I Krọnikol 26 - Edo Bible (E Baibol Ẹdo) Version 1996

Avbe Ọgbalegbe Ọgua Osa

¹ Iran ni re Ọgbalegbe Ọgua Osa vbe avbe Livai, vbene a ya wa iwinna ne iran ọ re ena khin: Iran ni ke uniẹn Kora rre kegha re Mesielemaia ne ovbi e Kore ne ẹgbẹe Asaf.

² Rẹn kegha mwẹ emọ ihinrọn, iran ọre ena khin zẹ vbene iran ya re ọdiọn: e Zẹkaraia, e Jediaẹl, e Zebadaia, e Jatmiẹl,

³ Ẹlam, e Jehohanam, kevbe Eliehoenai.

⁴ Ne usun ọ re ọ vbe ye ighẹ Obẹd Idọm ne Osanobua ye emọ ikpia erẹnrẹn fiangbe. Iran ọ re ena khin vbene iran ya re ọdiọn: Siemaia, e Jehozabad, e Joa, e Saka, e Netanẹl,

⁵ Amiẹl, Isaka kevbe Puletaia.

^6-7 Ovbi Obẹd Idọm ne ọdiọn ighẹ Semaia kegha mwẹ emọ ikpia ehan, ena ọ re Otni, e Refaẹl, Obẹd, Elzabad, Elihu kevbe Semakaia. Emwa kpataki iran gha khin vbe ẹgbẹe iran rhunmwuda ne iran na rẹn aru, te Osa wa mobọ ya emwi we eva ni kiekie.

⁸ Ẹgbẹe Obẹd Idọm ọkpa kegha mwẹ arhin eva yan iyeha (62) vbe uwu emwa ni rẹn emwi dinmwi, vbe iwinna na.

⁹ Ẹgbẹe Mesielemaia kegha mwẹ eva irrọvbugie vbe uwu emwa ni rẹn emwi dinmwi na.

¹⁰ Usun emwa ni ke ẹgbẹe Merari rre ọ re ọ ye ighẹ Hosa, rẹn kegha mwẹ emọ ikpia isẹn ni re Simri (erhae keghi ya ẹe ru ọkaolotu, a gha rhe miẹn wẹ ẹ i re irẹn ọrọre ọdiọn.)

¹¹ E Hilkaia, e Tebalaia kevbe Zẹkaraia. Ivbi ẹgbẹe e Hosa hia ni gha re ọgbalegbe Ọgua Osa kegha re iwera.

¹² A keghi ghae avbe ọgbalegbe Ọgua Osa ye otuotu zẹ vbe ẹgbẹe edọmwadẹ ọghọe a kevbe wa iwinna ne iran vbe uwu Ọgua Osa zẹ vbene a vbe wa ne avbe Livai nekpa.

¹³ Dọmwadẹ ẹgbẹe, vbene ọ rhirhi yan kanmwa sẹ, uta ọ re iran yan ya zẹ onurho ne iran gha gbearoghe vbọ.

¹⁴ Uta ọghe Sielemia keghi mu onurho odẹ ahọ, vbene ọghe Zẹkaraia ne ovbi ẹre (ọmwa ne ọ bu ude esi vbe ẹghẹ hia) na mu onurho odẹ okuọ.

¹⁵ Onurho odẹ ekẹn kegha re ọghe Obẹd Idọm, a na wẹ ne ivbi ẹre gha gbe aro ghe avbe aza.

¹⁶ A keghi mu onurho orrie ne Siupim kevbe Hosa deba Onurho Sialẹkẹt ne ọ rre odẹ ne ọ ke odọ. A kegha ẹghẹ ne a khẹ odẹ la vberriọ wẹ a ghi gha ya emwa rọ emwa vbe ẹghẹ.

¹⁷ Vbe odẹ ahọ vbọ, arhin ehan ọ re ọ gha khẹ odẹ ẹdẹgbegbe, enẹ vbe odẹ okuọ kevbe enẹ vbe odẹ ekẹn. A keghi viọ ọgbalegbe enẹ ye aza ẹdẹgbegbe. Eva vbe aza ọkpọkpa.

¹⁸ Ọgbalegbe enẹ kegha rre ọkpẹn ugha odẹ ahọ vbe odẹ ne a la ye, eva kegha rre nene ugha tobọ ẹre.

