I Krọnikol 4 - Edo Bible (E Baibol Ẹdo) Version 1996

Ivbi Uniẹn E Juda

¹ Eso vbe uwu ivbi uniẹn e Juda ọ re ena khin, e Pẹrẹs, e Hẹzrọn, e Kami, Họ kevbe Siobal.

² E Siobal ọ re ọ biẹ Reiaia ne ọ biẹ Jahat, ne ọ biẹ Ahumai kevbe Lahad ni re erha odede avbe emwa ni rre Zora.

^3-4 Họ ọrọre ọmọdiọn ne okpia ọghe Efrat ne amwẹ Kelẹb ne erha ẹe. Ivbi uniẹn ọnrẹn ọ re ọ bu ẹvbo ne a tie ẹre Bẹtlẹhẹm. E Họ keghi biẹlẹ emọ ikpia eha, ena ọ re Etam, Pẹnuẹl kevbe Ezẹ. Etam kevbe gha mwẹ emọ ikpia eha, ena ọ re Jezrẹl, Isma kevbe Idbas, kevbe ọmọ okhuo ọkpa ne a tie ẹre Hazelelponi. E Pẹnuẹl ọ re ọ bu ẹvbo ne a tie ẹre Gẹdọ, Ezẹ keghi bu ne a tie ẹre Husia.

⁵ Asiọ ne ọ bu e Tẹkoa kegha mwẹ ikhuo eva, ena ọ re Hela kevbe Naara.

⁶ Rẹn vbe Naara kegha mwẹ emọ ikpia enẹ, ena ọ re Ahuzam, Hẹfa, Temeni kevbe Haahastari.

⁷ Asiọ kevbe Hela keghi gba biẹlẹ emọ ikpia eha, ena kegha re Zerẹt, Izia kevbe Etnan.

⁸ E Koz ọ re ọ biẹ Anub kevbe Zobeba, rẹn ọ vbe re erha odede ọghe ẹwae uviẹn Ahahẹl ne ovbi e Harum ne okpia.

⁹ Okpia ọkpa kegha rrọọ ne a tie ẹre Jabẹz, rẹn ọ re ọ vbe gha re ọmwa ne a ye ọghọ na sẹ vbe ẹgbẹe nii rhunmwuda ighẹ ubiẹmwẹ ọnrẹn wa lọghọ iye ẹe, ọ re ọ na he ẹre Jabẹz.

¹⁰ Sokpan, e Jabẹz keghi na erhunmwu ghe Osanobua Izrẹl wẹẹ, “Osanobua, fiangbe mwẹ ne u vbe mu otọe ne ọ kpọlọ mẹ. Yaba mwẹ ne u vbe rhie mwẹ lẹre hin obọ emwikemwi ne ọ gha si obalọ yọmwẹ egbe rre.” Osanobua keghi rhie emwi ne ọ na erhunmwu yi ne ẹẹn.

Eni Avbe Uniẹn Ọvbehe

¹¹ E Kelẹb ne ọtẹn e Siuhab kegha mwẹ ọmọ okpia ọkpa ne a tie ẹre Meha. E Meha ọ re ọ biẹ Eston.

¹² Ne ọ biẹlẹ emọ ikpia eha, ena ọ re Betrafa, Pasea kevbe Tehina. E Tehina ọ re ọ bu ẹvbo ne a tie ẹre Nahas. Ivbi uniẹn emwa na keghi ya yin e Reka.

¹³ E Kenaz kegha mwẹ emọ ikpia eva, ena ọ re Otniẹl kevbe Seraia. Otniẹl keghi vbe gha mwẹ emọ ikpia eva, ena ọ re Hatat kevbe Meonotai.

¹⁴ Meonotai ọ re ọ biẹ Ọfra. Seraia ọ re ọ biẹ Joab ne ọ bu Iya Owinna, ẹvbo ne emwa hia na re owinna ni guẹ iwinna.

¹⁵ E Kelẹb ne ovbi e Jefunẹ kegha mwẹ emọ ikpia eha, ena ọ re Iru, Ela kevbe Naam. Ela ọ re ọ biẹ Kenaz.

¹⁶ Jehalelel kegha mwẹ emọ ikpia enẹ, ena ọ re Zif, Zifa, Tiria kevbe Asarẹl.

^17-18 Ẹzra kegha mwẹ emọ ikpia enẹ, ena ọ re Jeta, e Mered, Efẹ kevbe Jalon. E Mered keghi rhie ovbi ọba Igipt, iran keghi biẹ ọmọ okhuo ọkpa ne a tie ẹre Miriam kevbe emọ ikpia eva, e Siamai kevbe Isba. Isba ọ re ọ bu ẹvbo ne a tie ẹre Ẹstemoa. E Mered kevbe rhie ovbi e Juda ọkpa, iran keghi biẹlẹ emọ ikpia eha, ena ọ re Jered ne ọ bu ẹvbo ne a tie ẹre Gẹdọ, e Hebẹ ne ọ bu ẹvbo ne a tie ẹre Soko, kevbe Jekutiẹl ne ọ bu ẹvbo ne a tie ẹre Zanoa.

¹⁹ E Hodaia keghi rhie ọtẹn Naham ne okhuo. Ivbi uniẹn iran ọ re ọ bu ẹwae ne a tie ẹre Gam ni rre ẹvbo ne a tiẹ ẹre Keila kevbe ẹwae Maakat ni rre ẹvbo ne a tie ẹre Ẹstemoa.

