yin otọe iran vbe odẹ ahọ e Giliad.

Ivbi Uniẹn E Gad

¹¹ Ewae Gad, odẹ okuọ ọghe Riubẹn ọ re iran gha ye vbe otọe Basian, iran keghi ye niẹn obọ ya sẹ Salka vbe odẹ ahọ.

¹² E Joẹl ọ re ọ hu uniẹn ne ọ hin usi sẹ vbọ, e Siafam ọ re ọ bu ne ọ ghi zẹ lele ẹe, e Janai kevbe Siafat keghi ye vbe bu uniẹn ọvbehe vbe Basian.

¹³ Emwa ni ghi dekẹe vbe ẹwae nii, uniẹn ihinrọn na ọrọre ọghe iran: e Maikẹl, e Mẹsiulam, e Siẹba, e Jorai, e Jakan, e Zia, kevbe Ebẹ.

¹⁴ Ivbi uniẹn Abihẹl ne ovbi e Huri ọ re iran khin, uviẹn erha iran odede, zẹ vbene a lele ẹe ọ re ena khin: Abihẹl e Huri, e Jaroa, e Giliad, e Maikẹl, E Jesisiai, e Jado, e Buz.

¹⁵ Ahi ne ovbi Abdiẹl kevbe eyẹ e Guni, kegha re ọdiọnwere uniẹn nii.

¹⁶ Iran kegha rre otọ e Basian kevbe Giliad vbe ẹvbo ni lele ehe ne aranmwẹ na rria vbe Sairọn.

¹⁷ (Ẹghẹ ọba e Jotam ọghe Juda kevbe Jeroboam ne ọba Izrẹl, ọ re a na gbẹnnẹ avbe emwi na ye otọ.)

Ivbiyokuo Ewae Ni Rre Odẹ Ahọ

¹⁸ Ewae Riubẹn, Gad kevbe Manasẹ ne Owẹn Owiẹ kegha mwẹ ivbiyokuo iyeva irrọvbe uri enẹ yan arriaisẹn enẹ yan iyeva (44,760) emwa ne awa ma ẹre emwi ẹsẹse vbe asa, umozo kevbe uhanbọ ne a lo.

¹⁹ Iran na keghi mu okuo gie emwa Hagrit ni rre Jetọ, e Nafis kevbe Nodab.

²⁰ Osanobua ọ re iran mu ẹtin iran yan, iran kevbe gha na erhunmwu ghe ẹre ne ọ yi iran obọ. Osanobua keghi họn erhunmwu iran, ọ na gie iran khọn miotọ emwa Hagrit kevbe irogho iran hia.

²¹ Usun emwi ne iran khọn munọ vbe obọ avbe eghian iran kegha re e kamẹl arriaisẹn ekigbesiyeha (50,000) ohuan arriaisẹn ekigbesiyeha yan uri (250,000) kevbe ekẹtẹkẹtẹ arriaisẹn eva (2,000). Iran kevbe munọ emwa ne agbọn arriaisẹn iyisẹn, (100,000).

²² Iran gbele ni bun vbe uwu avbe eghian iran rhunmwuda ọ keghi gha re ọghe vbene Osanobua ho ẹre yi. Iran keghi wa yin otọe ni ọ te do sẹ ẹghẹ ne a ya viọ iran gha rrie iwe.

Emwa Ni Rre Manasẹ Ne Odẹ Ahọ

²³ Ivbi e Manasẹ ne odẹ ahọ keghi yin otọe e Basian rhinrin ya sẹ Baal Hẹmọn, Seni, Oke Hẹmọn, iran keghi wa gha muan yọ ẹsẹse.

²⁴ Iran na ọ re ọ gha re ọdia ẹgbẹe iran: Efẹ, Isi, Eliẹl, Azriẹl, e Jerimaia, Hodavaia kevbe Jadiẹl. Iran kegha re ivbiyokuo ni hin ukhuaẹn, kevbe ọkaolotu ni hin usi vbe ẹwae iran.

A Viọ Avbe Ewae Ni rre Odẹ Ahọ Gha Rrie Iwe

²⁵ Sokpan, avbe emwa na ma guobọ Osanobua avbe erha iran odede, iran keghi hẹe ye otọ ya gha ghoo ẹbọ emwa ne Osanobua khulo hin otọe nii rre.

²⁶ Ẹre Osanobua na ru ẹe ne Pul ne ọba nọkhua ọghe Asiria, (Rẹn a vbe tie ẹre Tiglat Pailesa) ya khọn ẹvbo nii. Ọ keghi munọ avbe ẹwae Riubẹn, e Gad ke odẹ Ahọ e Manasẹ oghunmwu kpao, ọ na ya viọ iran ye Hala, e Habọ kevbe Hara ke ọkpẹn Ẹzẹ Gozan ne iran gha rre evba ẹdẹdẹmwẹdẹ.