¹⁹ Erriọ ọ re a ya ghae iwinna abodẹ ne uniẹn e Kora kevbe Merari.

Avbe Iwinna Ọvbehe Vbe Ọgua Osa

²⁰ Iran eso ọvbehe vbe avbe e Livai ne ihua iran kegha gbearoghe aza kevbe avbe ehe ne a viọ emwi ne a ya yo imuohan gie Osanobua yi.

²¹ E Ladan ne ọ vbe gha re ọkpa vbe uwu avbe ivbi e Gẹsiọn, keghi gha re erha odede ọghe ẹgbẹe ughughan ni bun, deba ẹgbẹe ọghe Jẹhiẹl ne ovbi ẹre.

²² Ivbi e Ladan ne eva nekpa, ighẹ Zetam kevbe Joẹl, ọ re ọ gha gbearoghe aza kevbe ehe ne a hẹ emwi yi vbe Ọgua Osa.

²³ A keghi vbe wa iwinna ne ivbi unjẹn ọghe Amram, Izia, Hibrọn kevbe Uziẹl.

²⁴ E Siebuẹl ne ovbi uniẹn e Mosis kegha re ọkaolotu nọkhua ne ọ gbearoghe aza igho ọghe Ọgua Osa.

²⁵ Eliezẹ keghi la obọ ọtiọnrẹn ne okpia ighẹ Gẹsiọm gha re ọtẹn Sielomit. Elaisia ọ re ọ biẹ Rehabaia ne ọ biẹ Jesia, ne ọ biẹ Joram, ne ọ biẹ Zikri ne ọ biẹ Selomit.

²⁶ E Sielomit kevbe ivbi ẹre ọ re ọ gha sin iran ẹro ighẹ avbe emwi ne Devid ne ọba ya mu ohan gie Osanobua kevbe dọmwadẹ ọba ẹgbẹe, avbe ekaolotu avbe ẹwae kevbe avbe ivbiyokuo.

²⁷ Iran keghi viọ emwi eso ne iran fu hẹẹ vbe okuo, iran na ya iran fi ohan ne iran gha lo iran vbe Ọgua Osa.

²⁸ E Sielomit kevbe ẹgbẹe ọre, ọ re ọ gha gbe aro ghe avbe emwi ne a ya fi ohan ne a gha lo vbe Ọgua Osa, ya deba avbe emwi ne Samuẹl ne akhasẹ hẹ rre, ne a Sọl viọ rre kevbe ne Abna ne ovbi e Nẹẹ, kevbe ne Joab ne ovbi e Zeruaia.

Iwinna Avbe Livai Ọvbehe

²⁹ A keghi zẹ vbe uniẹn ọghe Izia, e Kienanaia kevbe ivbi ẹre, ne iran gha wa emwa iwinna, ne iran gha gbẹnnẹ emwi ye otọ kevbe ne iran gha dọlọ ẹzọ ne ivbi Izrẹl.

³⁰ Vbe ivbi uniẹn Hibrọn a keghi zẹ Hasiabaia, kevbe etiọnrẹn iyisẹn ehai-rrọvbugie (1,700) emwa ni wa sekpe, a na wẹ ne iran gha guan ye ẹmwẹ emwi ne a gho kevbe ọghe emwa kẹkan vbe otọe Izrẹl vbe odẹ orrie ọghe Ẹzẹ Jọdan.

³¹ E Jeraia ọre ogha re ọkaolotu ivbi uniẹn e Hibrọn. Ọ ghi rre ukpo iyeva ne Devid rriọba, a keghi do gualọ otọ vbene ivbi uniẹn e Hibrọn ya dee hẹ. A keghi do miẹn ivbi uniẹn na eso ni wa re ivbiyokuo ni hin usi vbe iran rre Jazẹ vbe otọe e Giliad.

³² E Devid ne ọba keghi hannọ arhin iyisẹn ehairrọvbọgban (2,700) ne ọkaẹgbẹe ni sẹ ekpe vbe uwu avbe etẹn Jeraia. ọ na hẹ iran yọ ne iran gha gbearoghe ẹmwẹ emwi ugamwẹ kevbe ẹmwẹ ẹvbo kẹkan vbe otọe Izrẹl ne odẹ ahọ Ẹzẹ Jọdan — ena kegha re otọe Riubẹn, Gad kevbe Manasẹ ne Owẹn Owiẹ.