²⁰ E Siimọn kegha mwẹ emọ ikpia enẹ, ena ọ re Amnọn, Rinna, e Benhanan kevbe Tilọn. Isii kegha mwẹ emọ ikpia eva, ena ọ re Zohẹt kevbe Bẹnzohẹt.

Ivbi Uniẹn E Siẹla

²¹ Ọkpa vbe ivbi e Juda ne ikpia ọ re Siẹla gha a khin. Usun ivbi uniẹn ọnrẹn ọ re Ẹr ne ọ bu ẹvbo ne a tie ẹre Leka kevbe Laada, ne ọ bu ẹvbo ne a tie ẹre Maresia, kevbe ẹwae iran ni do ukpọn eto ovbiohuẹ ni rre ẹvbo ne a tie ẹre Bẹt Asbea.

²² Jokim kevbe emwa ni rre ẹvbo ne a tie ẹre Kozeba, Joas kevbe Saraf ne ọ viọ ikhuo e Moab, ọ na ya yin e Bẹtlẹhẹm. (Ọkpẹre ne ẹmwẹ na kegha rrọọ zẹ vbene a kpa itan rẹn ke otọ gha dee.)

²³ Ọmakhe ọ re iran gha khin ne ọba, iran kegha rre avbe ẹvbo ne a tie ẹre Neteim kevbe Gẹdẹra.

Ivbi Uniẹn E Simiọn

²⁴ Emọ ikpia isẹn ọ re Simiọn gha mwẹ, ena ọ re Nemuẹl, Jamin, Jarib, Zẹra, kevbe Siaul.

²⁵ Ovbi e Siaul kegha re Sialọm, eyẹ ọre kegha re Mibsam, ihiẹnhiẹn ọnrẹn kegha re Misma.

²⁶ Ke egbe Misma kpao, uniẹn ni keghi la uviẹn ọghe Hamuẹl, Zekọ kevbe Siimei.

²⁷ E Siimei kegha mwẹ emọ ikpia enẹirrọvbugie kevbe emọ ikhuo ehan, sokpan, etiọnrẹn ma biẹlẹ sẹ vberriọ. Ewae Simiọn ma vbe vuọn yọ zẹ vbene ẹwae Juda gha ye.

²⁸ Rhinrin do sẹ ẹghẹ ọghe Devid ne ọba, avbe ẹvbo na ọ re uniẹn e Simiọn yinrin: Biẹsiẹba, Molada, Hazasial,

²⁹ e Bilha, Ezẹm, Tolad,

³⁰ e Bẹtuẹl, Họma, Ziklag,

³¹ e Bẹt Makabot, Hazasusim, Bẹtbiri, kevbe Siaareim.

³² Iran yevbe yin ihe isẹn ọvbehe, ena o re: Etam, Ain, Rimọn, Tokiẹm kevbe Asian,

³³ kevbe avbe igue ni lẹga iran, rhinrin yasẹ Baalat ne o rre odẹ okuo. Emwi ne iran gbẹnnẹ ye otọ vbekpa uniẹn iran kevbe dọmwadẹ ehe ne iran yinrin ọ re ena khun.

^34-38 Avbe ọkaẹgbẹe ni gha rre dọmwadẹ uniẹn ọ re ena khin: E Mesiobab, e Jamlẹk, e Josaia ne ovbi Amazaia, Joẹl, e Jehu (ne ovbi e Josibia, ne ovbi e Seraia ne ovbi Asiẹl) Ẹliọnai, e Jaakoba, Jesiohaia, Asaia, Adiẹl, ẹ Jesimiẹl, Benaia. Ziza (ne ovbi sifi, ne ovbi Alọn ne ọ re uniẹn e Jedaia, e Simri, kevbe Siemaia). Rhunmwuda ne uniẹn iran na wa gha bun yọ nii,

³⁹ iran na wa obọ ghe odẹ orrie, te iran ghi te ra sẹ Gẹrra, iran na vbe do gha viọ emwirri iran rri irunmwu vbe odẹ ahọ ọghe iya ne a bu ẹvbo ni yi.

⁴⁰ Iran keghi wa otọ ne ọvbẹ aro ne o vbe ma emwiokọ ẹsẹse, ne ọ ivbiẹ kevbe ne ukpokpo i ye. Emwa ni te ka yin evba yi kegha re ivbi e Hamit.

⁴¹ Avbe emwa ne a guan kan na keghi si kpao gha rrie Gẹrra vbe ẹghẹ ọba Hẹzekaia, iran keghi dunmwu avbe owa ukpọn kevbe ivbi owa emwa ni te rre ẹvbo nii uan. Iran keghi khulo emwa ni te rre ẹvbo nii kua iran na wa yin ẹnrẹn rhunmwuda evbare ohuan iran wa rre evba ẹsẹse.

⁴² Arhunmwu iyisẹn isẹn (500) vbe ivbi uniẹn e Simiọn keghi si gha rrie odẹ Ahọ Idọm. Emwa ni viọ iran gha khian kegha re: Pelatia, Neria, Refaia, kevbe Uziẹl, ne ivbi Isi nikpia.

⁴³ Iran keghi gbele ivbe Amalẹk ni ghi te kẹe vbe evba. Evba nii ọ re iran ghi ye ke ẹghẹ nii gha dee.