I Krọnikol 25 - Edo Bible (E Baibol Ẹdo) Version 1996

Ikpemaba Ọgua Osa

¹ E Devid ne ọba kevbe avbe ekaolotu avbe Livai keghi zẹ avbe uniẹn e Livai na ne iran gha ru ugamwẹ; ena ọ re Asaf, Heman kevbe Jedutun. Iran na ghi ta uhunmwu ne Osanobua gie vbene iran gha na gha kpe akpata kevbe ukusẹ lele ẹe. Eni iran ne a wẹ ne ọ gha ru ugamwẹ na ọ re ena khin, vbene dọmwadẹ oka na vbe mwẹ egbe ugamwẹ ne iran ru:

² Ivbi Asaf ni ikpia enenẹ ighẹ Zakọ, e Josẹf, e Nẹtanaia kevbe Asiarela. Asaf ọ re ọ gha gbearoghe iran na, iran ọ re ọ ta vbene Osanobua kha hẹ ladian vbe ẹghẹ ne ọba a rhirhi ya wẹ ne a ru vberriọ.

³ Iran ehan ne ivbi Jedutun ne ikpia, ighẹ Zeri, e Jesiaia, e Simẹi, e Hasiabaia kevbe erha iran ọ re ọ gha gbearoghe iran, iran ghi gha ta vbene Osanobua kha hẹ, vbene iran kpe akpata lele ẹe deba ihuan urhomwẹ kevbe ekpọnmwẹ ghe Nọyaẹnmwa.

⁴ Ivbi e Heman ni ikpia iwenẹ ighẹ Bukaia, e Matanaia, Uziẹl, e Siebuẹl, e Jerimot, e Hananaia, e Hanani, Eliata, e Gidalti, Romamti, Ezẹ, e Josbekasia, e Maloti, e Hotẹ kevbe Mahaziot.

⁵ Osanobua keghi viọ emọ ikpia iwenẹ ne ẹẹn, deba emọ ikhuo eha ne Heman ne akhasẹ ọba, zẹ vbene ọ khare ighẹ rẹn gha ru, ne ọ miẹn ehe na rhie ẹtin ne Heman.

⁶ Ivbi ẹre ni ikpia hia wa guara kpe isẹ kevbe akpata vbene erha iran na dia iran ne a gha rhie ẹre ba ugamwẹ Ọgua Osa. Ọba ọ re ọ gha ta ne a gha ru ma Asaf, Jedutun kevbe Heman.

⁷ Iran eneyan ugie na keghi wa gha re emwa ni rẹn iwinna ni ẹsẹse: Avbe Livai ne ihua iran kevbe gha re ikpemaba ne a ma ẹre emwi guẹ. Iran hia kegha re arhin erẹnrẹn yan iyenẹ ọ ya yan uri (288).

⁸ Uta ọ re iran gha yan ya wa iwinna ne emwa, ọ re ibiẹka nọ ra eniwanrẹn, iran ni guẹ ne ra ni da ruẹ.

^9-31 Arhin erẹnrẹn yan iyenẹ ọ ya yan uri na (288), a keghi gha iran ye oka enẹyan ugie zẹ vbe ẹgbẹe edọmwadẹ ọghe ọe, vbene arhin iweva na rre oka ọkpọkpa, a na vbe rhie ọkaolotu ye oka ọkpọkpa. Vbene iwinna ya gha sẹ iran egbe ọ re ọna khin: 1. E Josẹf ne ẹgbẹe Asaf 13. Siebuẹl 2. Gedalaia 14. Matitaia 3. Zakọ 15. Jerimot 4. Zeri 16. Hananaia 5. Nẹtanaia 17. Josbekasia 6. Bukaia 18. Hanani 7. Asiarela 19. Maloti 8. Jesiaia 20. Etiata 9. Matanaia 21. Hotẹ 10. Simẹi 22. Gidalti 11. Uziẹl 23. Mahaziot 12. Hasiabaia 24. Romamti Ezẹ